വര്‍ഗീയവാദത്തിന്റെ അടിവേരുകള്‍ തേടി

നമ്മുടെ രാജ്യത്ത് വര്‍ഗീയഫാസിസ്റ്റ് ശക്തികള്‍ അധികാരമുറപ്പിക്കുന്നതിന് പരിശ്രമിച്ചുകൊണ്ടിരിക്കുന്ന കാലഘട്ടമാണിത്. ഈ സാഹചര്യത്തില്‍ ഇന്ത്യയിലെ വര്‍ഗീയതയുടെ ചരിത്രത്തെയും വര്‍ത്തമാനത്തെയും കുറിച്ച് മനസ്സിലാക്കുക എന്നത് പ്രധാനമാണ്. ഇതിലേക്ക് വെളിച്ചം വീശുന്നതാണ് കെ.എ. വേണുഗോപാലന്‍ എഴുതിയ 'വര്‍ഗീയത: ചരിത്രവും വര്‍ത്തമാനവും' എന്ന പുസ്തകം. ഇന്ത്യന്‍ ഭരണവര്‍ഗം വര്‍ഗീയ ഫാസിസ്റ്റ് ശക്തികളെ പിന്തുണയ്ക്കുന്ന നില എന്തുകൊണ്ട് ഉണ്ടായി എന്ന പരിശോധന നടത്തിക്കൊണ്ടാണ് പുസ്തകം തുടങ്ങുന്നത്. ഇന്ത്യയിലെ മുതലാളിത്ത വളര്‍ച്ചയുടെ ഭാഗമായി വളര്‍ന്നുവന്ന നവോത്ഥാന പ്രസ്ഥാനത്തില്‍ ഹിന്ദു പുനരുജ്ജീവനത്തിന്റെ അംശങ്ങള്‍ പ്രകടമായിരുന്നു. ഇതിന്റെ തുടര്‍ച്ചയായി വളര്‍ന്നുവന്ന കോണ്‍ഗ്രസ്സില്‍ ഈ സ്വാധീനം ദൃശ്യമായി. അക്കാലത്തെ സംഭവങ്ങള്‍ ചൂണ്ടിക്കാണിച്ചുകൊണ്ട് ലേഖകന്‍ ഇത് വ്യക്തമാക്കുന്നുണ്ട്. കോണ്‍ഗ്രസ്സിനകത്ത് രൂപപ്പെട്ട ഈ നിലപാട് രാജ്യം ഒരു ഹിന്ദുരാഷ്ട്രമാകുമോ എന്ന തോന്നല്‍ മറ്റു ജനവിഭാഗങ്ങളില്‍ ഉണ്ടാക്കി. അതിന്റെ ഫലമായിട്ടാണ് അഖിലേന്ത്യാ മുസ്ലീം ലീഗ് രൂപീകരിക്കപ്പെട്ടത് എന്നും ലേഖകന്‍ വ്യക്തമാക്കുന്നു. 

സ്വാതന്ത്ര്യാനന്തരം അധികാരമേറ്റെടുത്ത കോണ്‍ഗ്രസ് ഭൂപ്രഭുത്വവുമായി സന്ധി ചെയ്ത് രാഷ്ട്രീയ അധികാരം നിലനിര്‍ത്തുകയാണ് ചെയ്തത്. ഇത് ജാതിമത ചിന്തകളും അവയുടെ രൂപാന്തരമായ ജാതി വര്‍ഗീയ രാഷ്ട്രീയവും നിലനില്‍ക്കുന്നതിനും വളരുന്നതിനുമുള്ള ഭൗതിക പശ്ചാത്തലം ഉണ്ടാക്കി. ഇന്ത്യയില്‍ വളര്‍ന്നുവന്ന വര്‍ഗീയ രാഷ്ട്രീയത്തിന്റെ അടിസ്ഥാനം ഇതാണെന്ന് സി.പി.ഐ (എം) ന്റെ പാര്‍ടി പരിപാടി കൂടി ഉദ്ധരിച്ചുകൊണ്ട് ലേഖകന്‍ രേഖപ്പെടുത്തുന്നു. ഇന്ത്യാരാജ്യത്ത് കോര്‍പ്പറേറ്റുകളുടെ താല്‍പ്പര്യം സംരക്ഷിക്കുന്നതിന് ഉതകുന്ന നയസമീപനമാണ് നരേന്ദ്രമോഡി ഉള്‍പ്പെടെയുള്ള ബി.ജെ.പി നേതാക്കള്‍ സ്വീകരിച്ചത്. അതിനാല്‍, അത്തരം ശക്തികള്‍ക്ക് തങ്ങളുടെ താല്‍പ്പര്യം സംരക്ഷിക്കുന്നതിന് ബി.ജെ.പിയുടെ ഭരണവും സഹായകമാണെന്ന് വ്യക്തമാവുകയുണ്ടായി. ഗുജറാത്തില്‍ കോര്‍പ്പറേറ്റുകള്‍ക്കായുള്ള വികസന നയങ്ങള്‍ മുന്നോട്ടുവച്ച നരേന്ദ്രമോഡിയെ പ്രധാനമന്ത്രിയാക്കി ഉയര്‍ത്തുന്നതിനു പിന്നിലുള്ള കുത്തക മുതലാളിത്തത്തിന്റെ താല്‍പ്പര്യം ഈ പുസ്തകത്തില്‍ തുറന്നുകാട്ടപ്പെടുന്നു. ഇന്ത്യയിലെ നവോത്ഥാന പ്രസ്ഥാനത്തില്‍ പുനരുജ്ജീവനത്തിന്റെ അംശങ്ങള്‍ നിലനിന്നിരുന്നു. അതിനാല്‍ തന്നെ, സാമൂഹ്യ അന്തരീക്ഷത്തില്‍ ഇത്തരം ആശയങ്ങള്‍ക്ക് സ്വാധീനമുണ്ടായിരുന്നു. ഇസ്ലാമിക നവോത്ഥാനത്തിന്റെ വളര്‍ച്ചയും ഇതില്‍ സൂചിപ്പിക്കുന്നുണ്ട്. ജനാധിപത്യം വന്നാല്‍ ഭൂരിപക്ഷം വരുന്ന ഹിന്ദുക്കള്‍ക്കായിരിക്കും നേട്ടമെന്നും ന്യൂനപക്ഷമായ മുസ്ലീങ്ങള്‍ക്ക് ദോഷം ചെയ്യും എന്ന ധാരണയും രൂപപ്പെട്ടുവെന്നും ഇത് തകര്‍ക്കണമെങ്കില്‍ മുസ്ലീങ്ങള്‍ക്ക് പ്രത്യേക പരിഗണന വേണമെന്ന വാദം ഉയര്‍ന്നുവരികയുണ്ടായി. അതിനായി മുസ്ലീങ്ങള്‍ സംഘടിക്കണമെന്ന വാദവും മുന്നോട്ടുവയ്ക്കപ്പെട്ടു. ഇത്തരം ചിന്തകളെ രൂപപ്പെടുത്തി വളര്‍ത്തിയെടുക്കുന്നതില്‍ ബ്രിട്ടീഷുകാര്‍ വഹിച്ച പങ്ക് വളരെ വലുതാണ്. ഭിന്നിപ്പിച്ചു ഭരിക്കുക എന്ന ബ്രിട്ടീഷുകാരന്റെ തന്ത്രം വര്‍ഗീയതയെ ശക്തിപ്പെടുത്തുന്നതിനും പ്രോത്സാഹിപ്പിക്കുന്നതിനും പടര്‍ന്നു പന്തലിക്കുന്നതിനും സുപ്രധാനമായ കാരണമായിട്ടുണ്ട്. ഇത്തരത്തിലുള്ള പ്രശ്നങ്ങളിലേക്ക് പുസ്തകം വിരല്‍ ചൂണ്ടുന്നുണ്ട്. ഹിന്ദുത്വത്തിന്റെ രാഷ്ട്രീയ അജണ്ട രൂപപ്പെടുന്ന വിവിധ ഘട്ടങ്ങള്‍ ഈ പുസ്തകത്തില്‍ രേഖപ്പെടുത്തുന്നുണ്ട്. ഹിന്ദു വര്‍ഗീയതയുടെ വികാസത്തെ വ്യക്തമാക്കിയശേഷം അഖിലേന്ത്യാ മുസ്ലീം ലീഗിന്റെ രൂപീകരണവും അതിന് അടിസ്ഥാനമായിത്തീര്‍ന്ന സാമൂഹ്യ ചലനങ്ങളേയും പരിചയപ്പെടുത്തുന്നു. ഇന്ത്യയില്‍ ഇസ്ലാമിക രാഷ്ട്രം സ്ഥാപിക്കാന്‍ നിലകൊള്ളുന്ന ജമാഅത്തെ ഇസ്ലാമിയുടെ രാഷ്ട്രീയവും തുറന്നുകാട്ടപ്പെടുന്നുണ്ട്. സാമ്രാജ്യത്വം ഇസ്ലാമിക തീവ്രവാദത്തെ ഏതൊക്കെ നിലയിലാണ് ശക്തിപ്പെടുത്തുന്നത് എന്നതും ഇതിന്റെ പരിഗണനാ വിഷയമാകുന്നുണ്ട്. ഇന്ത്യന്‍ യൂണിയന്‍ മുസ്ലീം ലീഗിന്റെ രൂപീകരണത്തിന് ഇടയാക്കിയ രാഷ്ട്രീയ ചലനങ്ങളും കേരള രാഷ്ട്രീയത്തില്‍ അവ നടത്തിയ ഇടപെടലുകളും അതിലൂടെ രൂപപ്പെട്ട പ്രതികരണവും ഇതില്‍ പരാമര്‍ശിക്കുന്നുണ്ട്. അധികാരത്തിനുവേണ്ടി കോണ്‍ഗ്രസ് ഭൂരിപക്ഷന്യൂനപക്ഷ വര്‍ഗീയതകളെ പ്രീണിപ്പിക്കുന്ന കാര്യവും പരിശോധനാ വിഷയമാകുന്നുണ്ട്. ജനസംഘത്തിന്റെ പില്‍ക്കാലരൂപമായ ഭാരതീയ ജനതാ പാര്‍ടി രൂപംകൊള്ളുന്നതും അവര്‍ മുന്നോട്ടുവച്ച മുദ്രാവാക്യങ്ങളും ഈ പുസ്തകത്തില്‍ വിശകലനത്തിന് വിധേയമാകുന്നു. ബി.ജെ.പിയുടെ സാമ്പത്തിക നിലപാടിന്റെ പൊള്ളത്തരങ്ങള്‍ തുറന്നുകാണിക്കാനാണ് അടുത്ത ഭാഗങ്ങള്‍ നീക്കിവച്ചിട്ടുള്ളത്. ഓരോ രംഗത്തും അവര്‍ സ്വീകരിച്ചുവന്ന നയങ്ങളെ വിലയിരുത്തിയശേഷം സാമ്പത്തികരംഗത്തെ നയങ്ങളും പഠനവിധേയമാകുന്നു. ഇന്ത്യന്‍ മതേതരത്വത്തിന്റെ ആണിക്കല്‍ തകര്‍ത്ത ബാബറി മസ്ജിദ് സംഭവത്തിന്റെ രാഷ്ട്രീയ സാഹചര്യങ്ങളും ഇതില്‍ പറയുന്നുണ്ട്. ആര്‍.എസ്.എസിന്റെ പ്രവര്‍ത്തനങ്ങള്‍ക്ക് വിവിധ മേഖലകളില്‍നിന്ന് ലഭിക്കുന്ന സഹായങ്ങളും അതിന് സഹായകമായി വര്‍ത്തിക്കുന്ന സംഘടനകളേയും പിന്നീട് വിലയിരുത്തപ്പെടുന്നുണ്ട്. ഗുജറാത്തിലെ വംശഹത്യയെയും അതില്‍ മോഡിയുടെ പങ്കിനെക്കുറിച്ചും ഗുജറാത്തിന്റെ വികാസ മാതൃകയുടെ പൊള്ളത്തരങ്ങളെയും തുറന്നുകാട്ടാനും പുസ്തകത്തില്‍ ശ്രമിക്കുന്നുണ്ട്. മോഡി ശിവഗിരിയില്‍ നടത്തിയ സന്ദര്‍ശനത്തിന്റെ രാഷ്ട്രീയ ഉള്ളടക്കങ്ങളാണ് അടുത്ത അധ്യായത്തില്‍ ഉള്ളത്. സര്‍ദാര്‍ വല്ലഭായി പട്ടേലിന്റെ പ്രതിമാനിര്‍മ്മാണവുമായി ബന്ധപ്പെട്ടുള്ള മോഡിയുടെ നീക്കങ്ങള്‍ എന്തിനുവേണ്ടിയായിരുന്നു എന്ന കാര്യവും ഇതിലുണ്ട്. വര്‍ഗീയ കലാപങ്ങള്‍ അഴിച്ചുവിട്ട് രാഷ്ട്രീയ ലാഭം കൊയ്യുന്ന സംഘപരിവാറിന്റെ അജണ്ടകളുടെ നിജസ്ഥിതിയും പഠനവിധേയമാകുന്നു. ദേശീയതയുടെ രൂപീകരണം മതവുമായി ബന്ധപ്പെട്ട ഒന്നല്ലെന്നും അത് ചരിത്രപരമായ പരിണാമ പ്രക്രിയയിലൂടെയാണ് രൂപീകരിക്കപ്പെടുന്നതെന്നും 'മതവും ദേശീയത'യുമെന്ന അധ്യായത്തില്‍ പറയുന്നുണ്ട്. മുതലാളിത്ത വളര്‍ച്ചയുടെ ഭാഗമായി നടന്ന ജനാധിപത്യ വിപ്ലവത്തിന്റെ സംഭാവനയാണ് മതനിരപേക്ഷത. ഇന്ത്യന്‍ സാഹചര്യത്തില്‍ അതിന്റെ സവിശേഷതകളെയും പരാമര്‍ശവിധേയമാകുന്നുണ്ട്. മതത്തെ സംബന്ധിച്ചുള്ള മാര്‍ക്സിസ്റ്റ് നിലപാടുകള്‍ മാര്‍ക്സിന്റെ പ്രസിദ്ധമായ വാക്യങ്ങള്‍ ഉദ്ധരിച്ചുകൊണ്ട് അവതരിപ്പിക്കുന്നു. ഇന്ത്യയിലെ വര്‍ത്തമാന സാഹചര്യത്തില്‍ രാജ്യം നേരിടുന്ന വര്‍ഗീയത പോലുള്ള ആപല്‍ക്കരമായ കാഴ്ചപ്പാടുകളെ പ്രതിരോധിക്കുന്നതിന് യോജിച്ച സമരങ്ങള്‍ ഉയര്‍ന്നുവരേണ്ടതിന്റെ പ്രാധാന്യം വ്യക്തമാക്കിക്കൊണ്ടാണ് പുസ്തകം അവസാനിപ്പിക്കുന്നത്. രാജ്യം നേരിടുന്ന വര്‍ഗീയതയുടെ പ്രശ്നങ്ങളെ മനസ്സിലാക്കുന്നതിനും അതിന്റെ പിന്നിലുള്ള രാഷ്ട്രീയസാമൂഹ്യ ചലനങ്ങളെ പരിചയപ്പെടുന്നതിനും ഉതകുന്നതാണ് ഈ പുസ്തകം. അതുകൊണ്ടുതന്നെ, വര്‍ത്തമാനകാലത്തെ രാഷ്ട്രീയത്തെക്കുറിച്ച് ദിശാബോധം പകരുന്നതിന് ഈ പുസ്തകം സഹായകമാണ്.

** പിണറായി വിജയന്‍

ഇന്ത്യന്‍ യൂണിയന്‍ മുസ്ലീം ലീഗിന്റെ മതിഭ്രമങ്ങള്‍

ഇന്ത്യന്‍ യൂണിയന്‍ മുസ്ലീം ലീഗ് അഹങ്കാരത്തിന്റെ അവതാരമായി മാറിയിരിക്കുകയാണ്. അവരെ സംബന്ധിച്ചിടത്തോളം മലപ്പുറം ജില്ല, രാജ്യത്തിനകത്തുള്ള മറ്റേതോ നാട്ടുരാജ്യമായി മാറിയിരിക്കുന്നുവെന്നു വേണം കരുതാന്‍. വര്‍ഷങ്ങള്‍ക്കു മുമ്പേ മലപ്പുറം ജില്ലയ്ക്കു മാത്രമായി ഒരു മദ്യവര്‍ജന നയം വേണം എന്ന് അവര്‍ സ്വയമേവ പ്രഖ്യാപിക്കുകയുണ്ടായി. ഈയിടെ നമ്മള്‍ കേട്ടത് മലബാര്‍ ഒരു സംസ്ഥാനമാക്കണം എന്ന അവരുടെ അടുത്ത ആവശ്യമാണ്. ഒപ്പം ജില്ല വിഭജിച്ച് അവര്‍ പറയും പോലെ രണ്ടു ജില്ലകള്‍ സൃഷ്ടിക്കണമെന്ന വാദവും. ഇപ്പോള്‍ കേള്‍ക്കുന്നത് മലപ്പുറം ജില്ലയിലെ നാല് നഗരസഭകളും ഒട്ടേറെ പഞ്ചായത്തുകളും കൂട്ടിചേര്‍ത്ത് തങ്ങള്‍ക്ക് ഭരണം നടത്താന്‍ ഒരു കോര്‍പ്പറേഷന്‍ രൂപീകരിക്കണമെന്ന പുതിയ വാദമാണ്. അടുത്ത വര്‍ഷം നടക്കാനിരിക്കുന്ന തദ്ദേശ ഭരണ സ്ഥാപനങ്ങളിലേക്കുള്ള തെരഞ്ഞെടുപ്പിനു മുമ്പ് പല പഞ്ചായത്തുകളും വിഭജിക്കണം. ഒട്ടേറെ മുനിസിപ്പാലിറ്റികള്‍ രൂപീകരിക്കണം എന്നു തുടങ്ങിയ വാദങ്ങളും പല കോണുകളില്‍ നിന്നും ഉയര്‍ന്നു വരുന്നതായി കാണുന്നു. എല്ലാറ്റിന്റെയും പിന്നില്‍, എല്ലാം തങ്ങളുടെ കയ്യില്‍ ഒതുങ്ങണം, സ്വന്തമായി ലീഗിനും ഒരു കോര്‍പ്പറേഷന്‍ വേണം എന്നിങ്ങനെയുള്ള അത്യാഗ്രഹങ്ങള്‍ മാത്രമാണ്. മേല്‍പറഞ്ഞ എല്ലാ കാര്യങ്ങളും നടപ്പിലാക്കണമെങ്കില്‍ അതിനു മുമ്പേ നടക്കേണ്ട നയപരമായ ചര്‍ച്ചകളും തീരുമാനങ്ങളുമുണ്ട്. ആവശ്യമായ പഠനമുണ്ട്. നിയമപരമായ തടസ്സങ്ങളോ ഭരണഘടനാപരമായ പ്രതിബന്ധങ്ങളോ ഉണ്ടോ എന്ന അന്വേഷണവും വേണ്ടതുണ്ട്. എന്നാലിവിടെ ലീഗിന്റെ കാര്യത്തില്‍ അങ്ങനെയൊന്നും ഒരു നിര്‍ബന്ധവും ഇല്ല. &ഹറൂൗീ;ഉണ്ടിരിക്കണ നായര്‍ക്ക് ഒരു വിളി തോന്നി&ൃറൂൗീ; എന്നു പറഞ്ഞു കേട്ടിട്ടുണ്ട്. അതുപോലെ, തങ്ങള്‍ക്കു തോന്നിയാല്‍ മതി. മറ്റെല്ലാം കൂടെ വരും എന്നാണവരുടെ ധാരണ. വാര്‍ഡുകളുടെ പുനര്‍വിഭജനം 20 വര്‍ഷക്കാലത്തേക്കു വേണ്ടതില്ല എന്ന ഒരു സര്‍ക്കാര്‍ തീരുമാനം നിലവിലുണ്ട്. അത് എപ്പോള്‍ മാറ്റി, ആരു മാറ്റിയെന്നൊന്നും ആര്‍ക്കും അറിയില്ല. എന്നാല്‍ എല്ലാം തീരുമാനിക്കപ്പെട്ടുവെന്ന നിലയ്ക്കാണ് ഇപ്പോള്‍ കാര്യങ്ങളുടെ പോക്ക്. കോര്‍പ്പറേഷന്‍ രൂപീകരണത്തിന്റെ കാര്യമാണെങ്കില്‍, മലപ്പുറമല്ല ആദ്യം പരിഗണിക്കപ്പെടേണ്ടത്. നിയമപരമായും മാനദണ്ഡങ്ങളനുസരിച്ചും ആദ്യം പരിഗണിക്കപ്പെടേണ്ട മറ്റൊട്ടേറെ നഗരസഭകള്‍ കേരളത്തിലുണ്ട്. വളര്‍ന്നു വരുന്ന ഗ്രാമങ്ങളുടെയും കര്‍ഷക  കര്‍ഷക തൊഴിലാളി ജനവിഭാഗങ്ങളുടെയും പ്രശ്നങ്ങള്‍ സംബന്ധിച്ചും നിലവിലുള്ള മാനദണ്ഡങ്ങള്‍ അനുസരിച്ച് മലപ്പുറത്തിന് കോര്‍പ്പറേഷന്‍ ആകണമെങ്കില്‍ ഒട്ടേറെ തടസങ്ങള്‍ ഉണ്ട്. എന്നാല്‍ അതൊന്നും ലീഗിന് പ്രശ്നമല്ല. ഭരണഘടന, നിയമങ്ങള്‍, കീഴ്-വഴക്കങ്ങള്‍, മാനദണ്ഡങ്ങള്‍ എന്നിവയൊന്നുംതന്നെ ലീഗിന്റെ ആഗ്രഹ സാഫല്യത്തിനു തടസമായിക്കൂടാ എന്നാണ് അവരുടെ നിലപാട്. അല്ലെങ്കില്‍ എങ്ങനെ ഇത്തരത്തില്‍ ഏകപക്ഷീയമായി മുന്നോട്ടു പോകാന്‍ അവര്‍ ധൈര്യപ്പെടും? ഭരണ മുന്നണിയില്‍ സ്വന്തമായി 20 എംഎല്‍എമാര്‍ ഉണ്ട് എന്ന ഹുങ്കും എന്തുതന്നെ സംഭവിച്ചാലും മുഖ്യമന്ത്രി ഉമ്മന്‍ചാണ്ടി തങ്ങളുടെ രക്ഷയ്ക്ക് എത്തും എന്ന വിശ്വാസവുമാണ് ഇങ്ങനെ ഏക പക്ഷീയമായ നിലപാടുകള്‍ സ്വീകരിക്കാന്‍ ലീഗിന് ധൈര്യം നല്‍കുന്നത്. ഏതായാലും ഇന്ത്യന്‍ യൂണിയന്‍ മുസ്ലിം ലീഗ് ഇപ്പോള്‍ അതിയായ ആത്മവിശ്വാസത്തിലാണ്. ഇക്കഴിഞ്ഞ ലോക്സഭാ തിരഞ്ഞെടുപ്പില്‍ ഇന്ത്യന്‍ നാഷണല്‍ കോണ്‍ഗ്രസും സിപിഐ എമ്മുമുള്‍പ്പടെയുള്ള പ്രധാന രാഷ്ട്രീയ പാര്‍ട്ടികള്‍ക്ക്, സാരമായ ക്ഷീണം സംഭവിച്ചപ്പോള്‍, തങ്ങളുടെ കോട്ടകൊത്തളങ്ങള്‍ക്ക് ഒരു പരുക്കുമേല്‍ക്കാതെ പിടിച്ചുനിന്നുവെന്നാണ് അവര്‍ ഊറ്റം കൊള്ളുന്നത്. ഒറ്റ നോട്ടത്തില്‍ ഇതു ശരിയാണ് എന്നു തോന്നാം. പക്ഷേ സൂക്ഷ്മമായി വിശകലനം നടത്തിയാല്‍ അത് അര്‍ധ സത്യം മാത്രമാണ് എന്നു കാണാം. തങ്ങളുടെ നേട്ടം എന്നവര്‍ ചിന്തിക്കുന്ന ഈ അവസ്ഥ തന്നെ യഥാര്‍ഥത്തില്‍ ആര്‍എസ്എസിന്റെയും ബിജെപിയുടെയും (നരേന്ദ്രമോഡിയുടെ)യും പരോക്ഷ സംഭാവനയാണ്. യഥാര്‍ഥത്തില്‍ ലീഗ് മത്സരിച്ച രണ്ടു മണ്ഡലങ്ങളിലും, അവര്‍ക്കു നേട്ടമുണ്ടായി എന്നു പറയാന്‍ വയ്യ. കേവലം 31 ശതമാനം മാത്രം വോട്ടു നേടി ജയിച്ച നരേന്ദ്രമോഡിക്ക് 282 എം.പി.മാരെ ജയിപ്പിക്കാന്‍ സാധിച്ചുവെന്നു പറയുമ്പോള്‍, അതിലെ ജനാധിപത്യം; എത്രമാത്രം വിരോധാഭാസമാണ് എന്ന് ആര്‍ക്കും മനസിലാക്കാം. ഏതാണ്ട് അതുപോലെതന്നെയാണ് ലീഗിന്റെയും &ഹറൂൗീ;വിജയരഹസ്യം. ലീഗ് മത്സരിച്ച പൊന്നാനി മണ്ഡലത്തില്‍ ഇത്തവണ 1,79,000 വോട്ടര്‍മാരാണ് എണ്ണത്തില്‍ വര്‍ധിച്ചത്. വോട്ടു ചെയ്തവരുടെ എണ്ണവും 2009നെ അപേക്ഷിച്ച് 70000ത്തോളം വര്‍ധിച്ചു. ലീഗ് വോട്ടര്‍മാര്‍ മുഴുവന്‍ പോളിങ് ബൂത്തിലെത്താന്‍ താല്‍പര്യം കാണിച്ചില്ല എന്നാണ്, അതു നല്‍കുന്ന സൂചന. വോട്ടിങ് 2009ല്‍ 76.67 ശതമാനമായിരുന്നു. 2014ല്‍ 73.83 ശതമാനവും. തന്നെയുമല്ല 70,000ത്തോളം പേര്‍ ഇത്തവണ അധികം വോട്ടു ചെയ്തപ്പോള്‍ ലീഗിന്റെ സ്ഥാനാര്‍ഥി, പ്രമുഖനായ ഇ.ടി.മുഹമ്മദ് ബഷീറിന് 2009ല്‍ കിട്ടിയ വോട്ടുപോലും നേടാനായില്ല. അന്നത്തേതില്‍ നിന്നും എണ്ണായിരത്തോളം വോട്ടു കുറയുകയാണുണ്ടായത്. അദ്ദേഹത്തെ എതിര്‍ത്ത എല്‍.ഡി.എഫ്. സ്ഥാനാര്‍ഥി വി.അബ്ദുറഹിമാന്‍ 2009ല്‍ എല്‍.ഡി.എഫിനു കിട്ടിയ വോട്ടിനെക്കാള്‍ അമ്പതിനായിരത്തോളം വോട്ട് അധികം നേടി. ലീഡ് ആകട്ടെ എണ്‍പത്തയ്യായിരത്തില്‍ നിന്നും കേവലം ഇരുപത്തയ്യായിരമായി കുറയുകയും ചെയ്തു. ലീഗിന്റെ കോട്ടയാണ് എന്നവകാശപ്പെടുന്ന മലപ്പുറം മണ്ഡലത്തിലും സ്ഥിതി വ്യത്യസ്തമല്ല. അവിടെ ഇത്തവണ ഒരു ലക്ഷത്തി എണ്‍പത്തിമൂവായിരത്തോളം പുതിയ വോട്ടര്‍മാര്‍ അധികമായുണ്ടായിരുന്നു. വോട്ടിംഗ് ശതമാനം അവിടെയും കുറവായിരുന്നു. 2009നെ അപേക്ഷിച്ച് 5.3ശതമാനം കുറവ്, വോട്ടര്‍മാര്‍ കാണിച്ച നിസ്സംഗത നേട്ടമാണെന്നവകാശപ്പെടാന്‍ ലീഗിനസാധ്യമാണ്. ഇത്തവണ കൂടുതലായി വോട്ടു ചെയ്ത ഒരു ലക്ഷത്തോളം പേരില്‍ കേവലം പതിനായിരത്തില്‍ താഴെ വോട്ടര്‍മാര്‍ മാത്രമാണ്, ലീഗിന്റെ സ്ഥാനാര്‍ഥി ഇ.അഹമ്മദിന് വോട്ട് ചെയ്തത്. അദ്ദേഹത്തിന്റെ ലീഡ് ഒരു ലക്ഷത്തി പതിനഞ്ചായിരത്തില്‍ നിന്നും ഒരു ലക്ഷത്തി തൊണ്ണൂറ്റി നാലായിരം ആയി വര്‍ധിച്ചത്, കൂടുതല്‍ വോട്ട് നേടിയതുകൊണ്ടല്ല മറിച്ച് എല്‍ഡിഎഫ് സ്ഥാനാര്‍ഥി ഒരു മുസ്ലിം വനിതയായിരുന്നു എന്നതുപയോഗപ്പെടുത്തി മതത്തിലും മതവിശ്വാസത്തിലും ഊന്നി, ലീഗും എസ്ഡിപിഐ, വെല്‍ഫെയര്‍ പാര്‍ട്ടി എന്നീ മതമൗലികവാദ സംഘടനകളും ചേര്‍ന്ന് നടത്തിയ ദുഷ്പ്രചരണത്തില്‍ കുടുങ്ങി, ഒരു വിഭാഗം എല്‍.ഡി.എഫ്. വോട്ടര്‍മാരടക്കം വോട്ടുചെയ്യാതെ വിട്ടുനിന്നതിനാലാണ്. അഖിലേന്ത്യാതലത്തില്‍ നരേന്ദ്രമോഡിയും ആര്‍.എസ്.എസ് നയിക്കുന്ന ബി.ജെ.പി.യും നടത്തിയ അതേരീതിയിലുള്ള മതാവേശവും മത വിദ്വേഷവും ഇളക്കി വിടുന്ന ഭജാലവിദ്യ  അതേ അടവുനയം അതുതന്നെയാണ് ഇവിടെയും കണ്ടത്. ലീഗ് ഉള്‍പ്പെടുന്ന യു.ഡി.എഫിന് 12 സീറ്റ് നേടി, മാനവും ഭരണവും നിലനിര്‍ത്താന്‍ സാധിച്ചത് നരേന്ദ്രമോഡി അധികാരത്തില്‍ വരാനിടയുണ്ട് എന്ന ഭയം കാരണം കേരളത്തിലെ മുസ്ലിം  ക്രിസ്ത്യന്‍ ന്യൂനപക്ഷ മതവിഭാഗത്തില്‍പ്പെട്ടവര്‍ അധികവും യു.ഡി.എഫിന് വോട്ടുചെയ്തതിനാലാണ്. ലീഗിന് ഈ വിജയത്തില്‍ ഒട്ടും തന്നെ അഭിമാനിക്കാനില്ല. നരേന്ദ്ര മോഡിക്കും ബി.ജെ.പി.ക്കും എതിരെ അവര്‍ ഉന്നയിക്കുന്ന എല്ലാ ആക്ഷേപവും ഇവിടെ അവര്‍ക്കെതിരെ തിരിഞ്ഞു കുത്തുകയാണ്. രാമക്ഷേത്രം നിര്‍മിക്കണമെന്നും യൂണിഫോം സിവില്‍കോഡ് നടപ്പിലാക്കണമെന്നും ഗോവധം നിരോധിക്കണമെന്നും 370ാം വകുപ്പ് എടുത്തുകളയണമെന്നും ഒക്കെ ആര്‍.എസ്.എസും ബി.ജെ.പി.യും ആവശ്യപ്പെടുന്നത് നാളെ തന്നെ അതെല്ലാം നടപ്പാക്കാന്‍ കഴിയും എന്ന തെറ്റിദ്ധാരണകൊണ്ടല്ല. മഹാഭൂരിപക്ഷം വരുന്ന ഹിന്ദുക്കള്‍ അധിവസിക്കുന്ന ഇന്ത്യയില്‍ ഭൂരിപക്ഷം വോട്ടര്‍മാരുടെ പിന്തുണ നേടാന്‍ അതുവഴി കഴിയും എന്ന വിശ്വാസം മൂലമാണ് അവര്‍ ആ മുദ്രാവാക്യം ഉയര്‍ത്തുന്നത്. ന്യൂനപക്ഷ വിഭാഗത്തെ, വിശേഷിച്ച് മുസ്ലിങ്ങളെ ശത്രുപക്ഷത്ത് നിര്‍ത്തി ദുഷ്പ്രചരണം നടത്തിയാല്‍ ജര്‍മനിയില്‍ ജൂതര്‍ക്കെതിരെ അക്രമം അഴിച്ചുവിട്ടു ഭൂരിപക്ഷ പിന്തുണ നേടാന്‍ ഹിറ്റ്ലര്‍ക്കു സാധിച്ചതുപോലെ ഇവിടെയും സാധ്യമാകും എന്നതാണ് ആര്‍.എസ്.എസിന്റെ ഉള്ളിലിരുപ്പ്. അവരുടെ ലക്ഷ്യം രാഷ്ട്രീയ അധികാരമാണ്. അതിനുള്ള കുറുക്കുവഴിമാത്രമാണ് അവര്‍ക്ക് ഹിന്ദുത്വവാദം. അവര്‍ ഒരിക്കലും മഹാത്മാ ഗാന്ധിയെപ്പോലെ സനാതന ഹിന്ദുത്വത്തേയോ അതല്ലെങ്കില്‍ സ്വാമി വിവേകാനന്ദനപോലെ മഹത്തായ ഹൈന്ദവ സംസ്കാരത്തെയോ പ്രതിനിധാനം ചെയ്യുന്നില്ല. മതമൗലികവാദം ഉയര്‍ത്തുന്ന, വര്‍ഗ്ഗീയത പ്രചരിപ്പിച്ച് സമൂഹത്തില്‍ വിദ്വോഷം പ്രചരിപ്പിക്കുന്നു, ന്യൂനപക്ഷ മതവിഭാഗങ്ങളെ ഒറ്റപ്പെടുത്താന്‍ ശ്രമിക്കുന്ന വര്‍ഗ്ഗീയ കലാപങ്ങള്‍ സൃഷ്ടിച്ച് ശാന്തിയും സമാധാനവും നശിപ്പിക്കുന്നുവെന്നല്ലാം ലീഗ് ആര്‍.എസ്.എസിനേയും ബി.ജെ.പി.യേയും ചൂണ്ടി കുറ്റപ്പെടുത്തുമ്പോള്‍ അവര്‍ സ്വയം വിസ്മരിക്കുന്നത് തങ്ങള്‍ ചെയ്യുന്നതും അതെ മഹാപരാധമാണ് എന്ന സത്യമാണ്. ഇന്ത്യാ വിഭജനത്തിനു കാരണക്കാര്‍ അന്നത്തെ ജിന്നാ സാഹിബിന്റെ ലീഗാണ്. അധികാര നഷ്ടം ഭയന്ന ബ്രിട്ടീഷ് ഗവണ്‍മെന്റിന്റെ കയ്യില്‍കളിക്കുകയായിരുന്നു അവര്‍. മഹാത്മാ ഗാന്ധിയുടെ ശക്തമായ എതിര്‍പ്പിനെ മറികടന്ന് അധികാര ദുര മൂത്ത ഇന്ത്യന്‍ നാഷണല്‍ കോണ്‍ഗ്രസ് അതിനു കൂട്ടുനിന്നു. ഇന്ത്യ വെട്ടിമുറിച്ച്, പാകിസ്താന്‍ വിഭജിച്ച് പോയാല്‍, ശേഷമുള്ള ഇന്ത്യയില്‍ ഹിന്ദുരാഷ്ട്രം സ്ഥാപിക്കാം, പതുക്കെ അധികാരം കയ്യടക്കാം എന്നതായിരുന്നു ഹിന്ദുമഹാസഭയുടെയും ആര്‍എസ്എസിന്റെയും മറ്റും മനസ്സിലിരുപ്പ്. ഇന്ത്യാ വിഭജനം സംഭാവന ചെയ്ത മഹാദുരന്തം, ഇന്ന് നമുക്കൊക്കെ ആലോചിക്കാന്‍ പോലും കഴിയുന്നതിനും അപ്പുറമാണ്. ആയിരക്കണക്കിനാളുകള്‍ കൊല്ലപ്പെട്ടു. പതിനായിരക്കണക്കിന് സ്ത്രീകള്‍ക്ക് മാനവും ജീവനും നഷ്ടപ്പെട്ടു. രാജ്യത്തിന്റെ ഭാവി വാഗ്ദാനമാകേണ്ടിയിരുന്ന എത്രയോ കുഞ്ഞുങ്ങള്‍ക്ക് ജീവന്‍ നഷ്ടപ്പെട്ടു. അനേകം കുട്ടികളും സ്ത്രീകളും അനാഥരായി. ഒടുവില്‍ യുഗപുരുഷന്‍ എന്നുതന്നെ വിശേഷിക്കപ്പെടുന്ന, ഇന്ത്യയുടെ രാഷ്ട്രപിതാവ് മഹാത്മാഗാന്ധി തന്നെ ഒരു ഹിന്ദുമതഭ്രാന്തന്റെ കയ്യാല്‍ കൊല്ലപ്പെട്ടു. മതത്തിന്റെ പേരില്‍ രാഷ്ട്രീയം കൈകാര്യം ചെയ്യുകയും മതത്തിന്റെ പേരില്‍ രാഷ്ട്രീയ പാര്‍ട്ടി സംഘടിപ്പിക്കുകയും മതത്തിന്റെ പേരില്‍ രാഷ്ട്രത്തെ വെട്ടിമുറിച്ച് വേര്‍പിരിഞ്ഞു പോകുകയും ചെയ്ത, ആ ലീഗിന്റെ പൈതൃകം പേറുന്ന മറ്റൊരു ലീഗ് എന്ന നിലയിലാണ് പില്‍ക്കാലത്ത് ഇന്ത്യന്‍ യൂണിയന്‍ ലീഗ് മലബാറില്‍ പ്രവര്‍ത്തനം ആരംഭിച്ചത്. ഇപ്പോള്‍ ദശാബ്ദങ്ങള്‍ക്കു ശേഷം ആ പുതിയ ലീഗിന്റെ ശബ്ദവും ശൈലിയും രീതിയുമെല്ലാം ഓര്‍മപ്പെടുത്തുന്നത് പഴയ ജിന്നാ ലീഗിനെത്തന്നെയാണ്. ജിന്നയുടെ സ്വപ്നം സഫലമായില്ലയെന്നും ഇസ്ലാമിക രാജ്യമായ പാകിസ്താനില്‍ സ്വര്‍ഗം സൃഷ്ടിക്കപ്പെട്ടില്ല എന്നും നമുക്കറിയാം. അതിന്റെ സ്ഥാപകനായ ജിന്നാ സാഹിബ് തന്നെ തനിക്കു പറ്റിയ തെറ്റില്‍ പിന്നീട് പശ്ചാത്തപിക്കുകയുമുണ്ടായി. ഇന്ത്യാ ഉപഭൂഖണ്ഡം അന്നു വെട്ടിമുറിക്കപ്പെട്ടിട്ടില്ലായിരുന്നുവെങ്കില്‍ ഒരുപക്ഷേ ഇന്ന് ചൈനയെപോലെ ശക്തമായ മറ്റൊരു രാഷ്ട്രമായി മാറാന്‍ നമുക്ക് കഴിയുമായിരുന്നു. ഏതാണ്ട് തുല്യരെന്ന നിലയില്‍ ഹിന്ദുക്കളും മുസ്ലീങ്ങളും ഇടകലര്‍ന്നു ജീവിക്കുന്ന ശക്തമായ ഒരു രാഷ്ട്രമായി മാറാന്‍ നമുക്ക് കഴിയുമായിരുന്നു. ആ സാധ്യതകളൊക്കെ തകര്‍ത്തു കളഞ്ഞത് ഇന്ത്യാ വിഭജനമാണ്. അതിനു കാരണക്കാര്‍ ജിന്നാ ലീഗും കോണ്‍ഗ്രസുമാണ്. എന്നിട്ടും അതേ പൊളിഞ്ഞുപാളീസായ നയം  മതാടിസ്ഥാനത്തില്‍ രാഷ്ട്രീയ പാര്‍ട്ടി സംഘടിപ്പിച്ച് രാഷ്ട്രീയാധികാരം കയ്യടക്കാന്‍ ശ്രമിക്കുന്ന അതേ ഹീനമായ രാഷ്ട്രീയ നയമാണ് ലീഗ് ഇപ്പോഴും കൈകാര്യം ചെയ്യുന്നത്. മുസ്ലീങ്ങള്‍ക്കാകെ ഒരു പാര്‍ട്ടി, എല്ലാ മുസ്ലീങ്ങളും യൂണിയന്‍ ലീഗില്‍, മുസ്ലീങ്ങളുടെ രക്ഷയ്ക്ക് ഇന്ത്യന്‍ യൂണിയന്‍ ലീഗ് മാത്രം എന്നെല്ലാം അവര്‍ പറയുമ്പോള്‍, എഴുതുമ്പോള്‍, പ്രചരിപ്പിക്കുമ്പോള്‍ സ്വയമറിയാതെ അതിന്റെ അനുരണനം മറുഭാഗത്തുമുണ്ടാകുന്നുവെന്നത് അവര്‍ക്ക് കാണാന്‍ കഴിയുന്നില്ല. അതുവഴി അവര്‍ ചെയ്യുന്നത്, ഹിന്ദുക്കളെയാകെ ഒരു പാര്‍ട്ടിയില്‍ സംഘടിപ്പിക്കുക, ഹിന്ദുരാഷ്ട്രം സ്ഥാപിക്കുക എന്ന ആര്‍.എസ്.എസ്.  ബി.ജെ.പി. നിലപാടിന് അംഗീകാരം നല്‍കുകയാണ്. ലീഗ് ഈ നിലപാട് മാറ്റണം. എന്നിട്ടുമതി ആര്‍.എസ്.എസിനെയും ബി.ജെ.പി.യേയും ഒരു നയമെന്ന നിലയില്‍തന്നെ വിട്ടുവീഴ്ചയില്ലാതെ എതിര്‍ക്കുന്ന സിപിഐ എമ്മിന്റെ ദുരവസ്ഥ&ൃറൂൗീ;ചൂണ്ടിക്കാട്ടി പരിതപിക്കാന്‍. യഥാര്‍ഥത്തില്‍ ഇവിടെ കേരളത്തിലെങ്കിലും ഇത്തവണ സി.പി.ഐ.എമ്മിനു ഒരു പോറല്‍പോലും ഏറ്റിട്ടില്ല. 2009ല്‍ നാലു സീറ്റാണുണ്ടായിരുന്നതെങ്കില്‍ അത് ഇരട്ടിയാക്കാന്‍ 2014ല്‍ സാധിച്ചിട്ടുണ്ട്. സീറ്റു മാത്രമല്ല വോട്ടും വര്‍ധിച്ചിട്ടുണ്ട്. ഇത്തവണ അധികാരത്തില്‍ വന്ന ശേഷം ലീഗ് കാട്ടിക്കൂട്ടിയ കോപ്രായങ്ങള്‍ കേരളീയ സമൂഹത്തെ ഭിന്നിപ്പിക്കുകയാണ് ചെയ്തത്. അഞ്ചാം മന്ത്രി സ്ഥാനത്തിനു വേണ്ടി അവര്‍ കാട്ടിക്കൂട്ടിയ കോപ്രായങ്ങളും അതുനേടിയെടുത്ത ശേഷം നടത്തിയ അഹങ്കാരം നിറഞ്ഞ പ്രസ്താവനകളും മറ്റെല്ലാ പാര്‍ട്ടികളിലും സമുദായങ്ങളിലും സൃഷ്ടിച്ച രോഷം വളരെ വലുതാണ് എന്ന് എന്തുകൊണ്ടാണവര്‍ക്ക് കാണാന്‍ കഴിയാത്തത് ? കാസര്‍കോട് വെടിവെപ്പിനെക്കുറിച്ച് അന്വേഷണം നടത്താന്‍ നിയോഗിച്ച ജുഡീഷ്യല്‍ കമ്മീഷന്‍ അന്തിമയാമത്തില്‍ പിരിച്ചുവിട്ടതും മാറാട് സി.ബി.ഐ. അന്വേഷണം തടസ്സപ്പെടുത്തിയതും നാദാപുരം ബോംബ് സ്ഫോടന കേസ് അധികാരം ഉപയോഗിച്ച് അട്ടിമറിച്ചതും കുനിയിലെ ഇരട്ടക്കൊലക്കേസില്‍ പ്രതിയായ എം.എല്‍.എ. പി.കെ. ബഷീറിന്റെ അറസ്റ്റ് തടഞ്ഞതും കോഴിക്കോട് യൂണിവേഴ്സിറ്റിയുടെ പൊന്നുംവില കിട്ടേണ്ട ഭൂമി ലീഗ് പ്രസിഡന്റിന്റെയും രണ്ട് മന്ത്രിമാരുടെ ബന്ധുക്കളുടെയും പേരില്‍ ചാര്‍ത്തിക്കൊടുത്തതും അധികാര ദുര്‍വിനിയോഗമല്ലേ?. ഇപ്പോഴും അതല്ലേ തുടരുന്നത്. ആവശ്യമായ വിദ്യാഭ്യാസ യോഗ്യതപോലുമില്ലാത്ത പാര്‍ശ്വവര്‍ത്തികളെ യൂണിവേഴ്സിറ്റികളില്‍ വൈസ് ചാന്‍സലര്‍മാരാക്കി അവരെ ഉപയോഗപ്പെടുത്തി യൂണിവേഴ്സിറ്റികളിലെ ജനാധിപത്യ സംവിധാനവും അക്കാദമിക് സ്വാതന്ത്യവും അട്ടിമറിക്കുക, സ്വന്തക്കാര്‍ക്കും ബന്ധുക്കള്‍ക്കും പണമുണ്ടാക്കാന്‍ സ്വാശ്രയ സ്ഥാപനങ്ങളും കോഴ്സുകളും വാരിക്കോരികൊടുക്കുക, ഉന്നത വിദ്യാഭ്യാസ മേഖലയില്‍ അരാജകത്വം സൃഷ്ടിക്കുക, സര്‍ക്കാര്‍ വിദ്യാലയങ്ങളിലെയും എയ്ഡഡ് സ്ഥാപനങ്ങളിലെയും അധ്യാപകരുടെ ജീവിതം കൊണ്ട് പന്തു തട്ടുക എന്നിങ്ങനെ അവര്‍ കൈകാര്യം ചെയ്യുന്ന വകുപ്പുകളിലെ ദുര്‍ഭരണം, കേരളീയ സമൂഹത്തില്‍ മുമ്പൊരിക്കലുമുണ്ടായിട്ടില്ലാത്ത രീതിയില്‍ വിഭജനമുണ്ടാക്കുന്നു, വെറുപ്പുളവാക്കുന്നുവെന്ന് നിര്‍ഭാഗ്യവശാല്‍ അവര്‍ക്ക് കാണാന്‍ കഴിയുന്നില്ല. മോഡിയുടെ അരങ്ങേറ്റം അസാധാരണമായ ഒരു പുതിയ സാഹചര്യം രാജ്യത്ത് സൃഷ്ടിച്ചിട്ടുണ്ടെന്ന് അവര്‍ മനസ്സിലാക്കേണ്ടതുണ്ട്. നരേന്ദ്ര മോഡിക്ക് കേരളത്തിലും ചെറിയതോതില്‍ സ്വീകാര്യതയുണ്ടാക്കിയതില്‍ തങ്ങള്‍ക്കുള്ള പങ്ക് അവര്‍ തിരിച്ചറിയണം. ശിവഗിരിയിലും എറണാകുളത്തെ ദളിതരുടെ മഹാസംഗമത്തിലും നരേന്ദ്ര മോഡി പ്രധാന അതിഥിയായെത്തിയത് ലീഗ് ഉയര്‍ത്തിവിട്ട രോഷവും അതൃപ്തിയും തെറ്റായ വഴിയിലൂടെ നീങ്ങാന്‍ ഈഴവ  നായര്‍ സാമുദായിക സംഘടനകളെ പ്രേരിപ്പിച്ചതിനാലാണ്. എല്ലാ ആക്ഷനും ഒരു റിയാക്ഷന്‍ ഉണ്ടാകും എന്ന്, ഈ വൈകിയ വേളയിലെങ്കിലും ലീഗ് തിരിച്ചറിയേണ്ടതുണ്ട്. മതേതര പാര്‍ട്ടികളെ പ്രോത്സാഹിപ്പിക്കുകയും മതത്തിന്റെയും ജാതിയുടെയും അടിസ്ഥാനത്തില്‍ രാഷ്ട്രീയം കൈകാര്യം ചെയ്തുകൂടാ എന്ന് നിഷ്കര്‍ഷിക്കുകയുമാണ് എല്ലാ ന്യൂനപക്ഷ വിഭാഗങ്ങളും ചെയ്യേണ്ടത്. ഇന്ത്യപോലുള്ള ഒരു അര്‍ധഫ്യൂഡല്‍ സമൂഹത്തില്‍ ഇപ്പോഴും ജാതിയുടെയും മതത്തിന്റെയും സ്വാധീനം അളവറ്റതാണ്. ഇത് ഇളക്കിവിട്ടാല്‍ ജനങ്ങള്‍ മറ്റെല്ലാം മറക്കും. മറ്റെല്ലാം മറന്ന് ഹിന്ദുക്കളെല്ലാം ബാബറിമസ്ജിദ് പൊളിച്ച് രാമക്ഷേത്രം പണിയാന്‍ തങ്ങള്‍ക്കൊപ്പം നില്‍ക്കണമെന്ന് ആവശ്യപ്പെട്ടാണ് എല്‍ കെ അദ്വാനി രഥയാത്ര നയിച്ചത്. അത് ഉളവാക്കിയ സ്വാധീനവും സംഭാവന ചെയ്ത മഹാദുരന്തവും അന്നു ബിജെപിക്ക് അനുഗ്രഹമാവുകയാണ് ചെയ്തത്. അവര്‍ അധികാരത്തിന്റെ അയലത്തുവരെയെത്തി. എന്നാല്‍ ആ ഇടയ്ക്ക് വി പി സിങ് മണ്ഡല്‍ കമ്മീഷന്‍ റിപ്പോര്‍ട്ട് നടപ്പിലാക്കാന്‍ തീരുമാനിച്ചതോടെ ആ ഹിന്ദു ഐക്യം തകര്‍ന്നു. ഉത്തരേന്ത്യയിലാകെ ഉദയം ചെയ്ത ജാതി രാഷ്ട്രീയ പാര്‍ട്ടികളാണ് യഥാര്‍ഥത്തില്‍ അദ്വാനിയുടെ യാഗാശ്വത്തെ പിടിച്ചുകെട്ടിയത്. എന്നാലിപ്പോള്‍ അന്തര്‍ദേശീയധനമൂലധനവും ഇന്ത്യയിലെ ആര്‍.എസ്.എസ്.പരിവാരവും സന്ധിചെയ്തിരിക്കുകയാണ്. വന്‍കിട ബൂര്‍ഷ്വാസിയുടെ പണവും ആധുനിക മാനേജ്മെന്റ് സംവിധാനവും മീഡിയപവറും മണിപവറും ആര്‍.എസ്.എസിന്റെ മസില്‍പവറും ഒന്നു ചേര്‍ന്നിരിക്കുന്നതായാണ് നാം കാണുന്നത്. സ്വാതന്ത്ര്യലബ്ധിയ്ക്ക് മുമ്പേ മുതല്‍ അവര്‍ ആഗ്രഹിച്ചതും, എന്നാല്‍ കൈവിട്ടുപോയതുമായ ഹിന്ദു രാഷ്ട്ര സ്ഥാപനമാണ് ആര്‍ എസ്എസിന്റെയും ബിജെപിയുടെയും ലക്ഷ്യം. തങ്ങള്‍ക്കാവശ്യമുള്ളതെല്ലാം കൈവിട്ടുനല്‍കാന്‍ സന്നദ്ധരായിരുന്നുവെങ്കിലും അതിനാവശ്യമായ തന്റേടവും സാമര്‍ഥ്യവും ഇച്ഛാശക്തിയും വേണ്ടത്ര ഇല്ലാതെ പോയതിനാല്‍ പരാജയപ്പെട്ട കോണ്‍ഗ്രസിനെയും മന്‍മോഹന്‍ സിംഗിനെയും അവര്‍ കൈവിട്ടു. ഇന്ത്യയിലെ വന്‍കിട ബൂര്‍ഷ്വാസിയും ധനമൂലധനവും ആവശ്യമുള്ളതെല്ലാം കൈനിറയെ നല്‍കാന്‍ കെല്‍പ്പും സാമര്‍ഥ്യവും നിശ്ചയദാര്‍ഢ്യവുമുള്ള നരേന്ദ്രമോഡിയേയും ബിജെപിയേയും ഇപ്പോള്‍ മുന്നോട്ടു കൊണ്ടുവന്നിരിക്കുകയാണ്. ഉള്ളതെല്ലാം കൈവിട്ടു പോകും മുമ്പ്, ആവശ്യമായ പ്രതിരോധ നിര സൃഷ്ടിക്കുവാന്‍ ഇന്ത്യയിലെ മതേതര വിശ്വാസികളും ന്യൂനപക്ഷമാകെയും ഒന്നിച്ചണിനിരന്ന് ഇന്ത്യയിലെ ജനകോടികളുടെ വിശ്വാസമാര്‍ജിച്ച് നാടിനെ രക്ഷിക്കുക എന്നതാണ് ഇന്ന് നമ്മുടെ പ്രഥമവും പ്രധാനവുമായ കര്‍ത്തവ്യം. അത് ഇപ്പോഴല്ലെങ്കില്‍ പിന്നീടൊരിക്കലും സാധ്യമാവുകയില്ല എന്നും എല്ലാവരും ഓര്‍ക്കേണ്ടതുണ്ട്. എന്നാല്‍ ഇന്ത്യന്‍ യൂണിയന്‍ മുസ്ലിം ലീഗിന് ഇക്കാര്യം ഇനിയും ബോധ്യമായതായി കാണുന്നില്ല. തങ്ങള്‍ ഭരിക്കുന്ന വിദ്യാഭ്യാസ വകുപ്പിനു കീഴിലെ എല്ലാ വിദ്യാലയങ്ങളിലും ബ്ലാക്ക് ബോര്‍ഡുമാറ്റി പകരം പച്ച ബോര്‍ഡുകള്‍ സ്ഥാപിക്കാന്‍ അവരിപ്പോള്‍ ശ്രമം തുടങ്ങിയിട്ടുണ്ട്. പച്ചയോടുള്ള അവരുടെ പ്രേമം, പ്രകൃതിയോടുള്ള സ്നേഹം കൊണ്ടോ ആദരവു മൂലമോ അല്ല. ഏതാണ്ട് ഒരു മത ചിഹ്നം പോലെയാണ് അവരിപ്പോള്‍ പച്ചയും കൊണ്ടു നടക്കുന്നത്. അരീക്കോട് സുല്ല മുസല്ലാം ഓറിയന്റല്‍ ഹയര്‍ സെക്കന്‍ഡറി സ്കൂളിലെ അധ്യാപികമാരോട് പച്ച കോട്ട് ധരിക്കാനാവശ്യപ്പെട്ടതും നടപ്പിലാക്കാത്തതിന്റെ പേരില്‍ ഒരു അധ്യാപികയ്ക്കെതിരെ നടപടി എടുത്ത സംഭവവും എറണാകുളത്തു നടന്ന ഒരു പൊതു ചടങ്ങളില്‍ എല്ലാ അധ്യാപികമാരോടും പച്ച ബ്ലൗസ് ധരിച്ചുവരാന്‍ ആവശ്യപ്പെട്ടു കൊണ്ട് എസ്.എസ്.എ. പ്രോഗ്രാം ഓഫീസര്‍ സര്‍ക്കുലര്‍ നല്‍കിയ സംഭവവും എത്ര വലിയ വിവാദമാണുണ്ടാക്കിയത് എന്ന് ഓര്‍ക്കേണ്ടതായിരുന്നു. മഹാഭൂരിപക്ഷം വരുന്ന ലീഗുകാരല്ലാത്ത മുസ്ലീങ്ങള്‍ ലീഗിന്റെ അന്തസ്സാര ശൂന്യമായ ഇത്തരം അബദ്ധ ധാരണകളെയും അതിന്റെ അടിസ്ഥാനത്തില്‍ അവരുണ്ടാക്കുന്ന പ്രകോപനങ്ങളേയും ഒട്ടും തന്നെ അംഗീകരിക്കുന്നില്ലെന്നതാണ് വാസ്തവം. എന്നാല്‍ കേരളീയ സമൂഹത്തില്‍ ഇതെല്ലാമുണ്ടാക്കുന്ന അപസ്വരങ്ങളും സംഘര്‍ഷങ്ങളും ആര്‍.എസ്.എസിനും ബിജെപിക്കും അനുകൂലമായ അന്തരീക്ഷമാണ് സൃഷ്ടിക്കുന്നത്. ലീഗ് ചെയ്തു കൂട്ടുന്ന ഇത്തരം വങ്കത്തങ്ങള്‍ കേരളത്തില്‍ മുമ്പില്ലാത്ത വിധം, ഒരു തരം മുസ്ലിം വിരോധം രൂപപ്പെട്ടു വരുന്നതിന് കാരണമായിട്ടുണ്ട്. കഴിഞ്ഞ ദിവസം 29.06.2014നു പുറത്തിറങ്ങിയ ചന്ദ്രിക ദിനപത്രത്തിലെ മുഖ പ്രസംഗം തന്നെ ഇക്കാര്യം സമ്മതിക്കുന്നുണ്ട്. ചന്ദ്രിക പറയുന്നു, കേരളത്തില്‍ മുസ്ലീങ്ങളുമായി ബന്ധപ്പെട്ട കാര്യങ്ങളിലെല്ലാം സാമാന്യമായി ഒരു പൊതുബോധം രൂപപ്പെട്ടുവരുന്നുണ്ട്. അവര്‍ നടത്തുന്ന ഏത് ഇടപാടിലും അവിഹിതമായ എന്തെല്ലാമോ സംഗതികളുടെ സാന്നിധ്യമുണ്ട് എന്നാണ് ഈ പൊതുബോധം അനുശാസിക്കുന്നത്. മുസ്ലീം ലീഗ് കൈകാര്യം ചെയ്യുന്ന വിദ്യാഭ്യാസ വകുപ്പിനെപ്പറ്റി പറയുമ്പോഴേക്കും പൊതുബോധത്തിലെ ഈ ചൊറിപ്പാട് തിണര്‍ത്തു വരും. എന്നാല്‍ ഇത്രയും പറഞ്ഞിട്ട് അതെല്ലാം തങ്ങളല്ലാത്ത വേറെ ചിലരുടെ കുറ്റം കൊണ്ടാണ് എന്നു സ്ഥാപിക്കാനാണ് അവര്‍ക്ക് വ്യഗ്രത. മുസ്ലീം ലീഗില്‍ വിവേകം നഷ്ടപ്പെട്ടിട്ടില്ലാത്ത ആരെങ്കിലുമൊക്കെ ഉണ്ടെങ്കില്‍ അവര്‍ മുന്നിട്ടിറങ്ങി ലീഗിനെ നേര്‍വഴിക്കു നയിക്കാന്‍ ശ്രമിക്കണം. മതസൗഹാര്‍ദത്തിനു കേളി കേട്ട കേരളീയ സമൂഹത്തില്‍ എങ്ങനെ അവര്‍ പറയുംപോലെ മുസ്ലീങ്ങള്‍ക്കെതിരെ ഇങ്ങനെ ഒരു പൊതുബോധം സൃഷ്ടിക്കപ്പെട്ടുവെന്നതിനെ കുറിച്ചു അവര്‍ ഗവേഷണം നടത്തണം. ഒരു കാര്യം ഉറപ്പ്. മുസ്ലീങ്ങള്‍ അല്ല; മുസ്ലീം ലീഗാണ് ഇക്കാര്യത്തില്‍ അപരാധികള്‍.

** പി പി വാസുദേവന്‍

മെയ്‌ നാല് പാടിക്കുന്ന് രക്ത സാക്ഷി ദിനം !!

ഇന്ത്യയില്‍ ആദ്യമായി കര്‍ഷകര്‍ക്ക് സംഘടിക്കാനും ശബ്ദിക്കാനും വേദിയൊരുക്കിയ കര്‍ഷകസംഘം പിറന്നത് പാടിക്കുന്നിന്റെ താഴ്‌വാരത്തു കൊളച്ചേരിയിലെ നണിയൂരില്‍വെച്ചാണ്. കേരളീയന്റെയും വിഷ്ണുഭാരതീയന്റെയും നേതൃത്വത്തില്‍ 1935 ല്‍ രൂപീകരിച്ച പ്രസ്തുത സംഘടനയാണ് ഈ മേഖലയില്‍ നടന്ന കര്‍ഷക സമരങ്ങളെ കൂടുതല്‍ തീക്ഷ്്ണമാക്കിയത്. അതുകൊണ്ടുതന്നെ‘ഭരണകൂടത്തിന്റെ ആജ്ഞ നടപ്പിലാക്കുന്നതിനായി ഒട്ടേറെ സൈനിക ക്യാമ്പുകള്‍ ഈ മേഖലയില്‍ സ്ഥാപിച്ചിരുന്നു. പൊലീസ്, ജന്മി കൂട്ടുകെട്ടിന്റെ തേര്‍വാഴ്ചയക്ക് എതിരെ പൊരുതിയതിന്റെ പേരില്‍ ഉശിരരായ മൂന്ന് കമ്മ്യൂണിസ്റ്റ് പോരാളികളെ പാടിക്കുന്നിന്റെ നിറുകയില്‍ കൊണ്ടു വന്ന് നിരത്തി നിര്‍ത്തി വെടിവെച്ചുകൊന്നത് 1950 മെയ് 3 അര്‍ധരാത്രിയാണ്. അവരുടെ ചോര വീണതിനാല്‍ ചുകന്ന കുന്നായ ഈ കുന്നിന് രക്തസാക്ഷിക്കുന്ന് എന്നും പേരുണ്ട്. ആ ധീര രക്തസാക്ഷികളുടെ സ്മൃതികുടീരം എല്ലാം ഓര്‍മ്മിപ്പിച്ചുകൊണ്ട് കുന്നിന്റെ ഏറ്റവും മുകളില്‍ തലയുര്‍ത്തിപ്പിടിച്ചു നില്‍ക്കുന്നു.

രൈരു നമ്പ്യാര്‍, കുട്ട്യപ്പ എന്നിവരെ കോടതിയെ തെറ്റിദ്ധരിപ്പിച്ച് ജാമ്യത്തിലെടുക്കുകയും കണ്ണൂര്‍ സെന്‍ട്രല്‍ ജയിലില്‍ നിന്നും പുറത്തിറക്കി ഇന്‍സ്‌പെക്ടര്‍ റേയുടെ നേതൃത്വത്തില്‍ ഇരുവരുടേയും കണ്ണുകള്‍ കെട്ടി പാടിക്കുന്നില്‍ എത്തിക്കുകയായിരുന്നു. കയരളത്തെ എം എസ് പി ക്യാമ്പില്‍ നിന്നും ഗോപാലനേയും ഇവിടേക്കെത്തിച്ചു. റോഡില്‍ നിന്നും മാറ്റി പാടിക്കുന്നിലെ ഏറ്റവും ഉയര്‍ന്ന പാറയ്ക്കു മുകളില്‍ കയറ്റി നിര്‍ത്തിയാണ് വെടിവെച്ച് കൊന്നത്. വെളിച്ചത്തെ ഭയക്കുന്നവര്‍ കനത്ത ഇരുട്ട് കട്ടകെട്ടി നില്‍ക്കുന്ന അര്‍ധരാത്രിയിലാണ്, ഈ ക്രൂരകൃത്യം ചെയ്തത്. പാടിക്കുന്ന് രക്തസാക്ഷിത്വം സാമ്രാജ്യത്വത്തിനും ജന്മിത്വത്തിനുമെതിരായ സമര സംഭവങ്ങളില്‍ വേറിട്ടു നില്‍ക്കുന്ന ഒന്നാണ്. വെടിവെച്ചു കൊല്ലുവാന്‍ മാത്രമായി കള്ളജാമ്യത്തിലെടുത്തും കള്ളക്കേസ് ചുമത്തിയും മൂന്ന് സഖാക്കളെ കൊണ്ടുവന്ന് നിരത്തി നിര്‍ത്തി വധിച്ച സംഭവം ചരിത്രത്തില്‍ തന്നെ അപൂര്‍വ്വമാണ്. രാത്രിയുടെ നിശ്ശബ്ദതയെ ഭേദിച്ച് ആ ധീരപോരാളികളുയര്‍ത്തിയ ഇന്‍ക്വിലാബ് സിന്ദാബാദ് എന്ന മുദ്രാവാക്യം നാലുദിക്കിലും പ്രതിധ്വനിച്ചു. നേതാക്കന്മാരെ വധിച്ചാല്‍ പ്രസ്ഥാനം തകരുമെന്ന് കരുതിയായിരുന്നു ആ മൂന്ന് പേരെയും വെടിവെച്ചുകൊന്നത്.

മെയ് ദിനത്തിന്റെ വിപ്ലവ പാരമ്പര്യം ഉയര്‍ത്തിപ്പിടിക്കുക

ലോകത്തുടനീളം തൊഴിലാളിവര്‍ഗത്തിനിടയില്‍ പോരാട്ടത്തിെന്‍റയും ഐക്യദാര്‍ഢ്യത്തിെന്‍റയും ആവേശം അലയടിപ്പിക്കുന്നതാണ് മെയ്ദിനാഘോഷങ്ങള്‍. ഈ വര്‍ഷം ലോകമാകെ മെയ്ദിനം ആഘോഷിക്കുമ്പോള്‍ ഇന്ത്യന്‍ തൊഴിലാളിവര്‍ഗം ഗൗരവതരമായ ഒരു രാഷ്ട്രീയ പോരാട്ടത്തിെന്‍റ നടുവിലാണ്. 16ാമത് ലോക്സഭയുടെ രൂപീകരണത്തിനായുള്ള, ഇന്ത്യന്‍ പാര്‍ലമെന്‍റിലേക്കുള്ള പൊതുതിരഞ്ഞെടുപ്പ് ഇതിനകം പകുതി പിന്നിട്ടിരിക്കുന്നു. ഇവിടെ വീണ്ടും, ഈ തിരഞ്ഞെടുപ്പ് പോരാട്ടത്തിലും ഇന്ത്യന്‍ തൊഴിലാളിവര്‍ഗം ലോകത്തിെന്‍റ നാനാഭാഗത്തുമുള്ള അധ്വാനിക്കുന്ന ജനവിഭാഗങ്ങള്‍ അഭിമുഖീകരിക്കുന്ന അതേ വിഷയങ്ങള്‍ തന്നെയാണ് ഉന്നയിക്കുന്നത്. മറ്റു വിഷയങ്ങള്‍ക്കൊപ്പം കൂലിയും തൊഴില്‍ സുരക്ഷയും വിലക്കയറ്റവും തൊഴിലില്ലായ്മയും സാമൂഹ്യസുരക്ഷയും തങ്ങള്‍ക്കിഷ്ടമുള്ള ട്രേഡ് യൂണിയനില്‍ ചേരാനുള്ള അടിസ്ഥാനപരമായ അവകാശവുംപോലും തൊഴിലാളികളെ സംബന്ധിച്ചിടത്തോളം മുഖ്യവിഷയങ്ങളാണ്. കഴിഞ്ഞ 23 വര്‍ഷമായി ഈ രാജ്യത്ത് നടപ്പാക്കപ്പെട്ടുകൊണ്ടിരിക്കുന്ന നവലിബറല്‍ നയങ്ങളുമായി ബന്ധപ്പെട്ടവയാണ് ഇവയെല്ലാം. ഈ വിഷയങ്ങളില്‍ കേന്ദ്രീകരിക്കുന്നതിനാണ് അധ്വാനിക്കുന്ന ജനങ്ങള്‍ ശ്രമിക്കുന്നത്. ഇവയാകട്ടെ, അധ്വാനിക്കുന്നവരുടെ ഉപജീവനമാര്‍ഗവുമായും മഹാഭൂരിപക്ഷം വരുന്ന ഇന്ത്യന്‍ ജനതയുടെ ഭാവിയുമായും നേരിട്ട് ബന്ധപ്പെട്ടിരിക്കുന്നവയുമാണ്. ഈ തിരഞ്ഞെടുപ്പ് ക്യാമ്പെയിനില്‍ ഇന്ത്യന്‍ തൊഴിലാളിവര്‍ഗം ഏര്‍പ്പെട്ടിരിക്കുന്ന പോരാട്ടമാകട്ടെ, കഴിഞ്ഞ അഞ്ച് വര്‍ഷമായി ഇന്ത്യന്‍ തൊഴിലാളിവര്‍ഗം നടത്തിവരുന്ന വമ്പിച്ച സംയുക്ത പോരാട്ടത്തിെന്‍റ ഭാഗവുമാണ്. ഐതിഹാസികമായ രാജ്യവ്യാപക പൊതുപണിമുടക്കുകളും ഓരോ മേഖലയിലും നടന്ന നിരവധി പണിമുടക്കുകളും സമരങ്ങളും ഉള്‍പ്പെടെയുള്ള സംയുക്ത പ്രസ്ഥാനവും പോരാട്ടങ്ങളുമെല്ലാം സര്‍ക്കാര്‍ പിന്തുടര്‍ന്നു വരുന്ന നയങ്ങളില്‍ മാറ്റം വേണമെന്ന ആവശ്യത്തില്‍ കേന്ദ്രീകരിച്ചുള്ളവയാണ്. ആ തരത്തില്‍ ഈ പണിമുടക്കുകളും പോരാട്ടങ്ങളും ലോകത്തിെന്‍റ നാനാഭാഗങ്ങളില്‍ നടക്കുന്ന വമ്പിച്ച പോരാട്ടങ്ങളുമായി സമരസപ്പെട്ടിരിക്കുന്നു. ലോകമാസകലം പ്രതിസന്ധി കഴിഞ്ഞ ഏതാനും വര്‍ഷങ്ങളായി മുതലാളിത്ത ലോകം കടുത്ത പ്രതിസന്ധിയില്‍ അകപ്പെട്ടിരിക്കുകയാണ്. അതിെന്‍റ അനന്തരഫലങ്ങള്‍ ലോകത്താകെയുള്ള ജനങ്ങളുടെ ജീവിതത്തെ ബാധിക്കുകയുമാണ്. ഈ പ്രതിസന്ധി മൂലമുള്ള ഗുരുതരമായ പ്രത്യാഘാതങ്ങള്‍ക്കെതിരെയാണ് യൂറോപ്പിലെയും മറ്റെല്ലാ ഭൂഖണ്ഡങ്ങളിലെയും പോരാട്ടങ്ങള്‍. യൂറോപ്പിലെ മുഖ്യപ്രശ്നം തൊഴിലില്ലായ്മയാണ്. ഔദ്യോഗിക തൊഴിലില്ലായ്മാനിരക്ക് ഗ്രീസില്‍ 27.4 ശതമാനവും സ്പെയിനില്‍ 26.7 ശതമാനവും പോര്‍ച്ചുഗലില്‍ 15.5 ശതമാനവും ബള്‍ഗേറിയയില്‍ 12.9 ശതമാനവും ഇറ്റലിയില്‍ 12.7 ശതമാനവുമാണ്. യുവാക്കള്‍ക്കും സ്ത്രീകള്‍ക്കുമിടയില്‍ അവസ്ഥ ഇതിലും പരിതാപകരമാണ്. എല്ലാ രാജ്യങ്ങളിലെയും തൊഴിലില്ലാത്തവരില്‍ അധികവും ഈ രണ്ടു വിഭാഗവുമാണ്. വര്‍ധിച്ചുവരുന്ന ഈ തൊഴിലില്ലായ്മ കൂലിക്കും സാമൂഹ്യസുരക്ഷാ ആനുകൂല്യങ്ങള്‍ക്കുംമേല്‍ കൂടുതല്‍ ആക്രമണങ്ങള്‍ക്കിടയാക്കും എന്നാണ് ചരിത്രം നമ്മെ പഠിപ്പിക്കുന്നത്. 'ചെലവ് ചുരുക്കല്‍' (അൗെലേൃശേ്യ) എന്നറിയപ്പെടുന്ന നയങ്ങള്‍ യഥാര്‍ഥത്തില്‍ പ്രതിസന്ധി കൂടുതല്‍ രൂക്ഷമാകുന്നതിനാണ് ഇടയാക്കിയിട്ടുള്ളത്; അത് പിന്നെയും അധ്വാനിക്കുന്ന ജനതയുടെ ഉപജീവനമാര്‍ഗത്തിനുമേല്‍ കടുത്ത കടന്നാക്രമണങ്ങള്‍ അടിച്ചേല്‍പിക്കുന്നതിനും ഇടയാക്കുന്നു. നവലിബറല്‍ നയങ്ങളോട് പ്രത്യയശാസ്ത്രപരമായി അടുപ്പമുള്ളവര്‍ക്കുപോലും ഭരണവര്‍ഗങ്ങളുടെയും ഐഎംഎഫിനെയും യൂറോപ്യന്‍ കേന്ദ്ര ബാങ്കിനെയുംപോലുള്ള ഉപദേശകരുടെ നയപരമായ തീട്ടൂരങ്ങള്‍ അംഗീകരിക്കാന്‍ പറ്റുന്നില്ല. ഏപ്രില്‍ 4ന് ബ്രസ്സല്‍സില്‍ നടന്ന വമ്പിച്ച പ്രകടനത്തില്‍ യൂറോപ്പിലുടനീളമുള്ള പതിനായിരക്കണക്കിന് തൊഴിലാളികളാണ് പങ്കെടുത്തത്. "മറ്റൊരു യൂറോപ്പ് സാധ്യമാണ്", "ചെലവുചുരുക്കല്‍ നയം തുലയട്ടെ" എന്നിത്യാദി മുദ്രാവാക്യങ്ങളാണ് ആ പ്രകടനത്തില്‍ ഉയര്‍ത്തപ്പെട്ടത്. യൂറോപ്യന്‍ യൂണിയന്‍ ഭരണാധികാരികള്‍ തൊഴിലില്ലായ്മ, ദാരിദ്ര്യം, അസമത്വം തുടങ്ങിയവയ്ക്ക് പരിഹാരം കാണുകയാണ് വേണ്ടത് എന്നാണ് പ്രകടനക്കാര്‍ ആവശ്യപ്പെട്ടത്. ദൗര്‍ഭാഗ്യവശാല്‍, അനീതിക്കും വര്‍ധിച്ചുവരുന്ന അസമത്വങ്ങള്‍ക്കും എതിരെ പ്രതിഷേധിക്കുന്ന വമ്പിച്ച പ്രക്ഷോഭ പ്രസ്ഥാനങ്ങള്‍ക്ക് പലതിനും 'വാള്‍സ്ട്രീറ്റ് കൈയടക്കല്‍ പ്രസ്ഥാന'ത്തിെന്‍റ കാലത്ത് സംഭവിച്ചതുപോലെ വ്യക്തമായ രാഷ്ട്രീയ ദിശാബോധമില്ല. അതുകൊണ്ടു തന്നെ അവ തങ്ങളുടെ രോഷവും പ്രതിഷേധവും പ്രകടിപ്പിക്കുന്ന ഒരു തരംഗം മാത്രമായി ഒടുങ്ങുന്നു. വ്യവസ്ഥിതിയെ വെല്ലുവിളിക്കുന്നതിന് ഈ വിഷയങ്ങളെയെല്ലാം വര്‍ഗപരമായ ഒരു കോണില്‍നിന്ന് നിരീക്ഷിക്കാനാണ് മെയ് ദിനം നമ്മെ ആഹ്വാനം ചെയ്യുന്നത്. അധ്വാനിക്കുന്ന ജനതയെ ചൂഷണം ചെയ്തു കൊണ്ടു മാത്രമേ മുതലാളിത്തത്തിനു നിലനില്‍ക്കാനാകൂ; നാം നേരിടുന്ന എല്ലാ പ്രതിസന്ധികളും ഈ വ്യവസ്ഥിതിയുടെ ഉല്‍പന്നങ്ങളുമാണ്. ഈ വ്യവസ്ഥിതിയാണ് വെല്ലുവിളിക്കപ്പെടേണ്ടത്. ഈ ലക്ഷ്യത്തോടെയായിരിക്കണം തൊഴിലാളിവര്‍ഗത്തെയും മറ്റെല്ലാ അധ്വാനിക്കുന്ന ജനവിഭാഗങ്ങളേയും അണിനിരത്തേണ്ടത്; അവരുടെ ദൈനംദിന പോരാട്ടങ്ങളെ ഭരണവര്‍ഗത്തിെന്‍റ നയങ്ങളുമായി ബന്ധപ്പെടുത്തണം; ഈ നയങ്ങള്‍ക്കുപിന്നിലുള്ള രാഷ്ട്രീയത്തെ തുറന്നു കാണിക്കണം. ഇതാണ് പരമപ്രധാനമായ സംഗതി. മുതലാളിത്ത വ്യവസ്ഥിതിക്കെതിരായ പോരാട്ടം ശക്തിപ്പെടുത്തണമെന്നാണ് മെയ്ദിനത്തിെന്‍റ അന്തഃസത്ത നമ്മോടാവശ്യപ്പെടുന്നത്. ഇന്നത്തെ ലോകത്ത്, നമ്മുടെ രാജ്യത്ത്, സാമ്പത്തികവും രാഷ്ട്രീയവും പ്രത്യയശാസ്ത്രപരവുമായ രംഗങ്ങളില്‍ ഒരേപോലെ നമ്മുടെ പ്രവര്‍ത്തനം തീവ്രമാക്കേണ്ടതുണ്ട്. നമ്മുടെ സമൂഹത്തിെന്‍റ സാമൂഹിക സംവിധാനത്തില്‍ നവലിബറല്‍ കടന്നാക്രമണങ്ങള്‍ സൃഷ്ടിക്കുന്ന വിനാശകരമായ പ്രത്യാഘാതത്തെക്കുറിച്ച് ആഴത്തില്‍ പഠിക്കേണ്ടതുണ്ട്; അവയെ നേരിടേണ്ടതുമുണ്ട്. നമ്മുടെ രാജ്യത്തെ 45 കോടിയിലേറെ വരുന്ന അധ്വാനിക്കുന്ന ജനവിഭാഗത്തില്‍ വളരെ ചെറിയൊരു വിഭാഗം മാത്രമേ ഏതെങ്കിലുമൊരു ബഹുജന സംഘടനയില്‍ സംഘടിതരായിട്ടുള്ളൂ; അതുകൊണ്ട് നമ്മുടെ പ്രാഥമിക കടമ ട്രേഡ് യൂണിയന്‍ പ്രസ്ഥാനത്തെ ശക്തിപ്പെടുത്തലാണ്. ഇന്ത്യന്‍ തൊഴില്‍ സേനയില്‍ ഏറ്റവും വലിയ ഭാഗമായ ദരിദ്ര കര്‍ഷകരുടെയും കര്‍ഷകത്തൊഴിലാളികളുടെയും പ്രശ്നങ്ങളും കൂടി ഏറ്റെടുക്കേണ്ടത് ട്രേഡ് യൂണിയനുകളെ സംബന്ധിച്ചിടത്തോളം അനിവാര്യമാണ്. അവര്‍ നിര്‍ദയമായി കൊള്ളയടിക്കപ്പെടുകയാണ്; ലക്ഷക്കണക്കിനാളുകളാണ് ആത്മഹത്യയില്‍ അഭയം തേടാന്‍ നിര്‍ബന്ധിതരാകുന്നത്. ഫ്യൂഡല്‍ പ്രത്യയശാസ്ത്രങ്ങളുടെയും പരിഷ്കരണവാദപരമായ പ്രത്യയശാസ്ത്രങ്ങളുടെയും ശക്തമായ സ്വാധീനമാണ് അധ്വാനിക്കുന്ന ജനങ്ങള്‍ക്കിടയിലെ മറ്റൊരു മുഖ്യവെല്ലുവിളി. ഇത് നമ്മുടെ കടമയെ കൂടുതല്‍ ദുഷ്ക്കരമാക്കുന്നു. ട്രേഡ് യൂണിയനുകളുടെ വര്‍ഗപരമായ ദിശാബോധത്തെ ശക്തിപ്പെടുത്തുന്നതിനും അധ്വാനിക്കുന്ന ജനവിഭാഗത്തിനിടയില്‍ ശാസ്ത്രീയമായ സോഷ്യലിസ്റ്റ് ധാരണ പ്രചരിപ്പിക്കുന്നതിനും നിര്‍ണായകമായ പ്രാധാന്യമാണുള്ളത്. ക്യാമ്പെയ്നുകളിലും പോരാട്ടങ്ങളിലും ഓരോ രാജ്യത്തെയും സവിശേഷ വിഷയങ്ങള്‍ ഏറ്റെടുക്കുന്നതിനുപുറമെ സാമ്രാജ്യത്വ കടന്നാക്രമണങ്ങളെയും അവയുടെ ഇടപെടലുകളെയുംകുറിച്ച് ശ്രദ്ധിക്കേണ്ടതും പ്രധാനമാണ്. ഒന്നാം ലോക യുദ്ധത്തിെന്‍റ ആരംഭത്തിെന്‍റ ശതാബ്ദിയാണ് ഈ വര്‍ഷം. ഇരുപതാം നൂറ്റാണ്ടിെന്‍റ ആദ്യപകുതിയില്‍ തന്നെ ലോകം വീണ്ടുമൊരു ലോകയുദ്ധത്തിന് ഇരയായത് അസംഖ്യം ജീവനും അളവറ്റ സ്വത്തും നഷ്ടപ്പെടുന്നതിന് ഇടയാക്കിയെങ്കിലും യുദ്ധക്കൊതിക്ക് ഇപ്പോഴും അറുതിയായിട്ടില്ല. സാമ്രാജ്യത്വശക്തികള്‍ പല ഭൂഖണ്ഡങ്ങളിലെയും പല രാജ്യങ്ങളിലും പ്രത്യക്ഷമായും പരോക്ഷമായും ഇടപെട്ടുകൊണ്ട് അവയെ കീഴ്പ്പെടുത്താന്‍ ശ്രമിക്കുകയാണ്. പലസ്തീനിലും ക്യൂബയിലും മറ്റും എന്നപോലെ സിറിയയിലും വെനസ്വേലയിലും സാമ്രാജ്യത്വശക്തികളെയും അവയുടെ ഗൂഢാലോചനകളെയും ചെറുക്കുന്ന ജനങ്ങള്‍ക്ക് പിന്തുണ നല്‍കാന്‍ നമ്മുടെ പ്രതിഷേധശബ്ദം ഉയരണം. ഈ സാമ്രാജ്യത്വ കടന്നാക്രമണങ്ങളുടെ ഇരകളായി ലിബിയയും ഇറാഖും അഫ്ഗാനിസ്ഥാനും നമ്മുടെ മുന്നില്‍ തന്നെയുണ്ട്. നമുക്ക് മുന്നിലുള്ള കടമകളെക്കുറിച്ച് നാമെല്ലാം അനുസ്മരിക്കാനുള്ള സന്ദര്‍ഭമാണ് മെയ്ദിനം. മെയ് ദിനത്തിെന്‍റ വിപ്ലവ പാരമ്പര്യത്തെക്കുറിച്ച് നമ്മെ ഓര്‍മിപ്പിച്ചുകൊണ്ട് സിഐടിയുവിെന്‍റ സ്ഥാപക പ്രസിഡന്‍റായ സഖാവ് ബി ടി രണദിവെ പറഞ്ഞു  "ഭാഗികമായ ആവശ്യങ്ങള്‍ക്കൊപ്പം തൊഴിലാളിവര്‍ഗത്തിെന്‍റ സാര്‍വദേശീയ ഐക്യദാര്‍ഢ്യ പ്രഖ്യാപനവും മുതലാളിത്ത വ്യവസ്ഥിതിക്ക് അന്ത്യം കുറിക്കാനും തൊഴിലാളിവര്‍ഗത്തിന് രാഷ്ട്രീയാധികാരം പിടിച്ചെടുക്കാനുമുള്ള ദൃഢനിശ്ചയവും അതിലുള്ള ഉറച്ച വിശ്വാസവും കൂടി ചേര്‍ന്നതാണ് എക്കാലത്തും മെയ്ദിനത്തിെന്‍റ വിപ്ലവ പാരമ്പര്യം". ഇന്ന് ഇന്ത്യയില്‍ ഭാഗികാവശ്യങ്ങള്‍ക്കുവേണ്ടിയുള്ള പോരാട്ടത്തെ തൊഴിലാളിവര്‍ഗ സാര്‍വദേശീയതയുമായും സാമൂഹ്യവിമോചനത്തിനായുള്ള ലക്ഷ്യം, സോഷ്യലിസം എന്ന ലക്ഷ്യം കൈവരിക്കുന്നതിലേക്കുള്ള പ്രയാണവുമായും കൂട്ടിയിണക്കുക എന്ന ഈ മഹത്തായ പാരമ്പര്യം ഉയര്‍ത്തിപ്പിടിക്കാന്‍ തൊഴിലാളിവര്‍ഗത്തെ സജ്ജരാക്കേണ്ടതാണ്. വര്‍ഗസമരത്തിലെ ധീരന്മാരായ പോരാളികളുടെ മഹത്തായ ത്യാഗവും അവരില്‍ പലരുടെയും രക്തസാക്ഷിത്വവും ഓര്‍മിച്ചുകൊണ്ട്, പോരാട്ടത്തിെന്‍റയും ഐക്യദാര്‍ഢ്യത്തിെന്‍റയും ബാനര്‍ ഉയര്‍ത്തിപ്പിടിച്ച് നമുക്ക് മുന്നേറാം. മെയ് ദിനം നീണാള്‍ വാഴട്ടെ! തൊഴിലാളിവര്‍ഗ ഐക്യം നീണാള്‍ വാഴട്ടെ! വിപ്ലവം വിജയിക്കട്ടെ!

വിപ്ലവ സോഷ്യലിസത്തിന്റെ കൊല്ലം വഴികള്‍

റവല്യൂഷണറി സോഷ്യലിസ്റ്റ് പാര്‍ടിയെന്നപേരില്‍ നടത്തിയിട്ടുള്ള വിപ്ലവവും സോഷ്യലിസവും ഇനി കോണ്‍ഗ്രസിന്റെ മടിയില്‍ കിടന്നാണ് ആര്‍എസ്പി നടപ്പാക്കാന്‍ പോകുന്നത്. സിപിഐ എം, സിപിഐ എന്നീ പാര്‍ടികള്‍ ജനകീയ ജനാധിപത്യത്തെപ്പറ്റിയും ദേശീയ ജനാധിപത്യ വിപ്ലവത്തെപ്പറ്റിയും മാത്രമേ പരിപാടികളില്‍ പറയുന്നുള്ളുവെന്നും ഉടനടി സോഷ്യലിസം വരുത്താന്‍ തങ്ങള്‍ക്കുമാത്രമേ സാധിക്കു എന്നുമാണ് ആര്‍എസ്പിയുടെ നയപരിപാടികള്‍ പറയുന്നത്. അത്തരമൊരു പാര്‍ടിയുടെ കേരളഘടകം അഖിലേന്ത്യാ നയത്തില്‍നിന്ന് വ്യതിചലിച്ച് കേരളാ ആര്‍എസ്പിയായി മാറി വരുമ്പോള്‍ കഴിഞ്ഞ നിയമസഭാ തെരഞ്ഞെടുപ്പിലെ ജനവിധിയെക്കൂടി അട്ടിമറിക്കുന്ന ഹീനകൃത്യമാണ് നിര്‍വഹിക്കപ്പെട്ടിരിക്കുന്നത്. സോളാര്‍ തട്ടിപ്പിലുള്‍പ്പടെ, നിരവധി സംഭവപരമ്പരകളില്‍ അടിത്തറയിളകിയ ഉമ്മന്‍ചാണ്ടി സര്‍ക്കാരിന്റെ ചാക്കിടല്‍ രാഷ്ട്രീയം നെയ്യാറ്റിന്‍കരയില്‍നിന്ന് നീണ്ടകരയിലെത്തിയപ്പോള്‍, വലയില്‍ കുടുങ്ങിയത് രണ്ട് എംഎല്‍എമാര്‍ കൂടി ഉള്‍പ്പെടുന്ന ഒരു പാര്‍ടിതന്നെയായി. വലയില്‍ കുടുങ്ങുന്ന മത്സ്യത്തിന്റെ ഗതി അതിജീവനമല്ല. ഇടതുപക്ഷ രാഷ്ട്രീയത്തിന്റെ ചൂടും ചൂരുമേറ്റ് വളര്‍ന്നു വികസിച്ചവര്‍ ഉമ്മന്‍ചാണ്ടിയുടെ ചാക്കില്‍ കയറുമ്പോള്‍, ഭരണസുഖം നല്‍കുന്ന കുളിര്‍മ ആസ്വദിക്കാമെങ്കിലും രാഷ്ട്രീയമായി മരണംതന്നെയാകും ഫലം.

സീറ്റുതര്‍ക്കം മുറുകുമ്പോള്‍ ഒരേ മുന്നണിയില്‍പെട്ട പാര്‍ടികള്‍ പരസ്പരം മത്സരിക്കേണ്ടി വരാറുണ്ട്. 1980ല്‍ ഇടതുപക്ഷ ഐക്യം ഇന്ത്യയില്‍ വളര്‍ന്നതിനുശേഷം ചുരുക്കം സീറ്റുകളിലെങ്കിലും സിപിഐ യും സിപിഐ എമ്മും മത്സരിക്കാനിടവന്നിട്ടുമുണ്ട്. എന്നാല്‍ ആര്‍എസ്പിയുടെ കാര്യത്തില്‍ സംഭവിച്ചത് അതൊന്നുമല്ല. സീറ്റ് തര്‍ക്കം പുറമെ പറയുന്നതുമാത്രം. കൊല്ലം സീറ്റ് തങ്ങള്‍ക്ക് എന്തുകൊണ്ട് നഷ്ടപ്പെട്ടുവെന്ന് ഏറ്റവും കൂടുതല്‍ അറിയുന്നതും പ്രേമചന്ദ്രനുതന്നെയാകുമല്ലോ. ചെറിയ പാര്‍ടിയായിട്ടുകൂടി എത്രയോ പിളര്‍പ്പുകള്‍ ആ പാര്‍ടിയെ തേടിയെത്തി. പ്രാമാണികനായ നേതാവ് എന്‍ ശ്രീകണ്ഠന്‍നായര്‍തന്നെ, കൊല്ലത്ത് പരാജയപ്പെട്ടു. തുടര്‍ന്നുണ്ടായ പിളര്‍പ്പുകളുടെ പരമ്പര ആ പാര്‍ടിയെ എത്രയോ ദുര്‍ബലമാക്കി. ആര്‍എസ്പിയുടെ മുന്‍നിര നേതാവായ ബേബിജോണിനെ, കൊലയാളിയെന്ന് വിളിച്ച് ചവറ സരസന്റെ കൊലപാതകത്തിന് ഉത്തരവാദിയാക്കി ചിത്രവധം ചെയ്തപ്പോള്‍, സഖാവെന്ന പരിഗണന നല്‍കി, പൊതു മണ്ഡലത്തില്‍ നിലനിര്‍ത്താന്‍ കമ്യൂണിസ്റ്റുകാര്‍ മാത്രമേ ഉണ്ടായിരുന്നുള്ളൂ. അല്ലാതെ കൊലയാളിയെന്നു വിളിച്ചപമാനിച്ച കോണ്‍ഗ്രസുകാര്‍ക്കൊപ്പം അധികാരംപങ്കിടാന്‍ മാത്രമല്ല അവിടേക്ക് തന്റെ പിതാവിന്റെ പഴയ സഹപ്രവര്‍ത്തകരെ ചാക്കിലാക്കി 'കൂട്ടിക്കൊടുക്കാനും' യാതൊരു മടിയുമില്ല എന്നുകൂടി ബേബിജോണിന്റെ മകന്‍ തെളിയിച്ചിരിക്കുന്നു. യൂദാസിനു കിട്ടിയ വെള്ളിക്കാശുപോലെ, യുഡിഎഫിന്റെ ലോകസഭാ ടിക്കറ്റ് തരപ്പെടുത്തിയ പ്രേമചന്ദ്രനും സംഘവും തങ്ങള്‍ ഇന്നലെവരെ പറഞ്ഞ രാഷ്ട്രീയം എങ്ങനെ വിഴുങ്ങും കോര്‍പ്പറേറ്റുകള്‍ക്കെതിരെയും കസ്തൂരിരംഗനെതിരെയും സോളാര്‍ തട്ടിപ്പിനെതിരെയും ഇടതുപക്ഷ പ്രതിനിധിയായി ചാനലുകളില്‍ തിളങ്ങിയയാള്‍ക്ക് താനുന്നയിച്ച വാദങ്ങളോട് യുഡിഎഫ് സ്ഥാനാര്‍ത്ഥിയെന്ന നിലയ്ക്ക് എങ്ങനെ പ്രതികരിക്കാനാകും ക്ലിഫ്ഹൗസ് ഉപരോധിക്കാന്‍ സമരംനയിച്ചുപോയ നേതാവ് അന്തിയായപ്പോള്‍, തലയില്‍ മുണ്ടിട്ട്, ക്ലിഫ്ഹൗസിനകത്ത് ചെന്ന് സീറ്റൊറപ്പിച്ചുപോന്നിട്ട് കുറ്റം മുഴുവന്‍ സിപിഐ എമ്മിന്റെയും സിപിഐയുടേയും തലയില്‍ ചാര്‍ത്തിക്കൊടുക്കുന്നു. കമ്യൂണിസ്റ്റുകാര്‍ക്ക് മുന്നണി നടത്താനറിയില്ലത്രേ. കോണ്‍ഗ്രസുകാര്‍ എത്ര നന്നായി സംസാരിക്കുമെന്നാണ് വീരേന്ദ്രകുമാറിന് അത്ഭുതം. ആധുനിക കേരളത്തിന്റെ സൃഷ്ടാവായ ഇ എം എസിനെ 'വിക്കന്‍ നമ്പൂതിരി'യെന്നു വിളിച്ച കോണ്‍ഗ്രസുകാരുടെ പെരുമാറ്റ മര്യാദ കേമമാണ്. കാലന്‍ വന്നു വിളിച്ചിട്ടും പോകാത്തതെന്തേ ഗോപാലാ എന്ന് ആശുപത്രിയില്‍ മരണക്കിടക്കയില്‍ കിടക്കുന്ന എ കെ ജിയോട് ചോദിച്ചതും ഇതേ കോണ്‍ഗ്രസാണ്. വടകരയോ കോഴിക്കോടോ തരാന്‍ സൗകര്യപ്പെടുന്നില്ല, വേണമെങ്കില്‍ പാലക്കാട്ട് പോയി പനങ്കള്ള് കുടിച്ചു വരുകയെന്ന് ചിരിച്ചുകൊണ്ട് പറഞ്ഞ ഉമ്മന്‍ചാണ്ടി എത്രയോ മര്യാദരാമന്‍. പെരുമാറ്റ മര്യാദയുടെ സര്‍ട്ടിഫിക്കറ്റ് അടിക്കുന്ന ഒരു കമ്മട്ടംതന്നെ വീരന്റെ പാര്‍ടി പണിതുവെച്ചിട്ടുണ്ട്. ഏതായാലും സിപിഐ എമ്മിനും ഇടതുമുന്നണിക്കും ഒപ്പം ഉറച്ചുനിന്ന പഴയ പാര്‍ടിയിലെ നാലുപേര്‍ എംഎല്‍എമാരായി നിയമസഭയിലിരിക്കുമ്പോള്‍, വീരന്‍ ചെറിയ പാര്‍ടിയുടെ ചെറിയനേതാവായി മാറിയെന്നതാണ് പരമാര്‍ത്ഥം. ആന മെലിഞ്ഞാലും തൊഴുത്തില്‍ കെട്ടരുത് എന്ന പഴമൊഴിപോലെ എത്ര മെലിഞ്ഞാലും വീരനെ പാലക്കാട്ട് കൊണ്ടുകെട്ടാന്‍ പാടില്ലായിരുന്നു. "കോഴിയെ ഡ്രസുചെയ്ത് കൊടുക്കപ്പെടും" എന്ന് ബോര്‍ഡ് കാണുമ്പോള്‍ കോഴിക്ക് എന്തോ നല്ലതുവരുമെന്ന് വിചാരിക്കുന്നവന്‍ എത്രയോ "ബുദ്ധി"മാനായിരിക്കും. ഉമ്മന്‍ചാണ്ടി സംഘത്തിന്റെ ചിരി കൊലച്ചിരിയാണെന്ന് പാലക്കാട്ട് ചെല്ലുമ്പോഴെങ്കിലും അറിയുമെന്നിരിക്കെ, പാലക്കാട് ചുരം കയറി പാണ്ടിനാട്ടില്‍ ഒരു യാത്രാവിവരണംകൂടി എഴുതി നോക്കാമെന്നല്ലാതെ, യുഡിഎഫിലെ പെരുമാറ്റ മര്യാദകൊണ്ട് വീരന്റെ പാര്‍ടി ഗതിപിടിക്കുന്നില്ല എന്ന് ആര്‍ക്കാണ് മനസ്സിലാകാത്തത്.

ഇരുപത് എംഎല്‍എമാരുള്ള മുസ്ലീംലീഗിന് രണ്ടു ലോകസഭാ സീറ്റ്. ഒന്‍പത് എംഎല്‍എമാരുള്ള കേരളാ കോണ്‍ഗ്രസിന് ഒരേ ഒരു സീറ്റ്. മുപ്പത്തിയാറ് എംഎല്‍എമാരുള്ള കോണ്‍ഗ്രസിന് പതിനാറുസീറ്റ്. എത്ര ഉദാരമായ സീറ്റു പങ്കിടലാണത്. അതിനെ വാഴ്ത്താന്‍ മാധ്യമങ്ങളും. ഇടതുപക്ഷ ജനാധിപത്യമുന്നണിക്ക് അനുകൂലമായി, കുന്നത്തൂര്‍, ഇരവിപുരം മണ്ഡലങ്ങളിലെ ജനങ്ങള്‍ നല്‍കിയ ഒരു വിധിയെഴുത്തിനെ അട്ടിമറിച്ച് പച്ചയായ കാലുമാറ്റം നടത്തി അധാര്‍മിക രാഷ്ട്രീയം പയറ്റിയ ഉമ്മന്‍ചാണ്ടിയുടെ നഗ്നതയെ പട്ടുകോണകംകൊണ്ടു മറയ്ക്കാനാണ് എല്‍ഡിഎഫിലെ പെരുമാറ്റ വിശേഷങ്ങളെപ്പറ്റി ഉപന്യാസങ്ങള്‍ ചമയ്ക്കുന്നത്. കൊല്ലം സീറ്റ് കിട്ടിയില്ലെങ്കില്‍ മുന്നണിയിലുണ്ടാവില്ല എന്നതാണ് ആര്‍എസ്പിയുടെ ശാഠ്യമെങ്കില്‍ എന്തിന് രാജ്യസഭാ സീറ്റ് സ്വീകരിച്ച് കൊല്ലങ്ങള്‍ക്കുമുമ്പ് പ്രേമചന്ദ്രന്‍ എല്‍ഡിഎഫ് എംപിയായി ദില്ലിയിലേക്ക് പോയി? മുന്നണിയിലെ ധാരണയനുസരിച്ച് ജനതാദളിന് ഒരു ടേമിന്റെ പകുതി നല്‍കണമായിരുന്നുവെങ്കിലും 2001ല്‍ നിയമസഭാ തിരഞ്ഞെടുപ്പില്‍ എല്‍ഡിഎഫ് പരാജയപ്പെട്ടപ്പോള്‍ ലോട്ടറിയടിച്ചത് ഇതേ പ്രേമചന്ദ്രനായിരുന്നു. ജനതാദളിന്റെ ഓഹരിയായ മൂന്നുകൊല്ലംകൂടി രാജ്യസഭയില്‍ അംഗമായി തുടര്‍ന്നു. പഞ്ചായത്തംഗം മുതല്‍ പാര്‍ലമെന്റംഗത്വംവരെയും എംഎല്‍എ സ്ഥാനം മുതല്‍ മന്ത്രിപ്പട്ടംവരെയും എത്തിയിട്ടും ചവിട്ടിനിന്ന ഗോവണി, കൂടെനിന്നവന്റെ തലയിലേക്കെറിഞ്ഞ്, മറുകരകണ്ട് കൊഞ്ഞനംകുത്തുന്ന പ്രേമചന്ദ്രനും സംഘവും നയിക്കുന്ന വഴിയെ അണികള്‍ വരണമെന്നില്ല.

1957ല്‍ കമ്യൂണിസ്റ്റ്പാര്‍ടിയും കോണ്‍ഗ്രസും സോഷ്യലിസ്റ്റുകളും മത്സരിച്ചപ്പോള്‍ 60 സീറ്റ് കമ്യൂണിസ്റ്റുകാര്‍ക്കും, അഞ്ച് സീറ്റ് കമ്യൂണിസ്റ്റ് സ്വതന്ത്രര്‍ക്കും കിട്ടി. ഒറ്റയ്ക്ക് ഭരിക്കാനല്ല, സോഷ്യലിസ്റ്റുകളെ കൂട്ടിച്ചേര്‍ത്ത് ഇടതുപക്ഷ അടിത്തറ വികസിപ്പിക്കാനാണ് അക്കാലത്ത് അവിഭക്ത കമ്യൂണിസ്റ്റ്പാര്‍ടി ശ്രമിച്ചത്. ആദ്യത്തെ കേരള നിയമസഭയില്‍ 23 എംഎല്‍എമാരുണ്ടായിരുന്ന സോഷ്യലിസ്റ്റ്പാര്‍ടിയുടെ കമ്യൂണിസ്റ്റ് വിരോധം ആ പാര്‍ടിയെ തകര്‍ക്കുക മാത്രമല്ല, വിമോചന സമരമുന്നണിയിലെത്തിച്ചു. കേരളം ഏറെ ബഹുമാനിക്കുന്ന വി ആര്‍ കൃഷ്ണയ്യരെ വിമോചന സമരകാലത്ത് ചവറയില്‍വച്ച് അടിച്ച "പത്തല്‍ വിപ്ലവം" മുതല്‍, ആര്‍എസ്പിയുടെ പൂര്‍വികരുടെ ഇടതുപക്ഷ സ്വഭാവം ചരിത്രത്തില്‍ മുദ്രണംചെയ്യപ്പെട്ടിട്ടുണ്ട്. തക്കംനോക്കി പരസ്പരം കുത്തുകയും കൂട്ടില്‍ കുത്തുകയും ചെയ്ത് ഛിന്നഭിന്നമായിപ്പോയ ഒരു പ്രസ്ഥാനത്തെ, ഒന്നര ദശകത്തോളമായി ഒപ്പം നിര്‍ത്തി പരിലാളിച്ച് സംരക്ഷിച്ചതിന്റെ മര്യാദകളൊന്നും മാനിച്ച് പ്രവര്‍ത്തിച്ചില്ലെങ്കിലും തലേന്നുപോലും ഒന്നും ഉരിയാടാതെ കളം മാറിച്ചവിട്ടിയ നെറികേടിന് കേരളം മാപ്പുനല്‍കില്ല. രണ്ടായിരത്തി ഒന്‍പതില്‍ ജനതാദള്‍, രണ്ടായിരത്തി പതിനാലില്‍ ആര്‍എസ്പി. ഇടതുമുന്നണിയില്‍നിന്ന് കൊഴിച്ചില്‍ കൂടുന്നതായി ആഹ്ലാദിക്കുന്നവര്‍ ഏറെയുണ്ട്. ജനതാദളിലെ ഭൂരിപക്ഷവും ഇടതുമുന്നണിയിലുണ്ട് എന്നത് ഈ കഥാകഥനത്തില്‍ മറച്ചുവയ്ക്കപ്പെടുന്നുണ്ട്. 2009ലെ കോണ്‍ഗ്രസോ യുപിഎയോ അല്ല 2014ല്‍ ജനവിധി തേടുന്നത്.

മതനിരപേക്ഷതയുടെ കൊടിയുയര്‍ത്തുന്ന ദേശീയ രാഷ്ട്രീയത്തിന് ഇടതുപക്ഷം കൂടുതല്‍ പ്രസക്തമാകണമെന്ന് ഓരോ കേരളീയനും തിരിച്ചറിയുന്ന കാലമാണിത്. യുഡിഎഫിനൊപ്പംനിന്ന ജനവിഭാഗങ്ങള്‍ അവരെ കൈവിട്ടിരിക്കുന്നു. ആയിരം ചോദ്യങ്ങളുമായി യുഡിഎഫിനെ കാത്തിരിക്കുന്ന ജനതയാണ് ഇവിടെയുള്ളത്. അവരോടൊപ്പം കൂടിയതോടെ, ആര്‍എസ്പിയുടെ യാത്ര, ചരിത്രത്തിന്റെ ചവറ്റുകൊട്ടയിലേക്കാണ്. മൂല്യങ്ങളേയും നിലപാടുകളേയും ധാര്‍മികതയേയും വെടിഞ്ഞ് സ്ഥാനമാനങ്ങള്‍ക്കായി ഒരു വ്യക്തി പോകുന്നത് തല്‍ക്കാലത്തേക്ക് വിജയം കണ്ടേക്കാം. അബ്ദുള്ളക്കുട്ടിമാരെയും ശെല്‍വരാജുമാരെയും ചൂണ്ടി അങ്ങനെ പറയാന്‍ കഴിയുമായിരിക്കാം. ഇവിടെ ഇടതുപക്ഷത്തെന്ന് ജനങ്ങള്‍ വിശ്വസിച്ച ഒരു പാര്‍ടിയെയാണ് അഖിലേന്ത്യാ നേതൃത്വം വിസമ്മതിച്ചിട്ടും സംസ്ഥാനകമ്മിറ്റിയെ കൈക്കലാക്കിയ ഒരു കൂട്ടം തട്ടിയെടുത്ത് യുഡിഎഫിന്റെ തൊഴുത്തില്‍ കെട്ടുന്നത്. അതിന് ചരിത്രം കരുതിവച്ച മറുപടി ഏറ്റുവാങ്ങാന്‍ തയ്യാറാവുക മാത്രമാണ് ആര്‍എസ്പിക്ക് ചെയ്യാനുള്ളത്. കാര്യം കണ്ടുകഴിഞ്ഞാല്‍ കറിവേപ്പിലപോലെ പുറത്തെറിയപ്പെടുന്ന ഒന്നായി കേരളാ ആര്‍എസ്പിയെന്ന ഈ കാലുമാറ്റ പാര്‍ടി മാറുമെന്ന് തീര്‍ച്ചയാണ്.
**അഡ്വ. കെ അനില്‍കുമാര്‍**

ശിങ്കിടി മുതലാളിത്തത്തിന്റെ അത്യാര്‍ത്തി

"തിളങ്ങുന്ന ഇന്ത്യ", സൂര്യപ്രകാശത്തില്‍, അക്ഷരാര്‍ഥത്തില്‍ത്തന്നെ 'വെയില്‍കായുക'യാണ്. സെന്‍സെക്സ് പുതിയ ഉയരങ്ങളിലേക്ക് കുതിച്ചുകൊണ്ടിരിയ്ക്കുന്നു. 22000 എന്ന അതിര്‍ത്തിയും അത് ഏറെക്കുറെ ഭേദിച്ചു കഴിഞ്ഞിരിക്കുന്നു. നിഫ്റ്റിയും റെക്കോര്‍ഡ് സൃഷ്ടിച്ചിരിക്കുന്നു. ഒരു പ്രമുഖ ഫൈനാന്‍സ് കമ്പനിയുടെ വക്താവിെന്‍റ വാക്കുകളിലൂടെ ഇന്ത്യയിലെ കോര്‍പറേറ്റുകള്‍ അതിനോട് ചടുലമായി പ്രതികരിച്ചത് ഇങ്ങനെയാണ്: "ലോകസഭാ തിരഞ്ഞെടുപ്പിനുശേഷം നരേന്ദ്രമോഡിയുടെ നേതൃത്വത്തിലുള്ള എന്‍ഡിഎ ഗവണ്‍മെന്‍റ് അധികാരത്തില്‍ വരുന്നതിനുള്ള സാധ്യത, ഈ കുതിപ്പിന് ഇന്ധനം പകര്‍ന്നുകൊണ്ടിരിക്കുന്നു". (ഹിന്ദുസ്ഥാന്‍ ടൈംസ്, 2014 മാര്‍ച്ച് 8). കടിഞ്ഞാണില്ലാത്തവിധം ലാഭം പരമാവധി കുന്നുകൂട്ടുന്നതിനുള്ള വ്യഗ്രതയില്‍, ഓഹരിവിപണിയിലെ ചാഞ്ചാട്ടങ്ങളെ വിശദീകരിയ്ക്കുന്നതിനായി ഇന്ത്യയിലെ കോര്‍പറേറ്റുകള്‍ "ഫാസ്റ്റ് ഫുഡ്" സമീപനമാണ് നിരന്തരം അവലംബിച്ചുവരുന്നത്. ഇത് മുമ്പ് പലപ്പോഴും സംഭവിച്ചിട്ടുണ്ട്.

ഓഹരിക്കമ്പോളത്തിലെ 1998ലെ പതനത്തിനുകാരണം, പ്രധാനമന്ത്രിയായി അധികാരമേല്‍ക്കാന്‍ തയ്യാറെടുത്തു നില്‍ക്കുന്ന വാജ്പേയിക്ക്, തെന്‍റ പിന്‍തുണയറിയിച്ചുകൊണ്ടുള്ള കത്ത് ജയലളിത അയച്ചുകൊടുക്കുന്നതില്‍ വന്ന കാലതാമസമാണ് എന്നാണ് പറയപ്പെട്ടത്. കിഴക്കന്‍ ഏഷ്യന്‍ സമ്പദ്വ്യവസ്ഥകള്‍ തകര്‍ന്നടിഞ്ഞ കാലമായിരുന്നു അത്. അതിെന്‍റ ഫലമായി ഉണ്ടായ അന്താരാഷ്ട്ര സാമ്പത്തികക്കുഴപ്പത്തെ ഇങ്ങനെയാണ് വിശേഷിപ്പിച്ചത്: "ഒരിടയ്ക്ക് ഏഷ്യന്‍ കടുവകള്‍ എന്ന് കരുതപ്പെട്ടിരുന്നവയുടെ എല്ലുകള്‍ തോട്ടിപ്പണിക്കാര്‍ വാരിക്കൂട്ടുന്ന അവസ്ഥയാണുണ്ടായത്". പിന്നീട് അന്താരാഷ്ട്ര സാമ്പത്തികക്കുഴപ്പം വീണ്ടും പ്രത്യക്ഷപ്പെട്ടപ്പോള്‍, അതിനെ അവഗണിച്ചത്, ഒന്നാം യുപിഎ ഗവണ്‍മെന്‍റിന് 2004ല്‍ ഇടതുപക്ഷ പാര്‍ടികള്‍ പുറത്തുനിന്നു നല്‍കിയ പിന്‍തുണയെ കുറ്റപ്പെടുത്തിക്കൊണ്ടാണ്.

അതുപോലെത്തന്നെ, അന്താരാഷ്ട്രവിപണികള്‍ ഒരു വലിയ വേലിയേറ്റത്തിെന്‍റ അവസ്ഥയിലാണ് എന്ന വസ്തുതയാണ് ഇന്ന് അവഗണിയ്ക്കപ്പെടുന്നത്. അമേരിക്കയിലെ ശമ്പളവിതരണം കൂടുതല്‍ ശക്തിപ്പെട്ടപ്പോള്‍, വാള്‍സ്ട്രീറ്റ് റെക്കോര്‍ഡ് തലത്തിലെത്തി. തൊഴിലില്ലായ്മ നിരക്ക് വര്‍ധിച്ചുകൊണ്ടിരിയ്ക്കുകയാണെങ്കില്‍ത്തന്നെയും, കഴിഞ്ഞ രണ്ടു മാസത്തിനുള്ളില്‍ നിരവധി പുതിയ തൊഴിലുകള്‍ ഉണ്ടായിട്ടുണ്ട്. ഇന്ത്യയിലേയ്ക്ക് വലിയ തോതില്‍ വിദേശ സ്ഥാപന നിക്ഷേപം ഒഴുകിവരുന്നതിന് ഇതിടയാക്കി. എന്നാല്‍ ഈ സുഖം ഏറെക്കാലം നിലനിന്നില്ല. ഉക്രെയ്നിലെ പ്രതിസന്ധിയും ചൈനയില്‍നിന്നുള്ള നിരുത്സാഹകരമായ വിവരങ്ങളും കാരണം യൂറോപ്യന്‍ വിപണിയില്‍നിന്നും ഏഷ്യന്‍ വിപണിയില്‍ നിന്നും നിഷേധാത്മകമായ വാര്‍ത്തകള്‍ വന്നതുമൂലമാണത്. അതിെന്‍റ ആഘാതം അധികം താമസിയാതെ ഇന്ത്യന്‍ വിപണിയിലും കാണാതിരിയ്ക്കില്ല. എന്നുതന്നെയല്ല, ഡോളറുമായുള്ള രൂപയുടെ മൂല്യം ശക്തിപ്പെടുകയും കറന്‍റ് അക്കൗണ്ട് ശിഷ്ടം മെച്ചപ്പെടുകയും ചെയ്ത സാഹചര്യത്തില്‍ (ഏറെ വൈകിയിട്ടാണെങ്കിലും ആഡംബരച്ചരക്കുകളുടെ ഇറക്കുമതിയില്‍ നിയന്ത്രണം ഏര്‍പ്പെടുത്തിയതിനു നന്ദി). പതിനെട്ടു മാസത്തിനുശേഷം ആഭ്യന്തര സാമ്പത്തിക അവസ്ഥകളോട് ഓഹരിവിപണിയും പ്രതികരിച്ചു തുടങ്ങിയിട്ടുണ്ട്. നമ്മുടെ ജനങ്ങളില്‍ മഹാഭൂരിപക്ഷത്തിെന്‍റയും ജീവിത പരിതഃസ്ഥിതിയില്‍, ഓഹരിവിപണിയിലെ ചാഞ്ചാട്ടങ്ങള്‍ വളരെ നിസ്സാരമായ സ്വാധീനമേ ചെലുത്തുന്നുള്ളൂ എന്നത് ശരി തന്നെ. എങ്കില്‍ത്തന്നെയും ഫിനാന്‍ഷ്യല്‍ വിപണികളെ സമീപിക്കുന്നതിനുള്ള കോര്‍പറേറ്റുകളുടെ കഴിവുകളെ നിര്‍ണയിക്കുന്നത് വിപണി മൂലധനവല്‍കരണത്തിെന്‍റ അളവാണ് എന്നതിനാല്‍ അത് സുപ്രധാനം തന്നെയാണ്. അതിനാല്‍ വിപണിയിലെ അനുകൂലചലനങ്ങളെ കൗശലത്തോടുകൂടി ഉയര്‍ത്തിപ്പിടിച്ചു നിര്‍ത്തുക എന്നത്, ഇന്ത്യയിലെ കോര്‍പറേറ്റുകളെ സംബന്ധിച്ചിടത്തോളം ലാഭം പരമാവധി വര്‍ധിപ്പിക്കുന്ന കാര്യത്തില്‍ നിര്‍ണായകം തന്നെയാണ്. ഇതാകട്ടെ, ശിങ്കിടി മുതലാളിത്തത്തിെന്‍റ വൈപുല്യം അളവുപരമായി വര്‍ധിപ്പിച്ചു നിര്‍ത്തിക്കൊണ്ട് ഭരണകൂടത്തെ വരുതിയില്‍ നിര്‍ത്താനുള്ള അവരുടെ കഴിവിനെ ആശ്രയിച്ചു നില്‍ക്കുകയും ചെയ്യുന്നു. ഇക്കാര്യത്തെക്കുറിച്ച് ഇതിനുമുമ്പും ചര്‍ച്ച ചെയ്തിട്ടുണ്ടല്ലോ. എന്നു തന്നെയല്ല, "ഇന്ത്യയ്ക്ക് ശിങ്കിടി മുതലാളിത്തത്തെ സഹിയ്ക്കാന്‍ കഴിയില്ല" എന്ന് ഒരിയ്ക്കല്‍ പാര്‍ലമെന്‍റില്‍ പ്രധാനമന്ത്രി അംഗീകരിക്കുകയും ചെയ്തിട്ടുള്ളത് ഓര്‍ക്കുക. എന്നിട്ടും രണ്ടാം യുപിഎ സര്‍ക്കാര്‍ അതിന് ഇത്ര കാലവും പ്രോല്‍സാഹനം നല്‍കിക്കൊണ്ടിരുന്നു.

"ഈയടുത്ത കാലത്തെ മാന്ദ്യത്തിെന്‍റ കാലത്തിലൊരിയ്ക്കലും കോര്‍പറേറ്റുകളുടെ ആകെ മൊത്തം സമ്പാദ്യത്തില്‍ ഇടിവുണ്ടായ ഒരൊറ്റ വര്‍ഷവും ഉണ്ടായിട്ടില്ല" എന്ന തെന്‍റ പ്രസ്താവനയിലൂടെ ഒരു പ്രമുഖ നിക്ഷേപക ബാങ്കിെന്‍റ എംഡി ഇതിന് സ്ഥിരീകരണം നല്‍കുന്നുമുണ്ട്. ഇന്ത്യയിലെ ഏറ്റവും വലിയ സ്വകാര്യമേഖലാ കമ്പനിയായ റിലയന്‍സ് ഇന്‍ഡസ്ട്രീസിന് 5.72 ശതമാനം വര്‍ധനയുണ്ടായപ്പോള്‍, ഏറ്റവും വലിയ ടെലകോം കമ്പനിയായ ഭാരതി എയര്‍ടെല്‍ 5.5 ശതമാനം കണ്ടാണ് വളര്‍ന്നത്; ഏറ്റവും വലിയ സ്വകാര്യ ബാങ്കായ ഐസിഐസിഐയ്ക്ക് 6 ശതമാനം കണ്ട് നേട്ടമുണ്ടായി. ഇന്ത്യയിലെ കോര്‍പറേറ്റുകള്‍ക്ക് ഗവണ്‍മെന്‍റ് വമ്പിച്ച അളവില്‍ സൗജന്യങ്ങള്‍ വാരിക്കോരി കൊടുത്തില്ലായിരുന്നുവെങ്കില്‍, ഇതൊന്നും സാധിയ്ക്കുമായിരുന്നില്ല. ഇത്തരം സൗജന്യങ്ങളും ഇഷ്ടദാനങ്ങളും തുടര്‍ന്നുകൊണ്ടുപോകാന്‍, ഇന്ത്യയിലെ കോര്‍പറേറ്റുകള്‍ക്ക് ഒരു "മിശിഹ"യെ, ശക്തനായ ഒരു നേതാവിനെ, ആവശ്യമുണ്ട്. അതിനാല്‍ ബിജെപിയുടെ പ്രധാനമന്ത്രിപദ മോഹിക്ക് ആര്‍പ്പുവിളിയ്ക്കാനുള്ള വൈതാളികരായി അവരില്‍ ചിലര്‍, തങ്ങളെ സ്വയം നിയമിയ്ക്കുകയാണ്. ഗുജറാത്തില്‍ മറ്റൊരിയ്ക്കലും ഉണ്ടായിട്ടില്ലാത്ത വിധത്തില്‍ വമ്പിച്ച അളവിലുള്ള സൗജന്യങ്ങളാണ് കോര്‍പറേറ്റുകള്‍ക്ക് നല്‍കിക്കൊണ്ടിരിയ്ക്കുന്നത്.

വിവരാവകാശ നിയമപ്രകാരം ലഭിച്ച കണക്കുകളില്‍, അത്തരം സൗജന്യങ്ങളുടെ ഒരു നീണ്ട പരമ്പര തന്നെ കാണാം. സൂറത്തിലെ ഹസീറയിലെ വ്യവസായ മേഖലയില്‍ കണ്ണായ സ്ഥലത്ത് എല്‍ ആന്‍റ് ടിയ്ക്ക് ലേലമൊന്നും കൂടാതെ 8 ലക്ഷം ചതുരശ്ര മീറ്റര്‍ സ്ഥലമാണ് മോഡി സര്‍ക്കാര്‍ വിട്ടുകൊടുത്തത്. ചതുരശ്ര മീറ്ററിന് അവിടെ 950 രൂപ വില വരും എന്ന് ഭൂകമ്മിറ്റി വിലയിരുത്തിയിട്ടുണ്ടെങ്കിലും ചതുരശ്ര മീറ്ററിന് ഒരു രൂപ വെച്ചാണ് എല്‍ ആന്‍റ് ടിയ്ക്ക് ഭൂമി നല്‍കിയത്! ടാറ്റയുടെ നാനോ കാര്‍ പദ്ധതിയ്ക്ക് ചതുരശ്ര മീറ്ററിന് 900 രൂപ വില വെച്ചാണ് 1,100 ഏക്കര്‍ സ്ഥലം വിറ്റത്. അതേ അവസരത്തില്‍ അവിടെ ചതുരശ്ര മീറ്ററിെന്‍റ വിപണി വില ഏതാണ്ട് 10,000 രൂപയായിരുന്നു. ടാറ്റയ്ക്ക് ആകെ നല്‍കിയ സൗജന്യങ്ങള്‍ കണക്കിലെടുത്താല്‍, ടാറ്റയുണ്ടാക്കുന്ന ഓരോ കാറിനും 60,000ല്‍ പരം രൂപ വെച്ച് സംസ്ഥാന ഖജനാവിന് ചെലവു വരും. എസ്സാര്‍, അദാനി തുടങ്ങിയ കോര്‍പറേറ്റ് ഗ്രൂപ്പുകള്‍ക്കും ഇതേ അളവിലുള്ള വമ്പിച്ച സൗജന്യങ്ങള്‍ നല്‍കിയിട്ടുണ്ട്. ആസൂത്രണ കമ്മീഷെന്‍റ തെണ്ടൂല്‍ക്കര്‍ കമ്മിറ്റി റിപ്പോര്‍ട്ട് അനുസരിച്ച് രാജ്യത്ത് ഏറ്റവും ഉയര്‍ന്ന ദാരിദ്ര്യ നിരക്കുള്ള ഗുജറാത്തിലെ "ഊര്‍ജസ്വലമായ വളര്‍ച്ച" അങ്ങിനെയാണ്. നാല് ലക്ഷത്തോളം കൃഷിക്കാര്‍ക്ക് വൈദ്യുതി കണക്ഷനില്ല. ഇപ്പോഴത്തെ മുഖ്യമന്ത്രിയുടെ ഭരണത്തിന്‍കീഴില്‍ 9829 തൊഴിലാളികളും 5447 കൃഷിക്കാരും 919 കൂലിവേലക്കാരും ആത്മഹത്യ ചെയ്തുവെന്ന് റിപ്പോര്‍ട്ട് ചെയ്യപ്പെടുന്നു. 2008 തൊട്ട് ഓരോ വര്‍ഷവും സംസ്ഥാനത്തിെന്‍റ കടഭാരം അനുക്രമം വര്‍ധിച്ചുകൊണ്ടിരിക്കുകയാണ്. 2011ല്‍ അത് 1,12,462 കോടി രൂപയില്‍ എത്തിയിരിക്കുന്നു. കൂടുതല്‍ ഇഷ്ടദാനങ്ങള്‍ ലഭിയ്ക്കണം എന്ന കോര്‍പറേറ്റുകളുടെ പ്രത്യാശ ന്യായം തന്നെയാണോ?  പ്രത്യേകിച്ചും അധ്വാനിക്കുന്ന ജനങ്ങളുടെ മൂര്‍ച്ഛിച്ചുകൊണ്ടിരിക്കുന്ന ദുരിതങ്ങളുടെ ചെലവിലാണ് അത് സംഭവിക്കുന്നത് എന്ന് വരുമ്പോള്‍? സംസ്ഥാനത്തിെന്‍റ മനുഷ്യ വികസന സൂചികകള്‍ വളരെ താഴ്ന്നു നില്‍ക്കുന്നതും വീണ്ടും ഇടിഞ്ഞുകൊണ്ടിരിക്കുന്നതും അധ്വാനിക്കുന്ന ജനങ്ങളുടെ ദുരിതത്തിെന്‍റ ദൃഷ്ടാന്തമാണല്ലോ. സ്റ്റീവന്‍ സ്പീല്‍ബെര്‍ഗിെന്‍റ "ഷിന്‍ഡ് ലേഴ്സ് ലിസ്റ്റ്" എന്ന വിഖ്യാതമായ സിനിമ ഓര്‍ക്കുക. ഹിറ്റ്ലറുടെ പൈശാചികമായ കോണ്‍സെന്‍ട്രേഷന്‍ ക്യാമ്പുകളില്‍ മരണം ഉറപ്പാക്കിക്കഴിയുന്ന ജൂതന്മാരുടെ ഒരു പട്ടിക ഉണ്ടാക്കുന്നതിനും അവരെ രക്ഷിക്കുന്നതിനുംവേണ്ടി ബിസിനസ്സുകാരനായ മുഖ്യകഥാപാത്രം ഹിറ്റ്ലറുടെ ഫാസിസ്റ്റ് വാഴ്ചയ്ക്ക് പിന്‍തുണ നല്‍കാന്‍ തയ്യാറാകുമ്പോള്‍, തെന്‍റ ഈ പിന്‍തുണയെ അയാള്‍ ന്യായീകരിക്കുന്നത് ഇങ്ങനെയാണ്: "ബിസിനസ്സിനുപറ്റിയ ഏറ്റവും നല്ല സമയമാണല്ലോ യുദ്ധം".

വല്ലപ്പോഴുമൊരിയ്ക്കല്‍ മനുഷ്യത്വപരമായ ഇത്തരം ചില പ്രകടനങ്ങള്‍ നടത്താറുണ്ടെങ്കിലും, ലാഭം പരമാവധി കുന്നുകൂട്ടുന്നതിനുള്ള ആള്‍ത്താരയില്‍ മനുഷ്യജീവനും സ്വാതന്ത്ര്യവും അന്തസ്സും അടക്കം എല്ലാം അക്ഷരാര്‍ഥത്തില്‍ത്തന്നെ സമര്‍പ്പിയ്ക്കപ്പെടുമല്ലോ. ഇന്ത്യന്‍ കോര്‍പറേറ്റുകളുടെ അത്യാഗ്രഹം നടക്കുകയാണെങ്കില്‍ത്തന്നെ, വര്‍ഗീയ കൂട്ടക്കൊലകളുടെയും ശിങ്കിടി മുതലാളിത്തത്താല്‍ ഉത്തേജിപ്പിയ്ക്കപ്പെട്ട ഹിമാലയന്‍ അഴിമതിയുടെയും ചെലവേറിയ സന്നാഹങ്ങളോടെയായിരിക്കും അത് നടപ്പാക്കപ്പെടുക. അതിെന്‍റ അനന്തരഫലമായ ഭീകരമായ മനുഷ്യാവകാശ ലംഘനങ്ങളും സിവില്‍ സ്വാതന്ത്ര്യ ലംഘനങ്ങളും സമുദായ സാഹോദര്യത്തിെന്‍റ തകര്‍ച്ചയും, ഇന്ത്യയുടെ സമ്പന്നവും വര്‍ണശബളവുമായ നാനാത്വത്തെ സംബന്ധിച്ചിടത്തോളം ഏറെ വിനാശകരമായിരിക്കും. എന്നു തന്നെയല്ല, ജനങ്ങളില്‍ മഹാഭൂരിപക്ഷത്തിെന്‍റയും ജീവിതഗുണനിലവാരം നിശിതമായി ഇടിയുന്നതിനും അതിടയാക്കും എന്നത് അതിനേക്കാള്‍ ദോഷകരമായിരിക്കും. "തിളങ്ങുന്ന ഇന്ത്യ" എന്ന ഒരു വളരെ ചെറിയ ന്യൂനപക്ഷത്തിെന്‍റ മാത്രമല്ല, എല്ലാ ജനങ്ങളുടെയും വര്‍ധിച്ച സാമ്പത്തിക അഭിവൃദ്ധിയോടുകൂടിയ സാമ്പത്തിക വളര്‍ച്ച കൈവരുത്തുന്ന ബദല്‍ നയമാണ് ഇന്ന് ഇന്ത്യയ്ക്കാവശ്യം. അത്തരമൊരു ബദല്‍നയം സാധ്യമാണ് എന്നു തന്നെയല്ല, നല്ല നിലയില്‍ കൈവരിയ്ക്കാനും കഴിയും.

**സീതാറാം യെച്ചൂരി**

ഉമ്മന്‍ചാണ്ടിയുടെ മറ്റൊരു കുതിരക്കച്ചവടം

ആര്‍എസ്പി നേതാക്കള്‍ കൊല്ലം പാര്‍ലമെന്റ് സീറ്റില്‍ ആ പാര്‍ടി ഇത്തവണ മത്സരിക്കാന്‍ ആഗ്രഹിക്കുന്നു എന്ന് ഉഭയകക്ഷി ചര്‍ച്ചയില്‍ സിപിഐ എം നേതാക്കളെ അറിയിച്ചപ്പോള്‍ അതില്‍ അവരുടെ പതിവ് ആഗ്രഹപ്രകടനത്തില്‍ കൂടുതലൊന്നും പാര്‍ടി നേതാക്കള്‍ക്ക് കാണാന്‍ കഴിഞ്ഞില്ല. മറ്റ് ഘടകകക്ഷി നേതാക്കളൊന്നും അത്തരം പതിവില്ലാത്ത ഒരു നീക്കം ആര്‍എസ്പി നേതൃത്വത്തിന്റെ ഭാഗത്തുള്ളതായി സൂചിപ്പിച്ചുമില്ല. ഉഭയകക്ഷി ചര്‍ച്ച എല്‍ഡിഎഫ് ചര്‍ച്ചയ്ക്ക് മുന്നോടിയാണ്. അതില്‍ കഴിഞ്ഞ മൂന്നുതവണ സിപിഐ എം മത്സരിച്ച സീറ്റ് കൊടുക്കണമെന്ന് ആര്‍എസ്പി ആവശ്യപ്പെട്ടു. അത്തരം തര്‍ക്കങ്ങള്‍ എല്‍ഡിഎഫില്‍ ചര്‍ച്ചചെയ്യുകയാണ് പതിവ്. ഇത്തവണയും അങ്ങനെ ചെയ്യുമെന്ന് പറഞ്ഞെങ്കിലും, ആര്‍എസ്പി എല്‍ഡിഎഫ് യോഗത്തില്‍ പങ്കെടുത്തില്ല. പകരം അവര്‍ ചെയ്തത് കെപിസിസി പ്രസിഡന്റിനെയും മുന്‍ കെപിസിസി പ്രസിഡണ്ടിനെയും കണ്ട് കൊല്ലം സീറ്റ് ആവശ്യപ്പെടുകയാണ്. അവരാകട്ടെ, കോണ്‍ഗ്രസിന്റെ സിറ്റിങ് സീറ്റ് ആര്‍എസ്പിക്ക് അവര്‍ യുഡിഎഫില്‍ ചേരുന്നപക്ഷം കൊടുക്കാമെന്ന് വാക്കുകൊടുത്തു.

ഇതില്‍നിന്ന് ഒരു കാര്യം വ്യക്തമാണ്. ആര്‍എസ്പി നേതാക്കള്‍ കോണ്‍ഗ്രസിന്റെ സംസ്ഥാനനേതാക്കളുമായും അഖിലേന്ത്യാ നേതൃത്വവുമായിപോലും യുഡിഎഫില്‍ ചേരുന്ന കാര്യവും അതിന്റെ വിലയായി കൊല്ലം പാര്‍ലമെന്റ് സീറ്റ് അവര്‍ക്ക് കൊടുക്കുന്ന കാര്യവും ചര്‍ച്ചചെയ്തിരുന്നു. 2009ലെ തിരഞ്ഞെടുപ്പ് കാലത്ത് എല്‍ഡിഎഫ് വിട്ട് യുഡിഎഫില്‍ കയറിയ എം പി വീരേന്ദ്രകുമാറിന്റെ സോഷ്യലിസ്റ്റ് ജനതാ പാര്‍ടിക്ക് അവര്‍ ആവശ്യപ്പെട്ട സീറ്റുകളില്‍ ഒന്നുപോലും കൊടുക്കാതിരിക്കാന്‍ പറഞ്ഞ ന്യായം സിറ്റിങ് സീറ്റൊന്നും കൊടുക്കരുത് എന്ന പാര്‍ടി ഹൈക്കമാണ്ട് നിര്‍ദേശമുണ്ട് എന്നായിരുന്നു. ആ നിര്‍ദ്ദേശം ആര്‍എസ്പിക്ക് ബാധകമാക്കാതിരിക്കണമെങ്കില്‍, ആര്‍എസ്പി സീറ്റ് ആവശ്യപ്പെട്ട് ചെല്ലുമ്പോള്‍ എല്‍ഡിഎഫ് വിട്ടുചെന്നാല്‍ അത് കൊടുക്കുന്ന കാര്യം പരിഗണിക്കാമെന്ന് കെപിസിസി പ്രസിഡന്റ് വാക്കുകൊടുക്കണമെങ്കില്‍, അവര്‍ തമ്മില്‍ അതിന് എത്രയോ മുമ്പുതന്നെ കൂടിയാലോചനയും വിലപേശലും ആരംഭിച്ചിരുന്നു എന്ന് വ്യക്തം. ആര്‍എസ്പി അഖിലേന്ത്യാതലത്തില്‍ ഇടതുമുന്നണിയുടെ ഭാഗമാണ്. അത് വിടുന്നതായി ആ പാര്‍ടിയുടെ ജനറല്‍സെക്രട്ടറി പറഞ്ഞിട്ടില്ല. പശ്ചിമബംഗാളില്‍ ഇടതുമുന്നണിയുടെ ഭാഗമായി അവര്‍ മൂന്നു സീറ്റില്‍ മത്സരിക്കുകയും ചെയ്യുന്നു. ഇവിടെ എല്‍ഡിഎഫിലെ വിവിധകക്ഷികള്‍ തമ്മില്‍ ഉഭയതല ചര്‍ച്ചയും എല്‍ഡിഎഫ് കൂട്ടായി ചര്‍ച്ചചെയ്ത് അന്തിമ തീരുമാനമെടുക്കലും പൂര്‍ത്തിയാകുംമുമ്പ് സിപിഐ എമ്മുമായി ഉഭയകക്ഷി ചര്‍ച്ച നടത്തിയ ഉടനെ അവര്‍ യുഡിഎഫ് പാളയത്തിലേക്ക് നീങ്ങിയത് യാദൃച്ഛികമായോ പെട്ടെന്നോ ആണെന്ന് പറഞ്ഞാല്‍ ആരും വിശ്വസിക്കില്ല. ആര്‍എസ്പിയുടെ പശ്ചിമബംഗാള്‍ കമ്മിറ്റി സെക്രട്ടറി ക്ഷിതിഗോസ്വാമിയും കേന്ദ്ര നേതൃത്വത്തിലുള്ള അബനിറോയിയും കേരള ഘടകത്തിന്റെ നീക്കത്തെ വിമര്‍ശിച്ചിട്ടുണ്ട്. വാസ്തവത്തില്‍ ആ പാര്‍ടിയുടെ രാഷ്ട്രീയാടിത്തറയെത്തന്നെ ചോദ്യംചെയ്യുകയാണ് കൊല്ലം സീറ്റിനുവേണ്ടി കേരള ആര്‍എസ്പി നേതൃത്വം ചെയ്തത്. അത് അവരുടെ അവസരവാദ നിലപാടിനെ തുറന്നുകാട്ടുന്നു.

ഇവിടെ കൂടുതല്‍ തുറന്നുകാട്ടപ്പെടുന്നത് കോണ്‍ഗ്രസിന്റെ രാഷ്ട്രീയ കാപട്യവും അധാര്‍മികതയുമാണ്. നേരിയ ഭൂരിപക്ഷമാണ് സീറ്റിന്റെ കാര്യത്തില്‍ ഇത്തവണ 2011ല്‍ യുഡിഎഫിനുള്ളത്. വോട്ടിന്റെ കാര്യത്തില്‍ എല്‍ഡിഎഫിനാണ് ആ വോട്ടെടുപ്പില്‍ ഭൂരിപക്ഷം. സീറ്റിന്റെ കാര്യത്തിലുള്ള അസന്ദിഗ്ധാവസ്ഥ തരണംചെയ്യാനായിരുന്നു നെയ്യാറ്റിന്‍കര എംഎല്‍എ സെല്‍വരാജിനെ കാലുമാറ്റി കോണ്‍ഗ്രസിലേക്ക് കൊണ്ടുപോയത്. രണ്ടു സീറ്റുള്ള ഒരു പാര്‍ടിയെ തങ്ങള്‍ ചാക്കിലാക്കി എന്ന് യുഡിഎഫിന്റെ വക്താക്കള്‍ അവകാശപ്പെട്ടിരുന്നു. എന്‍സിപിയെക്കുറിച്ച് തല്‍പരകക്ഷികള്‍ ആ തരത്തില്‍ വാര്‍ത്തകള്‍ പരത്തുകയും ചെയ്തിരുന്നു. ചാക്കുതുറന്നത് അവര്‍ക്കുവേണ്ടിയായിരുന്നില്ല, ആര്‍എസ്പിക്ക് വേണ്ടിയായിരുന്നു എന്ന് ഇപ്പോള്‍ വ്യക്തമായി. ആഗോളവല്‍ക്കരണത്തോടും തൊഴിലാളി ദ്രോഹത്തോടും ജനവഞ്ചനയോടും എന്‍ കെ പ്രേമചന്ദ്രനും കൂട്ടരും പ്രകടിപ്പിച്ചത് പൊറാട്ടുനാടകമാണെന്ന് ഇതോടെ തെളിഞ്ഞു.

ഇത്രയേറെ അഴിമതി, ഇത്രയേറെ കോര്‍പറേറ്റ് പ്രീണനം, ഇത്രയേറെ വിലക്കയറ്റം ഇത്രയേറെ ജനവഞ്ചനയും ജനദ്രോഹവും ചെയ്ത ഒരു കേന്ദ്ര ഗവണ്‍മെന്റ് മുമ്പുണ്ടായിട്ടില്ല. അതിനെ പുറത്താക്കാനും പകരം അധികാരമേല്‍ക്കാന്‍ വെമ്പിനടക്കുന്ന നരേന്ദ്രമോഡിയുടെ നേതൃത്വത്തിലുള്ള ബിജെപിയെയും വര്‍ഗീയ പരിവാരത്തെയും ഒഴിവാക്കി ജനങ്ങളോട് പ്രതിബദ്ധതയുള്ള മതനിരപേക്ഷജനാധിപത്യ ഗവണ്‍മെന്റ് രൂപീകരിക്കുന്നതിന് ആവശ്യമായ അടിത്തറപാകുന്നതിനും ഇടതുപക്ഷ പാര്‍ടികള്‍ രാഷ്ട്രീയവേദിയില്‍ ശ്രമിച്ചുകൊണ്ടിരിക്കുമ്പോഴാണ് അതിനെ പിന്നില്‍നിന്നു കുത്തുന്നതരത്തില്‍ ആര്‍എസ്പിയുടെ കേരളഘടകം ഏകപക്ഷീയമായി കോണ്‍ഗ്രസ് പാളയത്തില്‍ ചേക്കേറിയത്. അതിനെതിരെ ആ പാര്‍ടിയുടെ പല ഘടകങ്ങളില്‍നിന്നും അണികളില്‍നിന്നും രാഷ്ടീയബോധവും സാമൂഹ്യ പ്രതിബദ്ധതയും വിവേകവുമുള്ള നിരവധിപേര്‍ അണിനിരക്കുന്നതായി കാണുന്നു. അത് ആ പാര്‍ടിയുടെ കേരളഘടകത്തെ ബാധിച്ചിരിക്കുന്ന സ്വാര്‍ഥ താല്‍പര്യത്തോടും സങ്കുചിത മനോഭാവത്തോടും ജനവിരുദ്ധതയോടും വിധേയരല്ലാത്ത പലരും അതില്‍ ഇനിയുമുണ്ട് എന്ന് വെളിവാക്കുന്നു. ആര്‍എസ്പിയില്‍ ഇടതുപക്ഷ രാഷ്ട്രീയത്തിന് ഇനിയും വേരോട്ടമുണ്ട് എന്ന് അത് വിളിച്ചോതുന്നു. കേരളത്തിലെ ആര്‍എസ്പി നേതൃത്വം ചെയ്ത രാഷ്ട്രീയ വഞ്ചന യഥാര്‍ഥത്തില്‍ സിപിഐ എം നേതൃത്വത്തോടല്ല, സിപിഐ എമ്മിനോടുമല്ല; പിന്നെയോ കേരളത്തിലെ ഇടതുപക്ഷ പ്രസ്ഥാനത്തോടാണ്, അതില്‍ വിശ്വാസം അര്‍പ്പിച്ചിട്ടുള്ള ജനസഞ്ചയത്തോടാണ്, കേരളത്തിന്റെ ഇടതുപക്ഷ മനസ്സിനോടാണ്. ഇവിടെ അവസര സമത്വവും സാമൂഹ്യനീതിയും പ്രതീക്ഷിച്ചു നില്‍ക്കുന്ന ജന ലക്ഷങ്ങളെ വഞ്ചിച്ചാണ് അവര്‍ യുഡിഎഫ്പാളയത്തില്‍ ചേക്കേറിയിരിക്കുന്നത്. രാഷ്ട്രീയമായ സത്യസന്ധത ഉണ്ടെങ്കില്‍ അവര്‍ പാളയം മാറുന്നതിനുമുമ്പ്, അതിന്റെ പേരില്‍ ആര്‍എസ്പി നേതാക്കള്‍ പ്രതിഫലങ്ങള്‍ ഏറ്റുവാങ്ങുന്നതിനുമുമ്പ് എല്‍ഡിഎഫിന്റെ മേല്‍വിലാസത്തില്‍ നേടിയെടുത്ത സ്ഥാനമാനങ്ങള്‍ മുഴുവന്‍ ഉപേക്ഷിക്കേണ്ടതായിരുന്നു. യുഡിഎഫിന് നിയമ സഭയില്‍ രണ്ടു സീറ്റ് വര്‍ധിച്ചു എന്നും മറ്റുള്ള പത്രവാര്‍ത്തകള്‍ സൂചിപ്പിക്കുന്നത് അവരും യുഡിഎഫ് നേതൃത്വവും എല്‍ഡിഎഫിന്റെ പേരില്‍ നേടിയെടുത്ത സ്ഥാനമാനങ്ങള്‍ ഉപേക്ഷിക്കാന്‍ തയ്യാറല്ല എന്നാണ്. അതാണ് അവരുടെ നിലപാടെങ്കില്‍, അതിനെക്കാള്‍ നാണംകെട്ടതും അധാര്‍മികവുമായ നില അവര്‍ സ്വീകരിക്കാനില്ല. ഏതെങ്കിലും പാര്‍ടിയോ പാര്‍ടി അംഗമോ രാഷ്ട്രീയമായ അഭിപ്രായവ്യത്യാസത്തിന്റെപേരില്‍ പാര്‍ടിയോ മുന്നണിയോ വിടുന്നത് മനസ്സിലാക്കാം. എന്നാല്‍, സെല്‍വരാജായാലും ആര്‍എസ്പിയായാലും എല്‍ഡിഎഫ് വിട്ട് യുഡിഎഫിലേക്ക് ചേക്കേറിയത് രാഷ്ട്രീയമായ കാരണങ്ങളാലല്ല. മറ്റ് തരത്തിലുള്ള പ്രതിഫലം പ്രതീക്ഷിച്ചും നേടിയുമാണ്. അങ്ങനെ വ്യക്തിയെയും പാര്‍ടിയെയും കാലുമാറ്റത്തിന് പ്രേരിപ്പിക്കുന്ന കോണ്‍ഗ്രസ് നേതൃത്വം തീര്‍ത്തും അധാര്‍മികവും രാഷ്ട്രീയ കുതിരക്കച്ചവടത്തിന്റേതുമായ സമീപനമാണ് സ്വീകരിച്ചിരിക്കുന്നത്. പീലിപ്പോസ് തോമസും അബ്ദുള്‍ റഹ്മാനും എല്‍ഡിഎഫ് സ്ഥാനാര്‍ഥികളായത് കോണ്‍ഗ്രസിലെ സ്ഥാനമാനങ്ങള്‍ രാജിവെച്ചശേഷമാണ്. അതിനാല്‍ അവരുടെ നടപടിയും ആര്‍എസ്പിയുടെ നടപടിയും തമ്മില്‍ ഒരു സാമ്യവുമില്ല. അവര്‍ കാണിച്ചത് രാഷ്ട്രീയ സത്യസന്ധതയാണ്. ആര്‍എസ്പി കാണിച്ചത് നഗ്നമായ വഞ്ചനയാണ്. സോളാര്‍ കുംഭകോണത്തിനും സലിംരാജിന്റെ ഭൂമി തട്ടിപ്പിനും രക്ഷാധികാരിത്വം വഹിച്ചതിനു സമാനമായ നടപടിയാണ് ഉമ്മന്‍ചാണ്ടിയുടെ നേതൃത്വത്തില്‍ കോണ്‍ഗ്രസ് ഇക്കാര്യത്തില്‍ കൈക്കൊണ്ടിരിക്കുന്നത്.

രാഷ്ട്രീയമായ ധാര്‍മികതയുടെയും സത്യസന്ധതയുടെയും ആള്‍രൂപമാണ് എന്ന് അവകാശപ്പെടുന്ന വി എം സുധീരനാണ് ആര്‍എസ്പിയുമായുള്ള ഈ കുതിരക്കച്ചവടത്തിന് കെപിസിസി പ്രസിഡണ്ട് എന്ന നിലയില്‍ കാര്‍മികത്വം വഹിച്ചത്. അത് അദ്ദേഹത്തിന്റെ ധാര്‍മിക പരിവേഷത്തിന്റെ തനിനിറം വെളിവാക്കുന്നു. ഇത്തവണ തിരഞ്ഞെടുപ്പ് പ്രഖ്യാപിച്ചപ്പോള്‍ മുതല്‍ നിരവധി രാഷ്ട്രീയ നേതാക്കള്‍ അവരുടെ പാര്‍ടിയില്‍നിന്ന് രാജിവെച്ച് കൂടുതല്‍ സുരക്ഷിതമായ ഇടങ്ങള്‍ തേടിപ്പോകുന്ന കാഴ്ചയാണ് വിവിധ സംസ്ഥാനങ്ങളില്‍ കാണപ്പെടുന്നത്. ഏറ്റവും അധികംപേര്‍ ഉപേക്ഷിച്ചത് കോണ്‍ഗ്രസ് പാര്‍ടിയെയാണ്. അധികാരത്തിലേറാന്‍പോകുന്നു എന്ന് സ്വയം അവകാശപ്പെടുന്ന ബിജെപിയില്‍ നിന്നുമുണ്ട് രാജികള്‍. ഇത്തരം കൂടുവിട്ട് കൂടുമാറ്റം താരതമ്യേന ഇല്ലാത്തത് ഇടതുപക്ഷത്താണ്. താരതമ്യേന ആ പകര്‍ച്ചവ്യാധി ഏറ്റവും കുറവ് ബാധിച്ച സംസ്ഥാനമാണ് കേരളം. പക്ഷേ ഇവിടെ പേമെന്റ് സീറ്റിന് അപ്പുറം പേമെന്റ് പാര്‍ടിയുണ്ടായി എന്നതാണ് കേരളത്തിലെ കാലുമാറ്റ കച്ചവടത്തില്‍ ഇത്തവണ കാണാവുന്ന സവിശേഷത.

എ കെ ജി യേയും ഇ എം എസ്സിനേയും ഓര്‍ക്കുമ്പോള്‍

സഖാവ് എ കെ ജിയുടെ 37ാം ചരമവാര്‍ഷികദിനമാണ് മാര്‍ച്ച് 22ന് നാം ആചരിക്കുന്നതെങ്കില്‍, സഖാവ് ഇ എം എസ്സിെന്‍റ പതിനാറാം ചരമവാര്‍ഷികദിനമാണ് മാര്‍ച്ച് 19ന് ആചരിക്കുന്നത്. അവിഭക്ത കമ്യൂണിസ്റ്റ് പാര്‍ടിയുടെ ആദ്യകാല സജീവ പ്രവര്‍ത്തകരും നേതാക്കന്മാരും ആയിരുന്നു രണ്ടുപേരുമെങ്കില്‍, ഇ എം എസ്, കേരളത്തിലെ ആദ്യത്തെ കമ്യൂണിസ്റ്റ് ഗ്രൂപ്പിലെ ഒരംഗം തന്നെയായിരുന്നു. കേരളത്തിലെ കോണ്‍ഗ്രസ് സോഷ്യലിസ്റ്റ് പാര്‍ടി ഒന്നടങ്കം കമ്യൂണിസ്റ്റ് പാര്‍ടിയായി മാറിയ പാറപ്പുറം സമ്മേളനത്തിനു പിന്നിലെ സജീവ പ്രേരകശക്തിയായിരുന്നു ഇരുവരുമെങ്കില്‍, സിപിഐയുടെ നാഷണല്‍ കൗണ്‍സിലില്‍നിന്ന് ഇറങ്ങിപ്പോന്ന മുപ്പത്തിരണ്ടുപേരില്‍ മുന്നില്‍ത്തന്നെയുണ്ടായിരുന്നു ഇരുവരും. അങ്ങിനെ അവിഭക്ത കമ്യൂണിസ്റ്റ് പ്രസ്ഥാനത്തിെന്‍റയും പിന്നീട് സിപിഐ എമ്മിെന്‍റയും ചരിത്രത്തിലെ അവിഭാജ്യ ഘടകങ്ങളായ അവര്‍, കേരളത്തിെന്‍റ സാമൂഹ്യ  രാഷ്ട്രീയ ചരിത്രങ്ങള്‍ മാറ്റിയെഴുതുന്നതില്‍ തോളോടുതോള്‍ചേര്‍ന്ന് പൊരുതി.

തൊഴിലാളിവര്‍ഗത്തിെന്‍റ ദത്തുപുത്രന്മാരായ അവര്‍ ഇരുവരും സാമൂഹ്യ പരിഷ്കരണ പ്രസ്ഥാനത്തിലൂടെ പുരോഗമന പ്രസ്ഥാനത്തിലേക്കും ദേശീയ സ്വാതന്ത്ര്യ പ്രസ്ഥാനത്തിലേക്കും തൊഴിലാളിവര്‍ഗ പ്രസ്ഥാനത്തിലേക്കും കടന്നുവന്നു. കോളേജ് വിദ്യാഭ്യാസം പകുതിയ്ക്ക്വെച്ച് ഉപേക്ഷിച്ച് തൃശ്ശൂരില്‍നിന്ന് വണ്ടി കയറി, കോഴിക്കോട് കടപ്പുറത്തുവെച്ച് ഉപ്പുകുറുക്കിക്കൊണ്ട് ദേശീയ പ്രസ്ഥാനത്തിെന്‍റ തീച്ചൂളയിലേക്ക് എടുത്തുചാടിയ ഇ എം എസ്സും തുടക്കത്തില്‍ അയിത്തോച്ചാടന പ്രവര്‍ത്തനങ്ങളിലും കര്‍ഷക പ്രസ്ഥാനത്തിലും സജീവമായി പ്രവര്‍ത്തിച്ചുകൊണ്ട് ഗുരുവായൂരിലെ ക്ഷേത്ര പ്രവേശന സമരത്തിലൂടെ ദേശീയ പ്രസ്ഥാനത്തിലേക്ക് ഉയര്‍ന്നുവന്ന എ കെ ജിയും പിന്നീട് കമ്യൂണിസ്റ്റ് പ്രസ്ഥാനത്തിെന്‍റ അവിസ്മരണീയ നേതാക്കന്മാരായി ഉയര്‍ന്നു. സംഘടനയ്ക്ക് പ്രത്യയശാസ്ത്രപരമായ ദൃഢത കൈവരുത്തുന്നതിലാണ് ഒരാള്‍ ബദ്ധശ്രദ്ധനായതെങ്കില്‍, അധ്വാനിക്കുന്ന ജനവിഭാഗങ്ങളുടെ ദൈനംദിന പ്രശ്നങ്ങള്‍ ഉയര്‍ത്തിപ്പിടിച്ചുകൊണ്ട് അവരെ സമര സജ്ജരാക്കുന്നതിലായിരുന്നു അപരെന്‍റ പ്രാഗത്ഭ്യം. പ്രത്യയശാസ്ത്രപരമായ ദൃഢതയും സമരോത്സുകതയും അഥവാ സിദ്ധാന്തവും പ്രയോഗവും ഒരേ നാണയത്തിെന്‍റ അവിഭാജ്യമായ രണ്ട് വശങ്ങളാണെന്ന് അവര്‍ തെളിയിച്ചു. അതുകൊണ്ടുതന്നെ കമ്യൂണിസ്റ്റ് പ്രസ്ഥാനത്തിെന്‍റ അവിഭാജ്യമായ രണ്ട് ഘടകങ്ങളുടെ സജീവ പ്രതീകങ്ങളായ അവര്‍ രണ്ടുപേരുടെയും യോജിച്ചുള്ള പ്രവര്‍ത്തനം പാര്‍ടിയുടെ, അജയ്യമായ വളര്‍ച്ചയ്ക്ക് വഴിയൊരുക്കി. അന്നത്തെ മലബാറിെന്‍റ വടക്കേ അറ്റത്തുനിന്ന് (മദിരാശി) സംസ്ഥാനത്തിെന്‍റ തലസ്ഥാനമായ മദിരാശിയിലേക്ക് നടത്തിയ ഐതിഹാസികമായ പട്ടിണിമാര്‍ച്ച് മുതല്‍ പഞ്ചാബിലെ ബെറ്റര്‍മെന്‍റ് സമരവും അമരാവതി  പുരുളി  കീരിത്തോട് സമരവും മിച്ചഭൂമി സമരവും മുടവന്‍മുകള്‍ സമരവും അടക്കം എണ്ണിയാലൊടുങ്ങാത്ത സമരങ്ങളിലൂടെ കേരളത്തിെന്‍റ ചരിത്രം തന്നെ മാറ്റിയെഴുതിയ എ കെ ജി, എവിടെ അന്യായം കണ്ടാലും, അവിടെ ഓടിയെത്തുമായിരുന്നു; അടിച്ചമര്‍ത്തപ്പെട്ടവരുടെ ഭാഗത്ത് നിലയുറപ്പിച്ച് അവര്‍ക്കുവേണ്ടി പൊരുതുമായിരുന്നു.

തെന്‍റ സ്വത്തു മുഴുവനും ദേശാഭിമാനി പത്രത്തിനും പാര്‍ടിയ്ക്കും വേണ്ടി സമര്‍പ്പിച്ച ഇ എം എസ് ആകട്ടെ, തെന്‍റ ജീവസ്പന്ദനം നിലയ്ക്കുംവരെ, പാര്‍ടിയ്ക്കും തൊഴിലാളിവര്‍ഗത്തിനുംവേണ്ടി നിരന്തരം എഴുതിക്കൊണ്ടിരുന്നു. സാധാരണക്കാരെന്‍റ ഒരു പുരുഷായുസ്സുകൊണ്ട് ഒരാള്‍ക്ക് വായിച്ചു തീര്‍ക്കാന്‍ കഴിയാത്തത്ര ലേഖനങ്ങള്‍ അദ്ദേഹം എഴുതി. ദേശാഭിമാനിയ്ക്കുള്ള ലേഖന പരമ്പരയുടെ അവസാന അധ്യായം കൂടി പറഞ്ഞുകൊടുത്തെഴുതിച്ച്, അതു വായിച്ചുനോക്കി തിരുത്തിയതിനുശേഷമാണ്, അദ്ദേഹം പേന താഴെവെച്ച്, പതുക്കെ അന്ത്യവിശ്രമത്തിലേക്ക് നീങ്ങിയത്. എ കെ ജിയും ഇ എം എസ്സും അന്തരിക്കുന്നത്, ഇന്ത്യാ ചരിത്രത്തിെന്‍റ രണ്ട് പ്രത്യേക ദശാസന്ധികളുടെ ആരംഭത്തിലാണ്. ഇന്ദിരാഗാന്ധിയുടെ സ്വേച്ഛാധിപത്യവാഴ്ചയും അടിയന്തിരാവസ്ഥയും അവസാനിപ്പിച്ച് കേന്ദ്രത്തില്‍ ജനതാ പാര്‍ടിയുടെ ഭരണം ആരംഭിച്ച ഘട്ടത്തിലാണ് എ കെ ജി നമ്മെ വിട്ടു പിരിയുന്നത്. അടിയന്തിരാവസ്ഥയ്ക്കെതിരായി പാര്‍ലമെന്‍റിലും പുറത്തും വീറോടെ പൊരുതിയ അദ്ദേഹത്തിന്, അടിയന്തിരാവസ്ഥ പൂര്‍ണമായി പിന്‍വലിച്ചതായ പ്രഖ്യാപനം കേള്‍ക്കുന്നതിനുള്ള അവസരം അവസാന ദിവസം ആശുപത്രിയില്‍ കിടക്കുമ്പോഴുണ്ടായി. കോണ്‍ഗ്രസ്സിെന്‍റ ഏകകക്ഷി ഭരണം അവസാനിപ്പിക്കുക, ജനാധിപത്യം പുനഃസ്ഥാപിക്കുക എന്നതായിരുന്നു 1977ലെ മുദ്രാവാക്യമെങ്കില്‍ കോണ്‍ഗ്രസ്സിെന്‍റ ദുര്‍ഭരണത്തിനും ബിജെപിയുടെ വര്‍ഗീയതയ്ക്കും എതിരായി മൂന്നാം ബദല്‍ കെട്ടിപ്പടുക്കുക എന്നതായിരുന്നു 1998ലെ ആവശ്യം. 199698 കാലത്തെ ദേവഗൗഡ  ഐ കെ ഗുജ്റാള്‍ ഗവണ്‍മെന്‍റുകള്‍ ആ വഴിയ്ക്കുള്ള വിജയകരമായ നീക്കമായിരുന്നുവെങ്കില്‍, 1998 മാര്‍ച്ചില്‍ വാജ്പേയ് ഗവണ്‍മെന്‍റ് അധികാരത്തിലേറാന്‍ തുനിഞ്ഞുനില്‍ക്കുന്ന സന്ദര്‍ഭത്തിലാണ് ഇ എം എസ് നമ്മെ വിട്ടു പിരിയുന്നത്. ഇവര്‍ ഇരുവരും ആ കാലത്ത് ഉയര്‍ത്തിയ മുദ്രാവാക്യത്തിന് കൂടുതല്‍ പ്രസക്തി കൈവന്ന ഒരു രാഷ്ട്രീയ ദശാസന്ധിയെയാണ് നാമിന്ന് അഭിമുഖീകരിക്കുന്നത്. 1967ല്‍ ഇ എം എസ് വിജയകരമായി പ്രാവര്‍ത്തികമാക്കി കാണിച്ചു തന്ന കോണ്‍ഗ്രസ് വിരുദ്ധ ഐക്യമുന്നണി ഗവണ്‍മെന്‍റ് എന്ന ആശയത്തിെന്‍റ കൂടുതല്‍ വിപുലവും വ്യക്തവുമായ കോണ്‍ഗ്രസിതര  ബിജെപി ഇതര ബദല്‍ എന്ന മുന്നണി രൂപം അനിവാര്യവും പ്രായോഗികമായി സാധ്യവുമായ ഒരു രാഷ്ട്രീയ സ്ഥിതിയാണിന്നുള്ളത്.

ദേശീയ രാഷ്ട്രീയരംഗവും എത്രമാത്രം സങ്കീര്‍ണവും കലുഷിതവുമാണെങ്കിലും ശരി, നവലിബറല്‍ സാമ്പത്തിക നയങ്ങള്‍ മുറുകെ പിടിയ്ക്കുന്ന കോണ്‍ഗ്രസിനും ബിജെപിയ്ക്കും ബദലായി, ജനാധിപത്യ  മതേതര  ഫെഡറല്‍ മൂല്യങ്ങള്‍ ഉയര്‍ത്തിപ്പിടിക്കുന്ന സര്‍ക്കാര്‍ കേന്ദ്രത്തില്‍ വരേണ്ടത്, ഇന്ത്യയിലെ മഹാഭൂരിപക്ഷം വരുന്ന ജനങ്ങളെ സംബന്ധിച്ചിടത്തോളം അത്യന്താപേക്ഷിതമായിരിക്കുന്നു. ഭൂരിപക്ഷം വരുന്ന സാധാരണക്കാരുടെ ക്ഷേമത്തിലും സാമ്പത്തിക വളര്‍ച്ചയിലും ലക്ഷ്യംവെയ്ക്കുന്ന അത്തരമൊരു ബദല്‍ മുന്നണിയെ സംയോജിപ്പിയ്ക്കുക എന്നത് ഇടതുപക്ഷത്തിെന്‍റ കടമയാണ്. അതിനുവേണ്ടി രാജ്യത്തെ ഇടതുപക്ഷ കക്ഷികളെ, പ്രത്യേകിച്ചും സിപിഐ എമ്മിനെ, കൂടുതല്‍ ശക്തിപ്പെടുത്തുകയും പാര്‍ലമെന്‍റില്‍ അവരുടെ ശക്തി വര്‍ധിപ്പിയ്ക്കുകയും ചെയ്യേണ്ടത് അനിവാര്യമായ ചുമതലയായി ഉയര്‍ന്നുവന്നിട്ടുള്ള ഈ സന്ദര്‍ഭത്തില്‍, നമുക്ക് മാര്‍ഗദര്‍ശനം നല്‍കുന്ന എ കെ ജിയുടെയും ഇ എം എസ്സിെന്‍റയും ദീപ്തമായ സ്മരണ കൂടുതല്‍ പ്രസക്തമായിത്തീരുന്നു.
*നാരായണന്‍ ചെമ്മലശ്ശേരി*

അശോക് മോഛി: കലാപത്തിന്റെ മറ്റൊരു ഇര

അശോക് മോഛിയെ ഓര്‍മയില്ലേ? ഗുജറാത്ത് കലാപകാലത്ത് ഇരകളുടെ മുഖചിത്രമായി കുതുബുദ്ദീന്‍ അന്‍സാരിയുടെ കൈ കൂപ്പിയ ചിത്രം ലോകം മുഴുവന്‍ പ്രചരിച്ചപ്പോള്‍ കലാപകാരികളുടെ പ്രതിനിധിയായി നാം കണ്ടതും അറിഞ്ഞതും അശോക് മോഛിയുടെ ചിത്രമായിരുന്നു. കയ്യില്‍ കുന്തവും തലയില്‍ കാവിക്കെട്ടുമുള്ള അശോക് മോഛി. ഇന്ത്യന്‍ മതേതരത്വം അറപ്പോടെ ഉള്‍ഭയത്തോടെ കണ്ട ഭീകരരൂപം. ആ ചിത്രം ലോകത്തോട് വിളിച്ചുപറഞ്ഞു, ആരാണ് കലാപം, എന്താണ് കലാപം എന്ന്...

എന്നാല്‍ ഇന്ന് അശോക് മോഛി പഴയ ഭീകരനല്ല. കാലം അദ്ദേഹത്തില്‍ മാറ്റങ്ങള്‍ വരുത്തിയിരിക്കുന്നു. കയ്യില്‍ ഊരിപ്പിടിച്ച വാളില്ല. കണ്ണില്‍ വിദ്വേഷത്തിന്റെ ക്രോധമെരിയുന്നില്ല. ഉറുദു എഴുത്തുകാരനും സുഹൃത്തുമായ കലീം സിദ്ദിഖിയാണ് പറഞ്ഞത് അശോക് മോഛി അഹമ്മദാബാദിലെ ദില്ലി ദര്‍വാസയിലാണ് ജീവിക്കുന്നതെന്ന്. ലോകം മുഴുവന്‍ കണ്ടുവിറച്ച 'കാവി ഭീകരനെ' ഒരു നോക്ക് പാളിനോക്കാം എന്നു കരുതിയാണ് അവിടേക്ക് വെച്ചു പിടിച്ചത്. പക്ഷെ, തല കുനിച്ചിരുന്ന് തന്റെ ജോലിയില്‍ മുഴുകുന്ന ചെരിപ്പു തുന്നിയായ ഒരു സധാരണക്കാരന്റെ ചിത്രമാണ് പഴയ ഭീകരന്റെ സ്ഥാനത്ത്. സംസാരിച്ചു തുടങ്ങിയപ്പോള്‍ എനിക്ക് മനസ്സിലായി അശോക് മോഛിയും ഒരു ഇരയാണ് എന്ന്. കാവി ഭീകരതയുടെ മറ്റൊരു ഇര. ഗുജറാത്തില്‍ ദളിതുകളെ കുരങ്ങു കളിപ്പിച്ച് എങ്ങനെയാണ് മുസ്ലിം വിരുദ്ധരാക്കിയത് എന്നും ദളിതരെ എങ്ങനെയാണ് കലാപത്തിന് ഇന്ധനമായി കാവിപ്പട രൂപപ്പെടുത്തിയതെന്നും മോഛിയുടെ ജീവിതം നമ്മോട് വിളിച്ചുപറയുന്നു. ഇവിടെ മുസ്ലിം ഗല്ലികളോടു ചേര്‍ന്നാണ് ദളിത് ഗല്ലികളും ഒട്ടുമിക്ക സ്ഥലങ്ങളും ഉള്ളത്. അഥവാ ദളിത് മൊഹല്ലകളും മുസ്ലിം മൊഹല്ലകളും ഒരുമിച്ചാണ് മുന്നോട്ട് പോകുന്നത്.

മറ്റൊരു ഭാഷയില്‍ പറഞ്ഞാല്‍ മുഖ്യധാരാ കാസ്റ്റ് ഹിന്ദുക്കളുടെ കൂടെ ജീവിക്കാന്‍ ദളിതര്‍ക്ക് അപ്രഖ്യാപിത വിലക്ക് തന്നെയുണ്ട്. സവര്‍ണ ഹിന്ദുക്കളുടെ ഓരംപറ്റി ജീവിക്കുന്ന ദളിതര്‍ക്ക് ഇപ്പോഴും കിണറ്റില്‍നിന്നും വെള്ളമെടുക്കണമെങ്കില്‍ രാത്രി എട്ടുമണി കഴിയണം എന്നതാണ് മോഡിയുടെ ഹിന്ദുത്വ സ്വര്‍ഗത്തിലെ മറ്റൊരു യാഥാര്‍ഥ്യം. ഒരേ ജീവിത സാഹചര്യങ്ങളും ക്വാളിറ്റി ഓഫ് ലൈഫും ഉള്ള ദളിതരും മുസ്ലിങ്ങളും ഒന്നിച്ചാണ് ജീവിച്ചിരുന്നതും ഇപ്പോഴും ജീവിക്കുന്നതും. ഗുജറാത്തില്‍ കാവിവല്‍ക്കരണത്തിന് മാസ്റ്റര്‍പ്ലാന്‍ തയാറാക്കിയ കാവിബുദ്ധി ആദ്യം ചെയ്തത് ഈ ദളിത് മൊഹല്ലകളില്‍ വര്‍ഗീയതയുടെ വിത്തുകള്‍ പാകുകയായിരുന്നു. തങ്ങളുടെ ജാതിയോ മതമോ ദൈവമോ പ്രശ്നമല്ലാതിരുന്ന ദളിതര്‍ക്ക് മെല്ലെ മെല്ലെ തെറ്റായ സ്വത്വബോധം കുത്തിവെച്ച് തൊട്ടടുത്ത് പാര്‍ക്കുന്ന മുസ്ലിം ഗല്ലികളിലേക്ക് വിരല്‍ചൂണ്ടി അവരാണ് നിങ്ങളുടെ പ്രശ്നങ്ങള്‍ക്കെല്ലാം കാരണം എന്ന് പറഞ്ഞുപരത്തി. നിങ്ങളുടെ ജീവിതസൗകര്യങ്ങളും പണവും കൊള്ളയടിക്കുന്നത് പൊതുവെ ചെറിയ കച്ചവടക്കാരായ മുസ്ലിങ്ങളാണെന്ന കഥയും മെനഞ്ഞുണ്ടാക്കി. കലാപത്തിന് മുന്നേ ചില സ്ഥലങ്ങളില്‍ പ്രചരിച്ചിരുന്ന പാംലെറ്റുകള്‍ ഇതിനുദാഹരണമാണ്. പാംലെറ്റുകളില്‍ അക്കമിട്ട് നിരത്തിയിരുന്നത് മുസ്ലിം സ്ഥാപനങ്ങള്‍ നേടുന്ന ലാഭത്തിന്റെ കണക്കുകളായിരുന്നു. ഇത് ദളിത് മസ്തിഷ്ക്കങ്ങളില്‍ മെല്ലെ ചലനം സൃഷ്ടിച്ചു. നരോദ പാട്യയിലെ കലാപം തന്നെ മികച്ച ഉദാഹരണം.

പൊതുവെ സ്വത്വപരമായി യാതൊരു ലക്ഷണവും പ്രകടിപ്പിക്കാതിരുന്ന മുസ്ലിങ്ങളായിരുന്നു നരോദയിലേത്. മദ്യനിരോധനം നിലവിലുള്ള ഗുജറാത്തില്‍ വാറ്റു നടത്തുന്നവരായിരുന്നു അവിടുത്തെ ദളിതര്‍. ഒരേ സംസ്കാരവും ജീവിതരീതിയും പിന്തുടര്‍ന്നിരുന്ന ഇവരെ തമ്മിലടിപ്പിച്ച് കൂട്ടക്കൊലയും മൃഗീയ ബലാത്സംഗങ്ങളും നടത്താനായി എന്നത് കാവി ഭീകരതയുടെ വിജയം. സവര്‍ണ ഹിന്ദുക്കളും സമ്പന്ന മുസ്ലിങ്ങളും താമസിച്ചിരുന്ന മേഖലകളില്‍ കലാപം കുറവായിരുന്നു എന്നത് ഇതിനോട് ചേര്‍ത്തുവായിക്കേണ്ട വസ്തുതയാണ്. അങ്ങനെ മസ്തിഷ്ക്ക ചോര്‍ച്ച സംഭവിച്ച ഒരു ദളിതന്റെ കഥയാണ് അശോക് മോഛിയുടെതും.

2002 ഫെബ്രുവരി 27ന് ഏതോ ഒരു വിശ്വഹിന്ദു പരിഷത്ത് നേതാവ് ഗോധ്രയിലെ കത്തിക്കരിഞ്ഞ കര്‍സേവകന്റെ ശരീരം കാണിച്ച് ചോദിച്ചു നിങ്ങള്‍ ഇനി എന്തിനാണ് നോക്കിനില്‍ക്കുന്നത്? എന്ന്. ഇനി മോഛിയുടെ വാക്കുകളില്‍: 

എന്താണ് അന്നു സംഭവിച്ചത്? (അശോക് മോഛി ദളിത്സിദ്ധമായ അപകര്‍ഷതയോടെ തല താഴ്ത്തി സംസാരിച്ചു തുടങ്ങി) 

അന്ന് വൈകുന്നേരം (ഫെബ്രുവരി 28) ഞാന്‍ ഇവിടെ ഈ ചെരുപ്പ് തുന്നുന്ന സ്ഥലത്ത് ഇരിക്കുമ്പോള്‍ ആരൊക്കെയോ വന്ന് ഗോധ്രയില്‍ 56 ഹിന്ദുക്കളെ മുസ്ലിങ്ങള്‍ ജീവനോടെ കത്തിച്ചു എന്ന് എന്നോടു പറഞ്ഞു. കത്തിക്കരിഞ്ഞ ശവശരീരങ്ങളുടെ ചിത്രങ്ങളുമുണ്ടായിരുന്നു അവരുടെ കൈകളില്‍. വൈകുന്നേരം അഞ്ചുമണിയൊക്കെ ആയതോടെ തെരുവില്‍ മുഴുവന്‍ ആള്‍ക്കൂട്ടമായിരുന്നു. മുസ്ലിം വീടുകള്‍, കടകള്‍ തകര്‍ത്ത് ആക്രോശിച്ച് വരുന്ന അവര്‍ക്കൊപ്പം ഞാനും ചേര്‍ന്നു. ഞങ്ങള്‍ താഴ്ന്ന ഹിന്ദുക്കള്‍ താമസിച്ചിരുന്ന ഇടത്തുനിന്നുമാണ് തൊട്ടപ്പുറത്തെ മുസ്ലിം വീടുകള്‍ തകര്‍ക്കാന്‍ ബജ്റംഗദള്‍ നേതാക്കള്‍ പദ്ധതിയിട്ടത്. ഞാനും എന്റെ ഹിന്ദു സഹോദരങ്ങളുടെ ജീവന് പകരംചോദിക്കാന്‍ കൈയില്‍ കിട്ടിയ വടിയുമായിട്ടാണ് വന്നത്. ഞങ്ങള്‍ മുസ്ലിം ഗല്ലിയിലേക്ക് കടക്കുന്നതിന്റെ തൊട്ട് മുന്നേ നിരവധി മാധ്യമ പ്രവര്‍ത്തകര്‍ റോഡില്‍ നിരന്നിരുന്നു. ഫ്ളാഷുകള്‍ മിന്നിത്തുടങ്ങിയപ്പോള്‍ ജയ്ശ്രീരാം വിളികള്‍ക്കും തെറി വിളികള്‍ക്കും ആക്കം കൂടി. ജയ് രന്‍ചോര്‍, മിയചോര്‍ മിയ കി മാകി (ജയ് രന്‍ചോര്‍, മുസ്ലിങ്ങള്‍ കള്ളന്മാരാണ്) തുടങ്ങിയ അധിക്ഷേപ വാക്കുകളും ആര്‍പ്പുവിളികളും കൊണ്ട് വല്ലാത്ത ഹരമായിരുന്നു അപ്പോള്‍ ഞങ്ങള്‍ക്ക്. തലയില്‍ കാവി റിബണും കൈയില്‍ വടിയുമേന്തി നില്‍ക്കുന്ന എന്റെ ആക്രോശങ്ങള്‍ കേട്ട് ഒരു മാധ്യമ പ്രവര്‍ത്തകന്‍ എന്റെ ഫോട്ടോ എടുക്കാന്‍ തുടങ്ങി. ഞാന്‍ ഉറക്കെ അട്ടഹസിച്ചു. (ഇന്ത്യാ ടുഡേയുടെ സെബാസ്റ്റ്യന്‍ ഡിസൂസ എന്ന ഫോട്ടോഗ്രാഫറായിരുന്നു അതെന്ന് പിന്നീടാണ് അറിഞ്ഞത്).

നിങ്ങള്‍ ആരെയെങ്കിലും ഈ കലാപത്തിനിടയില്‍ കൊന്നുവോ? 

ഇല്ല. പലരെയും അടിച്ചുപരിക്കേല്‍പിച്ചു. നിരവധി വീടുകള്‍ തകര്‍ത്തു. കടകളും.

നേരത്തെതന്നെ നിങ്ങള്‍ ബജറംഗ്ദള്‍ അംഗമായിരുന്നോ?

ഇല്ല. ഞാന്‍ ഒരിക്കലും ഒരു പാര്‍ടിയിലും അംഗമായിരുന്നില്ല. എന്റെ ഉപജീവനമാര്‍ഗമായ ഈ തൊഴിലില്‍ മുഴുകിക്കഴിഞ്ഞിരുന്ന ഒരു സാധാരണക്കാരനായിരുന്നു ഞാന്‍. ഈ ഫുട്പാത്തില്‍ എന്റെ അപ്പുറവും ഇപ്പുറവും ഇരിക്കുന്നത് രണ്ട് മുസ്ലിം തെരുവ് കച്ചവടക്കാരാണ്. ഗുലാം ഭായിയും റമീസ് ഭായിയും. അത് കലാപത്തിന് മുന്നെയും അങ്ങനെയായിരുന്നു. ശേഷവും അതങ്ങനെതന്നെയാണ്. (രണ്ടു പേരെയും മോഛി വിളിച്ച് പരിചയപ്പെടുത്തി. അവരാണ് ഞങ്ങള്‍ക്ക് ചായ കൊണ്ടുവന്നു തന്നത്).

ലോകം മുഴുവന്‍ നിങ്ങളുടെ ചിത്രം പ്രചരിച്ചു. സ്വാഭാവികമായും ഇവിടുത്തെ മുസ്ലിങ്ങളുടെ പ്രതികരണം എന്തായിരുന്നു നിങ്ങളോട്

 അവരാരും എന്നോട് ശത്രുതയോടെ പെരുമാറിയിട്ടില്ല. എനിക്കെതിരെ കേസില്‍ സാക്ഷി പറയാന്‍ പോലും ഒരു മുസ്ലിമും വന്നിട്ടില്ല. എന്റെ അപ്പുറവും ഇപ്പുറവും ഇരിക്കുന്ന ഗുലാംഭായിയും റമീസ്ഭായിയും തന്നെയാണ് എന്റെ അടുത്ത സുഹൃത്തുക്കള്‍.

പിന്നെ എന്തിനാണ് അന്ന് അങ്ങനെയൊക്കെ ചെയ്യാന്‍ തോന്നിയത്? 

എങ്ങനെ ചെയ്യാതിരിക്കും. എന്റെ ഹിന്ദു സഹോദരങ്ങളെയല്ലേ ജിഹാദി മുസ്ലിങ്ങള്‍ ചുട്ടുകൊന്നത്. ഇന്ത്യയില്‍ ഭൂരിപക്ഷത്തെ ആക്രമിച്ചാല്‍ ന്യൂനപക്ഷത്തിന് ഇവിടെ അന്തിയുറങ്ങാന്‍ പോലും സാധ്യമല്ല.


അപ്പോള്‍ മറ്റൊരു കാര്യം ചോദിക്കട്ടെ, 56 പേരെ ഏതോ ജിഹാദി മുസ്ലിങ്ങള്‍ കൊന്നതിനു പകരം അവര്‍ എത്രപേരെയാണ് കൊന്നത് എന്ന് നിങ്ങള്‍ക്കറിയാമോ? എത്ര സ്ത്രീകള്‍ ബലാത്സംഗം ചെയ്യപ്പെട്ടു എന്ന് നിങ്ങള്‍ കേട്ടിട്ടുണ്ടോ?

എന്നോട് അതിനെപ്പറ്റിയൊന്നും ആരും പറഞ്ഞിട്ടില്ല. കുറച്ച് കടകളും സ്ഥാപനങ്ങളും തകര്‍ത്തു എന്നല്ലാതെ ആരെങ്കിലും മരിച്ചതായി ഞാന്‍ അറിഞ്ഞിട്ടില്ല. (ആയിരങ്ങള്‍ കൊല്ലപ്പെട്ടിട്ടും പതിനായിരങ്ങള്‍ കുടിയൊഴിഞ്ഞുപോയിട്ടും ഈ ദളിത് യുവാവിന് ആ വാര്‍ത്ത കിട്ടിയിരുന്നില്ല. വാര്‍ത്തകള്‍ ആര്‍ക്കോ വേണ്ടവ മാത്രമാണ് ഇവിടെ എത്തുന്നത്)

ആപ് ഏക് പ്രതീക് ബന്‍ഗയാ. നിങ്ങള്‍ ഹിന്ദുത്വത്തിന്റെ ഒരു പ്രതീകമായി മാറി. നിങ്ങള്‍ക്ക് ഗവണ്‍മെന്റില്‍ നിന്നോ അല്ലെങ്കില്‍ ബിജെപി, ബജ്റംഗ്ദള്‍ ആരില്‍ നിന്നെങ്കിലും വല്ല സഹായവും ലഭിച്ചിരുന്നോ?

എനിക്ക് ഇതുവരെ ആരില്‍നിന്നും ഒരു സഹായവും ലഭിച്ചിട്ടില്ല. കലാപത്തിന്റെ കേസ് ഞാന്‍ സ്വയം നടത്തുകയായിരുന്നു. കണ്ടാലറിയാവുന്ന കലാപകാരികള്‍ക്കെതിരെ കേസെടുത്ത കൂട്ടത്തില്‍ എനിക്കെതിരെയും എടുത്തിരുന്നു. പക്ഷേ എനിക്കെതിരെ സാക്ഷി പറയാന്‍ എന്റെ ഈ മുസ്ലിം ബസ്തി (മുസ്ലിം ഗല്ലി)യിലെ ആരും തയ്യാറായില്ല. അവസാനം കേസ് തള്ളിപ്പോയി. (ഇതിനെക്കുറിച്ച് തൊട്ടപ്പുറത്തെ കച്ചവടക്കാരന്‍ ഗുലാം ഭായിയോട് ചോദിച്ചപ്പോള്‍ അദ്ദേഹം പറഞ്ഞത് ജീവിതത്തിന്റെ രണ്ടറ്റം കൂട്ടിമുട്ടിക്കാന്‍ കഷ്ടപ്പെടുന്ന ഒരു ചെരുപ്പുകുത്തിക്കെതിരെ എന്തിന് സാക്ഷി പറയണം എന്നാണ്. അയാളും മറ്റൊരു ഇരയാണ്. ആരോ ഉരുട്ടിവിട്ട പമ്പരമായിരുന്നു അയാള്‍, മറ്റൊരു ഇര). പിന്നെ ഞാന്‍ സഹായം ചോദിച്ച് ആരുടെ അടുത്തും പോയിട്ടുമില്ല.

നരേന്ദ്രമോഡിയെ ഇതുവരെ കണ്ടിട്ടുണ്ടോ? മോഡിയുടെ വികസനത്തെക്കുറിച്ച് എന്താണ് പറയാനുള്ളത്?

ക്യാ വികാസ്? ദില്ലി ദര്‍വാസ എന്നും ഇങ്ങനെ തന്നെയായിരുന്നു. ഇതിന് പ്രത്യേകിച്ച് മാറ്റം ഒന്നുമില്ല. (മോഛിയുടെ ലോകം ഈ ദില്ലി ദര്‍വാസയാണ്). പിന്നെ മോഡിയെ ഞാന്‍ ഇതുവരെ കണ്ടിട്ടില്ല. എനിക്ക് മോഡിയെ ഇഷ്ടവുമല്ല.

അതെന്താണ് കാരണം = ഞാന്‍ ദളിതനാണ്. ദളിതരോട് മോഡി സര്‍ക്കാരിന്റെ സമീപനത്തില്‍ ഞാന്‍ തൃപ്തനല്ല. കാരണം ഗവണ്‍മെന്റ് ജോലികളെല്ലാം കരാര്‍ ജോലികളാക്കി മാറ്റിയതോടെ ദളിതുകള്‍ എവിടെയുമെത്താന്‍ കഴിയാതെ ബുദ്ധിമുട്ടുകയാണ് ഈ സര്‍ക്കാരിനു കീഴില്‍. അവര്‍ ഞങ്ങളെ എങ്ങനെയാണ് പറഞ്ഞു പറ്റിച്ചത് എന്നും ഞങ്ങള്‍ തിരിച്ചറിഞ്ഞു തുടങ്ങിയിരിക്കുന്നു. 2002ല്‍ ഹനുമാന്‍ വിഗ്രഹവും ബജ്റംഗ്ദള്‍ ഹോര്‍ഡിംഗുകളും മാത്രം ഉണ്ടായിരുന്ന എന്റെ ഈ മൊഹല്ലയില്‍ ബാബാസാഹിബിന്റെ (അംബേദ്കറുടെ) ചിത്രങ്ങളും ഹോര്‍ഡിംഗ്സും വന്നു തുടങ്ങി. ഞങ്ങള്‍ തിരിച്ചറിയുന്നുണ്ട്, മുസ്ലിങ്ങളെപ്പോലെ ഞങ്ങളും ഇരകളാണെന്ന്. ?

പിന്നെ കലാപത്തിന്റെ കാലത്ത് താങ്കളെപ്പോലെ മറ്റൊരു പ്രതീകമായി മാറിയ കുത്ബുദ്ദീന്‍ അന്‍സാരിയെ അറിയുമോ? കണ്ടിട്ടുണ്ടോ?

ഞങ്ങള്‍ കണ്ടിട്ടുണ്ട്. രാകേഷ്ശര്‍മ സിനിമ എടുക്കാന്‍ വന്നപ്പോള്‍ ഞങ്ങളെ ഒരുമിച്ചിരുത്തി അഭിമുഖം നടത്തിയിരുന്നു. അന്നു ഞാന്‍ കുത്തുബ് ഭായിയോട് അദ്ദേഹത്തിന് സംഭവിച്ചതിന് മാപ്പു ചോദിച്ചിരുന്നു.  വരുന്ന ലോക്സഭാ തെരഞ്ഞെടുപ്പിനുമുമ്പ് ചിത്രം പുറത്തുവരും. (ഇന്ത്യന്‍ പ്രധാനമന്ത്രി പദത്തില്‍ എത്താന്‍ ജ ഞ ക്യാമ്പയിനുകള്‍ നടത്തി മാധ്യമങ്ങള്‍ക്ക് പ്രിയങ്കരനായ മോഡിക്ക് മാധ്യമലോകത്തു നിന്നുതന്നെ മറ്റൊരു കുറ്റപത്രം തയ്യാറാവുമ്പോള്‍ അശോക് മോഛി 2014 ലെ മോഡി വിരുദ്ധ ക്യാമ്പയിനിന്റെ ഭാഗമാകുന്നത് ഒരുപക്ഷേ കാലത്തിന്റെ കാവ്യനീതിയായിരിക്കാം.) ചുമരില്‍ തുക്കിയിരിക്കുന്ന കാളിയുടെ ചിത്രത്തെക്കുറിച്ചു ചോദിച്ചപ്പോള്‍ മോഛി പറഞ്ഞത് കാളി കറുത്ത ഞങ്ങളുടെയൊക്കെ ദൈവമാണ് എന്നാണ്.

ഹനുമാന്റെ (ബജ്രംഗ്) സവര്‍ണ രാഷ്ട്രീയത്തില്‍നിന്ന് കാളിയുടെ അവര്‍ണ സ്വത്വത്തിലേക്ക് ദളിതര്‍ മാറി ചിന്തിച്ചുതുടങ്ങിയത് മോഡി രാഷ്ട്രീയ ഹിന്ദുത്വം പോലും മറന്ന് കോര്‍പ്പറേറ്റ് മോഡിത്വത്തിലേക്ക് ചുവടുമാറ്റിയതിന്റെ അനുരണനമാണ്. മോഡിയുടെ വികസന സ്വര്‍ഗത്തില്‍ ജീവിതച്ചെലവ് താങ്ങാന്‍ കഴിയാത്തതുകൊണ്ടാണ് വിവാഹം കഴിക്കാന്‍ പറ്റാതെ പോയത് എന്നാണ് മോഛിയുടെ പക്ഷം. സെബാസ്റ്റ്യന്‍ ഡിസൂസ  ഫോട്ടോയെടുത്ത ഗല്ലിയിലേക്ക് ഞങ്ങളുടെ കൂടെ മോഛിയും വന്നു. അന്നുണ്ടായിരുന്ന താടിരോമങ്ങള്‍ ഇപ്പോള്‍ മോഛിക്കില്ല. അതിനെക്കുറിച്ച് ചോദിച്ചപ്പോള്‍ അതും ഒരു മാറ്റമാണ് എന്നാണ് മോഛി പറഞ്ഞത്. ഗല്ലി ഇന്ന് ബാബാസാഹിബ് ചാര്‍രസ്ത (അംബേദ്കര്‍ ജംഗ്ഷന്‍) എന്നാണ് അറിയപ്പെടുന്നത്. അന്ന് മോഛി ആരുടെയൊക്കെയോ ബലത്തില്‍ ആക്രോശിച്ചിരുന്ന അതേ സ്ഥലത്ത് ആക്രോശങ്ങളില്ലാതെ വന്നുനിന്ന് ഫോട്ടോക്ക് പോസ് ചെയ്തപ്പോള്‍ മനസ്സ് മന്ത്രിച്ചു. അതെ ഇതും മറ്റൊരു കുതുബുദ്ദീന്‍ അന്‍സാരിയാണ്...!

ഒരു ചായ കുടിച്ച് പിരിയാന്‍ വേണ്ടിയാണ് കടയില്‍ കയറിയത്. പണം കൊടുക്കാനായി ഞാന്‍ ചെന്നപ്പോള്‍ മോഛി എന്നെ വിലക്കിയിട്ട്പറഞ്ഞു. 'ആപ് മേരാ മെഹ്മാന്‍ഹെ!'
(നിങ്ങള്‍ എന്റെ അതിഥിയാണ്).

**സഈദ് റൂമി മുണ്ടമ്പ്ര

കാപട്യത്തിന് കൂട്ടുനില്‍ക്കുന്നവര്‍

അധികാരക്കസേരയാണോ മലയോര കര്‍ഷകജനതയുടെ ജീവിതമാണോ പ്രധാനമെന്ന് കര്‍ഷകതാല്‍പ്പര്യത്തിന്റെ സംരക്ഷകര്‍ എന്നു സ്വയം വിശേഷിപ്പിക്കാറുള്ള രാഷ്ട്രീയപ്പാര്‍ടികള്‍ക്ക് നിശ്ചയിക്കേണ്ടിവരുന്ന സവിശേഷ ഘട്ടമാണിത്. കസ്തൂരിരംഗന്‍ റിപ്പോര്‍ട്ട് മുന്‍നിര്‍ത്തി പറയുന്ന വാക്കുകളല്ല, എടുക്കുന്ന നിലപാടുകളാവും ഇവിടെ ഉരകല്ല്. ഈ ഉരകല്ലില്‍ ഉരച്ച് ജനങ്ങള്‍, പ്രത്യേകിച്ച് മലയോര കര്‍ഷകജനത, തങ്ങള്‍ക്കുവേണ്ടി ആണയിടാറുള്ള പ്രസ്ഥാനങ്ങളുടെ ആത്മാര്‍ഥത പരിശോധിക്കുന്ന ഘട്ടമാണ് സംജാതമായിട്ടുള്ളത്.

ഒരു ഭാഗത്ത് കസ്തൂരിരംഗന്‍ റിപ്പോര്‍ട്ട് മാറ്റമില്ലാതെ നടപ്പാക്കുക എന്നതാണ് തങ്ങളുടെ നിലപാടെന്ന് ഹരിത ട്രിബ്യൂണലിനെ രേഖാമൂലം അറിയിക്കുക. മറുഭാഗത്ത് അതിനെതിരായി ഉയരുന്ന ജനരോഷത്തെ തണുപ്പിക്കാന്‍ വേണ്ടി ജനങ്ങളെ തെറ്റിദ്ധരിപ്പിക്കുന്ന വിജ്ഞാപന പ്രഹസനം നടത്തുക. ഈ തട്ടിപ്പ് ജനങ്ങള്‍ക്കാകെ ബോധ്യമുണ്ട്. എന്നിട്ടും ഈ തട്ടിപ്പിനെ മറയിട്ട് രക്ഷിക്കാനാണോ കര്‍ഷകരെക്കുറിച്ച് പ്രസംഗിച്ചു നടക്കുന്നവരുടെ നീക്കം? കേരളം ഉറ്റുനോക്കുകയാണിത്.

ആശങ്കകള്‍ക്ക് അടിസ്ഥാനമുണ്ടെന്നു നാള്‍ക്കുനാള്‍ തെളിഞ്ഞുകൊണ്ടിരുന്നപ്പോഴൊക്കെ ഒരു ആശങ്കയും വേണ്ടെന്ന് ആവര്‍ത്തിച്ചുകൊണ്ടിരിക്കുകയായിരുന്നു മുഖ്യമന്ത്രി ഉമ്മന്‍ചാണ്ടി. കര്‍ഷകരുടെ താല്‍പ്പര്യങ്ങള്‍ പൂര്‍ണമായി സംരക്ഷിക്കുമെന്ന് കേന്ദ്രമന്ത്രി വീരപ്പ മൊയ്ലി ഉറപ്പു നല്‍കിയെന്ന് ഒരു ഘട്ടത്തില്‍ മുഖ്യമന്ത്രി പറഞ്ഞു. താന്‍ ഒരു ഉറപ്പും നല്‍കിയിട്ടില്ലെന്ന് മുഖ്യമന്ത്രിയുടെ പ്രസ്താവനയുടെ മഷിയുണങ്ങും മുമ്പ് വീരപ്പ മൊയ്ലി തിരുത്തി. പരിസ്ഥിതിലോല പ്രദേശങ്ങള്‍ പുനക്രമീകരിക്കുമെന്നും ജനവാസകേന്ദ്രങ്ങളെയും കൃഷിയിടങ്ങളെയും അതില്‍നിന്ന് ഒഴിവാക്കുമെന്നും ഉറപ്പ് കിട്ടിയതായി ഒരു സന്ദര്‍ഭത്തില്‍ മുഖ്യമന്ത്രി പറഞ്ഞു. ആ വാര്‍ത്ത അച്ചടിച്ചു വന്ന പേജിലെ മഷിയുണങ്ങും മുമ്പ് കസ്തൂരിരംഗന്‍ റിപ്പോര്‍ട്ടില്‍ മാറ്റമില്ലെന്ന് കേന്ദ്ര വനംപരിസ്ഥിതി മന്ത്രാലയം രേഖാമൂലം ഹരിത ട്രിബ്യൂണലിനെ അറിയിച്ചു. ഡിസംബര്‍ 20ന്റെ ഓഫീസ് മെമ്മോറാണ്ടമാണ് നിലനില്‍ക്കുകയെന്നും അത് വന്നതോടെ നവംബര്‍ 13ന്റെ ഉത്തരവ് അസ്ഥിരപ്പെട്ടു എന്നും ഉമ്മന്‍ചാണ്ടി വാദിച്ചു. എന്നാല്‍, ഡിസംബര്‍ 20ന്റേതിനുമേല്‍ നിലനില്‍ക്കുക നവംബര്‍ 13ന്റെ രേഖതന്നെയാണെന്ന് വനംപരിസ്ഥിതി മന്ത്രാലയം ഹരിത ട്രിബ്യൂണലില്‍ എഴുതിക്കൊടുത്തു. നവംബര്‍ 13ന്റെ രേഖ റദ്ദാക്കണമെന്ന് ഒരു ഘട്ടത്തില്‍ ആവശ്യപ്പെട്ട മുഖ്യമന്ത്രി, അത് റദ്ദാക്കപ്പെടില്ലെന്ന് ബോധ്യപ്പെട്ടപ്പോള്‍ ആ രേഖയുടെ പക്ഷത്തേക്കു നിലപാട് മാറ്റി. എന്നുമാത്രമല്ല, 13ന്റെ രേഖ റദ്ദായിപ്പോയാല്‍ പിന്നെ ഗാഡ്ഗില്‍ റിപ്പോര്‍ട്ടാവും നടപ്പാവുകയെന്ന വിചിത്രമായ നിലപാടിലേക്കുപോലും ചെന്നെത്തി.

ഏറ്റവുമൊടുവില്‍ നവംബര്‍ 13ന്റെ രേഖ റദ്ദാക്കുന്നതായോ പരിസ്ഥിതിലോലമെന്ന് മുദ്രയടിച്ച 123 വില്ലേജുകളിലെ കൃഷിജനവാസമേഖലകളെ ഒഴിവാക്കുന്നതായോ ഒന്നും പരാമര്‍ശിക്കാതെ തെരഞ്ഞെടുപ്പ് പ്രഖ്യാപനത്തിന്റെ തലേന്ന് ഒരു ഓഫീസ് മെമ്മോറാണ്ടം ഇറക്കി; കേന്ദ്രം. ഉടന്‍തന്നെ എല്ലാ പ്രശ്നവും അവസാനിച്ചുവെന്ന് പറഞ്ഞ് കേന്ദ്രനടപടിയെ സ്വാഗതം ചെയ്തിരിക്കുന്നു മുഖ്യമന്ത്രി. കേരളത്തില്‍ അതിരൂക്ഷമാവുന്ന ജനരോഷത്തെ തെറ്റിദ്ധരിപ്പിച്ച് തണുപ്പിക്കാനുള്ള കപടവിദ്യയാണ് ഈ വിജ്ഞാപന പ്രഹസനമെന്നറിയാന്‍ സാമാന്യബുദ്ധിയേ വേണ്ടൂ. കേരളതാല്‍പ്പര്യം ഉയര്‍ത്തിപ്പിടിച്ച് അതിനെതിരെ പൊട്ടിത്തെറിക്കേണ്ട മുഖ്യമന്ത്രിയാണ് നിര്‍ലജ്ജം അതിനെ സ്വാഗതംചെയ്തത്. മുഖ്യമന്ത്രിതന്നെ സ്വാഗതംചെയ്ത സ്ഥിതിക്ക് ഇതിനപ്പുറത്ത് ഇനി ഒന്നും വേണ്ടല്ലോ എന്ന മട്ടിലായി കേന്ദ്രം. മലയോര കര്‍ഷകരുടെ ജീവിതത്തിനുമേല്‍ ആശങ്ക കാര്‍മേഘങ്ങളായി ഉരുണ്ടുകൂടുമ്പോഴാണ് മുഖ്യമന്ത്രിയുടെ സങ്കുചിത രാഷ്ട്രീയതാല്‍പ്പര്യത്തിലുള്ള ഈ സ്വാഗതംചെയ്യല്‍. ജനങ്ങളെ ഒറ്റുകൊടുക്കലാണിത്; ആശങ്കയകറ്റാന്‍ ഉദ്ദേശിച്ചുള്ള സംഘടിത നീക്കങ്ങളെ കേന്ദ്രത്തിന്റെ പക്ഷംചേര്‍ന്ന് തകര്‍ത്തുകൊടുക്കലാണിത്.

കേരള നിയമസഭ മുന്നോട്ടുവച്ച ആവശ്യത്തെ കേന്ദ്രം അധിക്ഷേപിച്ച് തള്ളി. നവംബര്‍ 13ന്റെ രേഖ ഇപ്പോഴും സാധുതയോടെ നിലനില്‍ക്കുന്നു. കരട് വിജ്ഞാപനമിറക്കുമെന്ന പ്രഖ്യാപനം അനിശ്ചിതത്വത്തിലായി. ഓഫീസ് മെമ്മോറാണ്ടമേയുള്ളു എന്ന നിലവന്നു. ഇനി അഥവാ, വിജ്ഞാപനമിറക്കിയാല്‍തന്നെയും മാര്‍ച്ച് നാലിന്റെ ഓഫീസ് മെമ്മോറാണ്ടത്തിന്റെ ഉള്ളടക്കത്തിനപ്പുറത്തേക്ക് അത് പോവില്ല. മുഖ്യമന്ത്രി സ്വാഗതംചെയ്ത ആ ഓഫീസ് മെമ്മോറാണ്ടം സത്യത്തില്‍ എന്താണ് പറയുന്നത്? അത് പരിസ്ഥിതിലോല പ്രദേശമായി കണക്കാക്കിയിട്ടുള്ള 123 വില്ലേജുകളിലെ കൃഷിജനവാസകേന്ദ്രങ്ങളെക്കുറിച്ചോ 10 കിലോമീറ്റര്‍ ബഫര്‍ മേഖല നീക്കുന്നതിനെക്കുറിച്ചോ ഒന്നും ഖണ്ഡിതമായി പറയുന്നില്ല. 'തത്വത്തില്‍ അംഗീകരിച്ചു' എന്നു മുഖ്യമന്ത്രി പറയുന്നു. തത്വത്തില്‍ എന്താണ് അംഗീകരിച്ചത്? അതറിയാന്‍ മുഖ്യമന്ത്രി ഓഫീസ് മെമ്മോറാണ്ടം വായിച്ചുനോക്കണം. ഹൈ ലെവല്‍ വര്‍ക്കിങ് ഗ്രൂപ്പിന്റെ റിപ്പോര്‍ട്ടിന് തത്വത്തിലുള്ള അംഗീകാരത്തെക്കുറിച്ചാണത്. അത് കേന്ദ്രത്തിന്റെ വര്‍ക്കിങ് ഗ്രൂപ്പാണ്; കേരളത്തിന്റെ ഉമ്മന്‍ കമ്മിറ്റിയല്ല. ഈ ഓഫീസ് മെമ്മോറാണ്ടം ആകെ പറയുന്നത് കേരളത്തിന്റെ ആവശ്യങ്ങളെക്കുറിച്ച് ബന്ധപ്പെട്ടവര്‍ക്ക് പ്രതികരിക്കാന്‍ സൗകര്യം ചെയ്തു കൊടുക്കുമെന്നു മാത്രമാണ്. ഇതാണ് മുഖ്യമന്ത്രിക്ക് സ്വാഗതാര്‍ഹമായി തോന്നിയത്!

മുഖ്യമന്ത്രിക്ക് കേന്ദ്രത്തിന്റെ ഈ കാപട്യത്തിന് കൂട്ടുനില്‍ക്കാന്‍ രാഷ്ട്രീയ കാരണങ്ങളുണ്ട്. എന്നാല്‍, കര്‍ഷകര്‍ക്കുവേണ്ടി പ്രവര്‍ത്തിക്കുന്നു എന്ന് അവകാശപ്പെടുന്ന പ്രസ്ഥാനങ്ങള്‍ ഈ കാപട്യത്തിനു മറയിടാമോ? അതും ഒന്നുരണ്ട് മന്ത്രിക്കസേരകള്‍ രക്ഷിക്കാന്‍വേണ്ടി. ഇതാണ് ഈ ഘട്ടത്തിലെ പ്രസക്തമായ ചോദ്യം.

** ദേശാഭിമാനി 05-03-2014

മന്ത്രി ആര്യാടന്‍ മുഹമ്മദിന്റെ ഊര്‍ന്നുവീണ മുഖംമൂടി

ആര്യാടന്‍ മുഹമ്മദ് നിലമ്പൂരിന്റെ എംഎല്‍എ ആണ്. കേരള മന്ത്രിസഭയില്‍ വൈദ്യുതി മന്ത്രിയാണ്. മന്ത്രിസഭയിലെ ഏറ്റവും മുതിര്‍ന്ന അംഗമായ അദ്ദേഹം, താന്‍ കോണ്‍ഗ്രസിലെ മതേതരത്വം ഉയര്‍ത്തിപ്പിടിക്കുന്ന ദേശീയ മുസ്ലിം പൈതൃകത്തിന്റെ നേരവകാശിയെന്നാണ് അവകാശപ്പെടാറുള്ളത്. എല്ലാ തെരഞ്ഞെടുപ്പുകാലത്തും ഭൂമിയോളം കുമ്പിട്ട് മുസ്ലിംലീഗിന്റെ വോട്ട് സമ്പാദിക്കാറുള്ള ആര്യാടന്‍, തെരഞ്ഞെടുപ്പ് അകലെയാണെങ്കില്‍ മുസ്ലിംലീഗിനെയും അത് ഉയര്‍ത്തിപ്പിടിക്കുന്ന മത യാഥാസ്ഥിതിക നിലപാടിനെയും വിമര്‍ശിച്ച് കയ്യടി നേടാറുണ്ട്. കേരളത്തിലെ പുരോഗമനമതേതരത്വ വാദികള്‍ പോലും ആര്യാടന്റെ മാറിമാറി പ്രത്യക്ഷപ്പെടാറുള്ള ഈ പ്രഛന്നവേഷത്തില്‍ വഞ്ചിക്കപ്പെടാറുണ്ട്. എന്നാല്‍ ഇത്തവണ ആര്യാടന്റെ 'ചാണക്യസൂത്രം' പൊളിഞ്ഞ് പാളീസാകുന്നതാണ് കോലോത്തുംമുറിയിലെ ചിറയ്ക്കല്‍ രാധ വധക്കേസിലൂടെ മറനീക്കി പുറത്തുവന്നത്.

ചാക്കില്‍ കെട്ടിയ നിലയിലാണ് അമരമ്പലം പഞ്ചായത്തിലെ ചുള്ളിയോട് ഉണ്ണിക്കുളത്തുള്ള കാട് മൂടിക്കിടക്കുന്ന ഒരു കുളത്തില്‍ നിന്നും രാധയുടെ മൃതദേഹം കണ്ടെടുത്തത്. ഫെബ്രുവരി ഒന്‍പതാം തീയതി രാവിലെ മോട്ടോര്‍ റിപ്പയര്‍ ചെയ്യാനെത്തിയ തൊഴിലാളികളാണ് ഒരു കയ്യും കാലും പുറത്തേക്ക് ചാടിയ നിലയില്‍ മൃതദേഹം കണ്ടെത്തിയത്. അതിനകം തന്നെ മൃതദേഹം അഴുകി ദുര്‍ഗന്ധം വമിക്കാന്‍ തുടങ്ങിയിരുന്നു. പൊലീസ് സാന്നിധ്യത്തില്‍ പുറത്തെടുത്ത മൃതദേഹം ചിറയ്ക്കല്‍ രാധയുടേതാണെന്ന് ബന്ധുക്കള്‍ തിരിച്ചറിഞ്ഞു. ഫെബ്രുവരി അഞ്ച് ബുധനാഴ്ചയാണ് എംഎല്‍എ ഓഫീസ് കൂടിയായ നിലമ്പൂര്‍ ബ്ലോക്ക് കോണ്‍ഗ്രസ് കമ്മിറ്റി ഓഫീസിലെ തൂപ്പുകാരിയായ ചിറയ്ക്കല്‍ രാധയെ കാണാതായത്. ബുധനാഴ്ച രാവിലെ എട്ട് മണിക്കാണ് രാധ കോണ്‍ഗ്രസ് ഓഫീസ് തൂത്തുവാരാന്‍ വീട്ടില്‍ നിന്നിറങ്ങിയത്. രാത്രിയായിട്ടും തിരിച്ചെത്താത്തതിനെത്തുടര്‍ന്ന് അവരുടെ സഹോദരന്‍ അന്വേഷണം നടത്തുകയും ഒടുവില്‍ നിലമ്പൂര്‍ സബ് ഇന്‍സ്പെക്ടര്‍ മുമ്പാകെ പരാതി നല്‍കുകയും ചെയ്തു. കാണാതായതിനെക്കുറിച്ച് തനിക്ക് ചില സംശയങ്ങളുണ്ടെന്ന് രാധയുടെ സഹോദരന്‍ എസ്ഐയോട് പറഞ്ഞപ്പോള്‍, 'അത് രണ്ടാമത്തെ പ്രശ്നം' എന്നായിരുന്നുവത്രെ എസ്ഐയുടെ മറുപടി. എംഎല്‍എ ഓഫീസായ കോണ്‍ഗ്രസ് ബ്ലോക്ക് കമ്മിറ്റി ഓഫീസിലെ തൂപ്പുകാരിയെ കാണാനില്ലെന്ന് പരാതി ലഭിച്ചിട്ടും എന്തുകൊണ്ടാണ് പൊലീസ് അതുസംബന്ധിച്ച് ഒരന്വേഷണവും നടത്താതെ നിര്‍വികാരമായിരുന്നത് എന്ന ചോദ്യത്തിന് ഉത്തരം കിട്ടേണ്ടതുണ്ട്. താന്‍ മന്ത്രിയോട് പരാതി പറഞ്ഞതായാണ് രാധയുടെ സഹോദരന്‍ ഭാസ്കരന്റെ മൊഴി. കല്ല് കെട്ടിത്താഴ്ത്തിയ ചാക്കിലുള്ള മൃതദേഹം കിലോമീറ്ററുകള്‍ അകലെയുള്ള പൂക്കോട്ടുംപാടത്തെ കോണ്‍ഗ്രസ് നേതാവും കര്‍ഷക കോണ്‍ഗ്രസ് ജില്ലാ വൈസ് പ്രസിഡന്റുമായ കുമാരന്‍കുട്ടിയുടെ ഉടമസ്ഥതയിലുള്ള ഒരു കുളത്തിലാണ് കൊണ്ടുപോയിട്ടത്. കാടുമൂടിക്കിടക്കുന്ന ഒഴിഞ്ഞ ഒരു പറമ്പിലുള്ള കുളത്തില്‍ നിന്ന് സാധാരണ ഗതിയില്‍ ആ മൃതദേഹം കണ്ടെത്താനുള്ള സാധ്യത കുറവായിരുന്നു. യാദൃച്ഛികമായി മോട്ടോര്‍ നന്നാക്കാനുള്ള തൊഴിലാളികള്‍ അവിടെ എത്തിയതാണ് മൃതദേഹം കണ്ടെത്താന്‍ ഇടയാക്കിയത്. മധ്യവയസ്കയായ രാധ അങ്ങാടിപ്പുറം വരെ പോയെന്ന് കാണിക്കാന്‍ തെളിവുകള്‍ ഉണ്ടാക്കുകയും ഗുരുവായൂര്‍ പോയതാണെന്ന് കള്ളക്കഥയുണ്ടാക്കി പ്രചരിപ്പിക്കുകയും ചെയ്തതിനു പിന്നില്‍ തീര്‍ച്ചയായും ഗൂഢാലോചനയും ആസൂത്രണവുമുണ്ട്. ചിറയ്ക്കല്‍ രാധയെ കാണാനില്ലെന്ന പരാതി കിട്ടി അഞ്ച് ദിവസത്തിനു ശേഷം മാത്രമാണ് മൃതദേഹം കണ്ടെടുത്തത്. അതിന്റെ തൊട്ടടുത്ത ദിവസം തന്നെ ആര്യാടന്റെ പേഴ്സണല്‍ സ്റ്റാഫില്‍ അംഗമായി സര്‍ക്കാര്‍ ശമ്പളം പറ്റുന്ന, കോണ്‍ഗ്രസിന്റെ നിലമ്പൂര്‍ ബ്ലോക്ക് കമ്മിറ്റി ഓഫീസ് സെക്രട്ടറി കൂടിയായ ബി കെ ബിജു കുറ്റം ഏറ്റുപറഞ്ഞുകൊണ്ട് രംഗത്തുവരികയാണ്. തന്റെ പരസ്ത്രീബന്ധം പുറത്തുപറയുമെന്ന് ഭീഷണിപ്പെടുത്തി തന്നെ ബ്ലാക്ക്മെയില്‍ ചെയ്ത് പണംതട്ടുന്ന ചിറയ്ക്കല്‍ രാധയെ ഇല്ലാതാക്കാനാണ് താനും സുഹൃത്ത് ഷംസുദ്ദീനും ചേര്‍ന്ന് മുഖം പൊത്തിപ്പിടിച്ച് കഴുത്തുഞെരിച്ച് അവരെ കൊലപ്പെടുത്തിയതെന്ന് ബിജു നായര്‍ വെളിപ്പെടുത്തിയെന്നാണ് പൊലീസ് ഭാഷ്യം. "രാധയുടെ കൊലപാതകം നടന്ന് മണിക്കൂറുകള്‍ക്കകം പ്രതികളെ പിടികൂടിയതിലെ പൊലീസ് മികവിനെ" പ്രകീര്‍ത്തിച്ചുകൊണ്ട് ഫെബ്രുവരി 11ലെ മലയാളമനോരമ വലിയ പ്രാധാന്യത്തോടെ വാര്‍ത്ത പ്രസിദ്ധീകരിച്ചു. അതാണോ സത്യം? മൃതദേഹം കണ്ടെത്തിയത് അത് യാദൃച്ഛികമായി വെള്ളത്തില്‍ പൊങ്ങിവന്നതിനാലാണ്. പൊലീസ് ചോദ്യം ചെയ്ത് പ്രതിയെക്കൊണ്ട് സത്യം പറയിക്കുകയായിരുന്നില്ല. പ്രതി സ്വയം കുറ്റം ഏറ്റെടുക്കുകയായിരുന്നു. പ്രതിയുടെ വെളിപ്പെടുത്തലും വിശ്വാസയോഗ്യമല്ല. നിലമ്പൂര്‍ പട്ടണത്തിലെ ഏറ്റവും തിരക്കുപിടിച്ച റോഡരികിലാണ് ബ്ലോക്ക് കമ്മിറ്റി ഓഫീസ്. അതിന്റെ നേരേ മുന്നിലാണ് സിപിഐ എമ്മിന്റെ ഏരിയാ കമ്മിറ്റി ഓഫീസ്. അര്‍ധരാത്രിയിലും ഈ പ്രദേശത്ത് ആളൊഴിയാറില്ല. തന്നെ ബ്ലാക്ക്മെയില്‍ ചെയ്യുന്ന രാധയെ കോണ്‍ഗ്രസ് ഓഫീസില്‍ വെച്ച് കൊലപ്പെടുത്തി, ആരുമറിയാതെ മൃതദേഹം അവിടെനിന്ന് ഒഴിവാക്കാമെന്ന് ഒരു പമ്പരവിഡ്ഢിയും ചിന്തിക്കാനിടയില്ല. ഓഫീസില്‍ വെച്ച് കൊല്ലപ്പെട്ട രാധയുടെ മൃതദേഹം ഒന്നോ രണ്ടോ ദിവസം ആരുടെയും ശ്രദ്ധയില്‍പ്പെടാതെ വേസ്റ്റ് പേപ്പറുകള്‍ക്കിടയില്‍ സൂക്ഷിച്ചുവെന്ന കഥയും വിശ്വാസയോഗ്യമല്ല. തിരക്കൊഴിഞ്ഞ നേരമില്ലാത്ത ഭരണകക്ഷി ഓഫീസില്‍, മറ്റാരും കാണാതെ മൃതദേഹം സൂക്ഷിച്ചുവെന്നും അത് ചാക്കിലാക്കി ചുരുട്ടിക്കെട്ടി രണ്ട് പേര്‍ മാത്രം ചേര്‍ന്ന് ആരുടെയും ശ്രദ്ധയില്‍പ്പെടാതെ വാഹനത്തില്‍ കയറ്റി കിലോമീറ്ററുകള്‍ക്കകലെയുള്ള ഒരു കോണ്‍ഗ്രസ് നേതാവിന്റെ കുളത്തില്‍ കൊണ്ടുപോയിട്ടു എന്നുമുള്ള കഥ വിശ്വസിക്കാന്‍ മന്ത്രിയെ പേടിക്കുന്ന നിലമ്പൂരിലെ പൊലീസ് ഓഫീസര്‍മാര്‍ക്ക് മാത്രമേ കഴിയുകയുള്ളൂ. മന്ത്രിയുടെ എംഎല്‍എ ഓഫീസില്‍ മാത്രമല്ല, അദ്ദേഹത്തിന്റെ മകന്‍, മുന്‍സിപ്പല്‍ ചെയര്‍മാന്‍ കൂടിയായ ആര്യാടന്‍ ഷൗക്കത്തിന്റെ ഓഫീസിലും മന്ത്രിയുടെ സഹോദരന്റെ മകനായ ഒരു വക്കീലിന്റെ ഓഫീസിലും ചിറയ്ക്കല്‍ രാധ പതിവായി തൂപ്പുജോലി ചെയ്തിരുന്നുവെന്നാണ് പത്രവാര്‍ത്ത. രാധയെ കാണാനില്ലെന്ന പരാതി കാര്യമായിട്ടെടുത്ത് ഉടനെ അവരെ കണ്ടെത്തണമെന്ന് ആവശ്യപ്പെടാന്‍ എന്തുകൊണ്ട് മന്ത്രി ആര്യാടനും അദ്ദേഹത്തിന്റെ മകന്‍ ആര്യാടന്‍ ഷൗക്കത്തും തയ്യാറായില്ല? തങ്ങള്‍ ഇടപെട്ടിട്ടേയില്ലെന്ന് ഉറക്കെ വിളിച്ചുപറയുന്ന അവര്‍ ഇടപെടേണ്ടതായിരുന്നില്ലേ? മൃതദേഹം പൊങ്ങിവന്നില്ലായിരുന്നെങ്കില്‍ കൊലപാതകം ആരുമറിയാതെ പോകട്ടെയെന്നും രാധ തീര്‍ഥയാത്ര പോയതുതന്നെയെന്ന് എല്ലാവരും കരുതട്ടെയെന്നും അവര്‍ ചിന്തിച്ചിരുന്നുവെന്നാണോ?

കൊലക്കുറ്റം സ്വയം ഏറ്റെടുത്ത ബി കെ ബിജു, രാധയെ കൊലപ്പെടുത്തിയത് എംഎല്‍എ ഓഫീസില്‍ വെച്ചാണെന്ന് ഏറ്റുപറഞ്ഞതായി പൊലീസ് പറയുന്നു. എന്നാല്‍ ഈ കുറ്റസമ്മതം നടന്നിട്ടും എന്തുകൊണ്ട് പൊലീസ് സംഭവസ്ഥലം പൂട്ടി സീല്‍ ചെയ്തില്ല? കുറ്റകൃത്യം നടന്നതായി പറയപ്പെടുന്ന അതേ ഓഫീസില്‍, പിന്നീട് ആര്യാടന്‍ ഷൗക്കത്ത് തന്നെ പങ്കെടുത്തുകൊണ്ട് ഒന്നോ രണ്ടോ പാര്‍ട്ടി യോഗങ്ങള്‍ നടന്നതായി പത്രങ്ങള്‍ റിപ്പോര്‍ട്ട് ചെയ്തിട്ടുണ്ട്. ബോധപൂര്‍വം തെളിവുകള്‍ നശിപ്പിക്കാന്‍ കോണ്‍ഗ്രസ് നേതാക്കള്‍ക്ക് പൊലീസ് അവസരം നല്‍കുകയായിരുന്നു. മാത്രമല്ല, കേസന്വേഷണത്തിന്റെ ചുമതലയുള്ള സിഐ എ പി ചന്ദ്രന്‍, രാധയുടെ വീട്ടില്‍ ചെന്ന് മൊഴിയെടുക്കുമ്പോള്‍ അദ്ദേഹത്തിനൊപ്പം മേലേക്കളം നാരായണന്‍, ജൂപ്പിറ്റര്‍ സുരേഷ് എന്നീ അറിയപ്പെടുന്ന കോണ്‍ഗ്രസ് ഗുണ്ടാ നേതാക്കളും ഉണ്ടായിരുന്നു. ബന്ധുക്കള്‍ മൊഴി കൊടുക്കുമ്പോള്‍, 'അരുതാത്തത് പറയരുത്' എന്ന മുന്നറിയിപ്പ് നല്‍കാനായിരുന്നു ഇത്. മന്ത്രിക്കും ഭരണകക്ഷി നേതാക്കള്‍ക്കും വിടുപണി ചെയ്യുന്ന പൊലീസ് ഓഫീസര്‍മാരുടെ നാണംകെട്ട ഈ ദാസ്യവേല പൊതുജനങ്ങളില്‍ ഉയര്‍ത്തിവിട്ട അമര്‍ഷവും വെറുപ്പുമാണ് തുടര്‍ച്ചയായി നടക്കുന്ന പ്രക്ഷോഭങ്ങളിലൂടെ ദൃശ്യമാകുന്നത്. മൃതദേഹം കണ്ടെത്തിയതിന്റെ അടുത്ത ദിവസം മുതല്‍ സിപിഐ എമ്മിന്റെയും ഡിവൈഎഫ്ഐയുടെയും മഹിളാ അസോസിയേഷന്റെയും തൊഴിലാളി സംഘടനകളുടെയും മറ്റും നേതൃത്വത്തില്‍ നടക്കുന്ന പ്രക്ഷോഭങ്ങള്‍ നിലമ്പൂരിനെ പ്രകമ്പനം കൊള്ളിക്കുകയാണ്. ബിജെപിയും എസ്ഡിപിഐയും ഇടതുപക്ഷ പാര്‍ടികളുമെല്ലാം രോഷപ്രകടനവുമായി രംഗത്തുവന്നു. സിപിഐ എമ്മിന്റെയും സിപിഐയുടെയും ഉന്നത നേതാക്കള്‍ രാധയുടെ വീട്ടിലെത്തി കുടുംബാംഗങ്ങളെ ആശ്വസിപ്പിച്ചു. താന്‍ ഇടപെട്ടില്ലെന്നും കുറ്റവാളികള്‍ക്ക് വധശിക്ഷ നല്‍കട്ടെയെന്നും മന്ത്രി ആര്യാടന്റെ പ്രസ്താവന വന്നു. മകന്‍ നഗരസഭാ ചെയര്‍മാനും അതുതന്നെ പറയുന്നു. എന്തുകൊണ്ട് രാധയുടെ സഹോദരന്റെ പരാതിയില്‍ അന്വേഷണം നടന്നില്ല? എന്തുകൊണ്ട് രാധയുടെ സഹോദരന്‍ സംശയമുണ്ടെന്ന് നേരില്‍ പറഞ്ഞിട്ടും രാധ ജോലി ചെയ്തിരുന്ന ബ്ലോക്ക് കമ്മിറ്റി ഓഫീസിലും ആര്യാടന്‍ ഷൗക്കത്തിന്റെ ഓഫീസിലും ആര്യാടന്‍ മുഹമ്മദിന്റെ സഹോദരപുത്രന്‍ ആര്യാടന്‍ ആസാദിന്റെ ഓഫീസിലും നേരിട്ടുചെന്ന് അന്വേഷണം നടത്തിയില്ല? തങ്ങള്‍ക്കുവേണ്ടി ജോലിചെയ്തിരുന്ന രാധയ്ക്കു വേണ്ടി അത്രയെങ്കിലും ചെയ്യാന്‍, ഇടപെടാന്‍ അവര്‍ക്ക് ബാധ്യതയും ചുമതലയും ഇല്ലായിരുന്നില്ലേ? ഉണ്ടെന്നാണ് ബഹുജനങ്ങള്‍ പറയുന്നത്. അതുകൊണ്ടാണ് ദിവസങ്ങള്‍ക്കു ശേഷം ഫെബ്രുവരി 15ന് മന്ത്രി ആര്യാടന്‍ ഒടുവില്‍ രാധയുടെ വീട്ടിലെത്തിയപ്പോള്‍ സ്ത്രീജനങ്ങള്‍ ഒത്തുകൂടി കരിങ്കൊടി കാട്ടിയത്. മന്ത്രി അവരെ നേരിട്ടത്, തനിക്കൊപ്പം കാറില്‍ വന്ന കോണ്‍ഗ്രസ് ഗുണ്ടകള്‍ മേലേക്കളത്തില്‍ നാരായണനെയും ജൂപ്പിറ്റര്‍ സുരേഷിനെയും അഴിച്ചുവിട്ടുകൊണ്ടാണ്. മന്ത്രിയുടെയും പൊലീസിന്റെയും സാന്നിധ്യത്തിലാണ് ഈ ഗുണ്ടകള്‍ സ്ത്രീകള്‍ക്കെതിരെ അക്രമം നടത്തുകയും ബലം പ്രയോഗിച്ച് വസ്ത്രങ്ങള്‍ വലിച്ചുകീറുകയും ചെയ്തത്. അതും വിശേഷിച്ച് ശ്രീമതി സോണിയാഗാന്ധി സ്ത്രീകള്‍ക്കായി 'നിര്‍ഭയ' പദ്ധതി ഉദ്ഘാടനം നിര്‍വഹിച്ച അതേ ദിവസം. ഇതേ ഗുണ്ടകളുടെ സാന്നിധ്യത്തില്‍ തന്നെയാണ് നേരത്തേ സിഐ എ പി ചന്ദ്രന്‍ രാധയുടെ ബന്ധുക്കളില്‍ നിന്ന് പരസ്യമായി മൊഴിയെടുത്തതും. സംശയത്തിന്റെ നിഴലില്‍ നില്‍ക്കുന്ന ഈ സിഐ എ പി ചന്ദ്രനെ സ്ഥലംമാറ്റിയെന്നാണ് പത്രങ്ങള്‍ പറഞ്ഞത്. എന്നാല്‍ ഈ കൊള്ളരുതായ്മയുടെ പേരിലല്ല, മറിച്ച് വരാന്‍പോകുന്ന തെരഞ്ഞെടുപ്പിനു വേണ്ടിയുള്ള ഒരു ക്രമീകരണം മാത്രമാണത് എന്നാണ് മന്ത്രിയുടെ പ്രതികരണം. ഏതായാലും എ പി ചന്ദ്രന്‍ ഇപ്പോഴും നിലമ്പൂരിലെ സിഐ ആയി പ്രവര്‍ത്തിക്കുകയാണ്. പുതിയ ആഭ്യന്തരമന്ത്രി രമേശ് ചെന്നിത്തലയും 'ആദര്‍ശവാന്‍' എന്ന് മേനിനടിക്കുന്ന കോണ്‍ഗ്രസിന്റെ പുതിയ പ്രസിഡന്റ് വി എം സുധീരനും 'കണ്ണുചിമ്മിയാല്‍ ഇരുട്ടാകും' എന്നാണോ കരുതുന്നത്? അങ്ങനെയാണെങ്കില്‍ വിനാശകാലേ വിപരീതബുദ്ധി എന്നു മാത്രമേ പറയേണ്ടതുള്ളൂ. നിലമ്പൂരിലെയും മലപ്പുറം ജില്ലയിലെയും ബഹുജനങ്ങള്‍ ഇതങ്ങനെ വിടാന്‍ തയ്യാറല്ല. അതിന്റെ ഒന്നാന്തരം വിസ്ഫോടനമാണ് കഴിഞ്ഞ ദിവസം കണ്ടത്. ഫെബ്രുവരി 15ന് രാവിലെയാണ് രാധയുടെ വീട്ടില്‍ മന്ത്രി ആര്യാടന്‍ എത്തിയത്. അപ്രതീക്ഷിതമായി പൊലീസിന്റെയും ഒരു സംഘം കോണ്‍ഗ്രസ് ഗുണ്ടകളുടെയും സംരക്ഷണത്തില്‍ എത്തിച്ചേര്‍ന്ന മന്ത്രിയെ വരവേറ്റത് ക്ഷുഭിതരായ ഒരു സംഘം അയല്‍വാസികളാണ്. പ്രതിഷേധമറിയിക്കാന്‍ കരിങ്കൊടി വീശിയ അവരെ മര്‍ദ്ദിച്ചവശരാക്കുകയും മാനഹാനി വരുത്താന്‍ ശ്രമിക്കുകയുമാണ് കോണ്‍ഗ്രസുകാര്‍ ചെയ്തത്. അതും മന്ത്രിയും പൊലീസ് ഓഫീസര്‍മാരും നോക്കിനില്‍ക്കുമ്പോള്‍. തുടര്‍ന്ന് നിലമ്പൂര്‍ നഗരം കണ്ടത് മുമ്പൊരിക്കലും കണ്ടിട്ടില്ലാത്ത വിധത്തിലുള്ള അമര്‍ഷത്തിന്റെ വിസ്ഫോടനമാണ്. നേരത്തേ നിശ്ചയിച്ചിരുന്ന മഹിളാ അസോസിയേഷന്റെ നേതൃത്വത്തിലുള്ള പൊലീസ് സ്റ്റേഷന്‍ മാര്‍ച്ചിനൊപ്പം ആയിരക്കണക്കിന് ബഹുജനങ്ങള്‍ അണിനിരന്നു. സ്ത്രീകള്‍ക്കെതിരെ അതിക്രമം കാട്ടിയ അക്രമികള്‍ക്കെതിരെ ജാമ്യമില്ലാ വകുപ്പുകള്‍ ചേര്‍ത്ത് കേസെടുക്കണമെന്നും അക്രമികളെ ഉടന്‍ അറസ്റ്റുചെയ്യണമെന്നുമായിരുന്നു ആവശ്യം. സിപിഐ എം കേന്ദ്ര കമ്മിറ്റിയംഗം കെ കെ ശൈലജ ടീച്ചര്‍, സംസ്ഥാന കമ്മിറ്റിയംഗം പി കെ സൈനബ, ജില്ലാ സെക്രട്ടറി പി പി വാസുദേവന്‍, ജില്ലാ കമ്മിറ്റി അംഗങ്ങളായ ജോര്‍ജ് കെ ആന്റണി, പി ടി ഉമ്മര്‍, ടി പി ജോര്‍ജ്, കെ പി സുമതി എന്നിവര്‍ക്കൊപ്പം ആയിരക്കണക്കിന് സ്ത്രീകളും പുരുഷന്‍മാരും പൊലീസ് സ്റ്റേഷന്‍ ഉപരോധിച്ചുകൊണ്ട് കുത്തിയിരിപ്പ് സമരം ആരംഭിച്ചു. അനുനയത്തിന്റെ സ്വരത്തിലും ഭീഷണിയുടെ സ്വരത്തിലും ഇടപെട്ട് സമരം അവസാനിപ്പിക്കാന്‍ പൊലീസ് വലിയ ശ്രമം നടത്തി. എന്നാല്‍ ആളിക്കത്തിയ അമര്‍ഷത്തെ തണുപ്പിക്കാന്‍ അവര്‍ക്കായില്ല. ഒടുവില്‍ പെരിന്തല്‍മണ്ണ സബ് കലക്ടര്‍ വന്നു. അതിനകം സിപിഐ എം കേന്ദ്ര കമ്മിറ്റിയംഗം ഡോ. തോമസ് ഐസക്കും രംഗത്തെത്തി. തുടര്‍ന്ന് നടന്ന ചര്‍ച്ചയില്‍ ആശുപത്രിയില്‍ അഭയം തേടിയ അക്രമികളായ മേലേക്കളം നാരായണനെയും ജൂപ്പിറ്റര്‍ സുരേഷിനെയും ആശുപത്രിയില്‍ നിന്ന് ഡിസ്ചാര്‍ജ് ചെയ്യുന്നതുവരെ പൊലീസ് നിരീക്ഷണത്തില്‍ വെക്കാമെന്നും തുടര്‍ന്ന് അറസ്റ്റുചെയ്ത് സ്ത്രീകള്‍ക്കെതിരെ അക്രമം നടത്തിയതിന് അര്‍ഹമായ വകുപ്പുകള്‍ ചേര്‍ത്ത് കേസെടുക്കാമെന്നും പൊലീസ് ഓഫീസര്‍മാര്‍ സബ് കലക്ടറുടെ സാന്നിധ്യത്തില്‍ ഉറപ്പുനല്‍കി. അങ്ങനെയാണ് സമരം അവസാനിപ്പിച്ചത്. ചിറയ്ക്കല്‍ രാധയുടെ കൊലപാതകം സംബന്ധിച്ച് സത്യസന്ധമായ അന്വേഷണം നടക്കണം. എന്തായിരുന്നു രാധക്ക് അറിയാമായിരുന്ന ആ പരമരഹസ്യം? മാസങ്ങള്‍ക്കു മുമ്പ് കേരളകൗമുദി പത്രം ചൂണ്ടിക്കാട്ടിയത്, സോളാര്‍ കേസിലെ പ്രതി സരിത നിലമ്പൂരില്‍ ക്യാമ്പുചെയ്തിട്ടുണ്ടെന്നും അവര്‍ ആര്യാടനുമായും മകന്‍ ഷൗക്കത്തുമായും ബന്ധം സ്ഥാപിച്ചിട്ടുണ്ടെന്നുമാണ്. രാധക്കറിയാമായിരുന്ന പരമരഹസ്യം അതാണോ? തന്റെ സഹോദരിയുടെ മരണത്തിനു പിന്നില്‍ ഉന്നതരുണ്ട്, അവരെ ചോദ്യംചെയ്യണമെന്ന് രാധയുടെ സഹോദരന്‍ ടിവി ചാനലില്‍ ഉറപ്പിച്ചുപറയുന്നുണ്ട്. മുമ്പ് രണ്ടു തവണ രാധയെ വാഹനമിടിച്ച് കൊലപ്പെടുത്താന്‍ ചിലര്‍ ശ്രമിച്ചതായും ഭാസ്കരന്‍ പറയുന്നുണ്ട്. എന്താണതിന്റെ സത്യാവസ്ഥ?

തിരക്കേറിയ കോണ്‍ഗ്രസ് ഓഫീസില്‍ മൃതദേഹം ഒന്നോ രണ്ടോ ദിവസം സൂക്ഷിച്ചിരുന്നുവെന്നും വാര്‍ത്തകള്‍ വന്നിട്ടുണ്ട്. എങ്കില്‍ എങ്ങനെയാണ് മറ്റാരും കാണാതെ അവിടെ സൂക്ഷിക്കാന്‍ സാധിച്ചത്? ചാക്കില്‍ ചുരുട്ടിക്കൂട്ടി ഒരു മനുഷ്യശരീരം എങ്ങനെയാണ് രണ്ട് പേര്‍ ചേര്‍ന്ന് താഴെയിറക്കി കാറില്‍ കയറ്റി ആരും കാണാതെ കൊണ്ടുപോയത്? അവരെ സഹായിക്കാന്‍ വേറെയും ചിലര്‍ കൂട്ടിനുണ്ടായിരുന്നുവെന്ന് കരുതുന്നതല്ലേ കൂടുതല്‍ വിശ്വാസയോഗ്യം? എന്തുകൊണ്ടാണ് മൃതദേഹം കെട്ടിത്താഴ്ത്താന്‍ വളരെ ദൂരത്തുള്ള കോണ്‍ഗ്രസ് നേതാവിന്റെ കുളം തന്നെ തെരഞ്ഞെടുത്തത്  എന്നിങ്ങനെ ഒട്ടേറെ ചോദ്യങ്ങള്‍ ഉയര്‍ന്നുവരുന്നുണ്ട്. മറ്റൊരു കഥ, പ്രതി ബി കെ ബിജു ഒറ്റയ്ക്ക്, തന്റെ പരസ്ത്രീബന്ധം മറച്ചുവെക്കാന്‍ ആസൂത്രണം ചെയ്ത് കൊലപ്പെടുത്തിയെന്നാണ്. നേരത്തേ ചൂണ്ടിക്കാട്ടിയപോലെ ഒട്ടുംതന്നെ വിശ്വാസയോഗ്യമല്ല ആ കഥ.

രാവിലെ എട്ട് മണിക്ക് ഒറ്റയ്ക്കു മുന്നില്‍ വന്നപ്പോള്‍ ബലാല്‍സംഗം ചെയ്യാന്‍ ശ്രമം നടത്തിയെന്നും വഴങ്ങാതെ വന്നപ്പോള്‍ പുറത്തറിയാതിരിക്കാന്‍ കൊലപ്പെടുത്തിയെന്നും പറയുന്നതായിരുന്നു കൂടുതല്‍ യുക്തിഭദ്രം. പ്രത്യക്ഷത്തില്‍ ബലാല്‍സംഗം നടന്നതായി കാണുന്നുവെന്ന് പോസ്റ്റുമോര്‍ട്ടം നടത്തിയ ഡോക്ടര്‍മാര്‍ പറഞ്ഞതായി കണ്ടു. എന്നാല്‍ അങ്ങനെ നടന്നിട്ടില്ലെന്ന് ഉറപ്പിച്ചു പറയുന്നത് പൊലീസ് ഓഫീസറാണ്. അവരാണോ പോസ്റ്റുമോര്‍ട്ടം നടത്തിയത്? ചുരുക്കത്തില്‍ എന്തെങ്കിലും മഹാരഹസ്യം പുറത്തറിയാതിരിക്കാന്‍ വേണ്ടിയാണോ, അതോ കാണാന്‍ പാടില്ലാത്ത എന്തെങ്കിലും ഓഫീസില്‍ വെച്ച് രാധ കാണാനിട വന്നതാണോ, അതോ പരാജയപ്പെട്ട ബലാല്‍സംഗ ശ്രമം മൂടിവെക്കാന്‍ വേണ്ടിയാണോ നിഷ്ഠുരമായ ഈ കൊലപാതകം നടത്തിയത് എന്നറിയാന്‍ വിശ്വാസയോഗ്യമായ നിലയില്‍ ഉന്നതരായ ഒരു സംഘം ഓഫീസര്‍മാരെക്കൊണ്ട് ഈ കേസ് അന്വേഷിപ്പിക്കേണ്ടതായിവരും.

**പി പി വാസുദേവന്‍

കേരളരക്ഷാ മാര്‍ച്ച് ചരിത്രത്തോടും സമൂഹത്തോടും പറയുന്നത്

മതനിരപേക്ഷത കാക്കുവാനും ആഗോളവത്കരണം സൃഷ്ടിച്ച വികസന പ്രതിസന്ധിയില്‍നിന്ന് കേരളത്തെ രക്ഷിക്കാനുമുള്ള രാഷ്ട്രീയസന്ദേശം ജനങ്ങളിലെത്തിച്ചുകൊണ്ടാണ് കേരളരക്ഷാ മാര്‍ച്ച് പ്രയാണം തുടരുന്നത്. അമേരിക്കന്‍ മോഡല്‍ അറബിക്കടലിലെന്ന് പ്രഖ്യാപിച്ച്, സര്‍ സി പിയുടെ പീരങ്കിക്കുഴലുകള്‍ക്ക് മുന്നില്‍ വിരിമാറു കാണിച്ച പുന്നപ്ര വയലാര്‍ ധീരന്മാരുടെ മണ്ണില്‍നിന്നാണ് മാര്‍ച്ച് പ്രയാണം ആരംഭിച്ചത്. സാമ്രാജ്യത്വ വിരുദ്ധ സമരങ്ങളുടെ ധീരോദാത്തമായ സ്മരണകളുണര്‍ത്തുന്ന കോഴിക്കോട് കടപ്പുറത്ത് ഫെബ്രുവരി 26ന് മാര്‍ച്ച് സമാപിക്കും.

കേരള രക്ഷാ മാര്‍ച്ചിനു മഞ്ചേരിയില്‍ നല്‍കിയ സ്വീകരണം.

പതിനാറാം ലോക്സഭാ തെരഞ്ഞെടുപ്പിന്റെ പശ്ചാത്തലത്തില്‍ വമ്പിച്ച രാഷ്ട്രീയ പ്രാധാന്യമാണ് കേരളരക്ഷാ മാര്‍ച്ചിനുള്ളത്. നവലിബറല്‍ നയങ്ങള്‍ തകര്‍ത്തുകളഞ്ഞ സമ്പദ്ഘടനയും അത് സൃഷ്ടിച്ച ജീവിതപ്രതിസന്ധികളും ജനങ്ങളെയൊക്കെ വേട്ടയാടുകയാണ്. യുപിഎ സര്‍ക്കാര്‍ കോര്‍പറേറ്റ് കൊള്ളക്കായി അടിച്ചേല്‍പ്പിച്ച നയങ്ങള്‍ ദുസ്സഹമായ വിലക്കയറ്റവും അഴിമതിയുമാണ് വളര്‍ത്തിയിരിക്കുന്നത്. കാര്‍ഷിക വ്യവസായ മേഖലകളെല്ലാം തകരുകയും സമ്പദ്ഘടന സമ്പൂര്‍ണമായ മുരടിപ്പിലേക്ക് നീങ്ങുകയുമാണ്. മതഭീകരവാദം മോഡിയിസത്തിന്റെ രൂപത്തില്‍ രാജ്യത്തിന്റെ മതനിരപേക്ഷ ഘടനക്ക് ഭീഷണി ഉയര്‍ത്തുകയാണ്. ഗുജറാത്തിലെ നിഷ്ഠൂരമായ നരഹത്യയുടെ ചോരക്കറ കഴുകിക്കളയുവാന്‍ കോര്‍പറേറ്റ് മാധ്യമങ്ങള്‍ മോഡിയെ വികാസ് പുരുഷനായി അവതരിപ്പിക്കുകയാണ്. കോടികള്‍ ഒഴുക്കി അമേരിക്കന്‍ പബ്ലിക് റിലേഷന്‍സ് കമ്പനികള്‍ മോഡിക്ക് പുതിയ പ്രതിച്ഛായ നിര്‍മിക്കുന്നു. കേരളരക്ഷാ മാര്‍ച്ച് രാജ്യം നേരിടുന്ന അതീവ ഗുരുതരമായ സാമൂഹ്യ സാമ്പത്തിക പ്രശ്നങ്ങള്‍ ജനങ്ങളോട് വിശദീകരിച്ചാണ് മുന്നേറുന്നത്. സമരോത്സുകവും വികസനോന്മുഖവുമായ ബഹുജന സംവാദത്തിന്റെയും വിദ്യാഭ്യാസത്തിന്റെയും സഞ്ചരിക്കുന്ന വേദിയായി കേരളരക്ഷാ മാര്‍ച്ച് മാറിയിരിക്കുന്നു. കോര്‍പറേറ്റ് മാധ്യമങ്ങളും വലതുപക്ഷ ബുദ്ധിജീവികളും ഈ ബഹുജന സംവാദത്തില്‍നിന്ന് മുഖംതിരിച്ച് കപടപ്രശ്നങ്ങള്‍ ഉയര്‍ത്തുകയാണ്. കോടതി വിചാരണചെയ്ത് വിധിപറഞ്ഞ കേസില്‍ സിബിഐ അന്വേഷണം വേണമെന്ന പ്രചാരണ കോലാഹലം ഇതാണ് കാണിക്കുന്നത്.

കേരളീയ വികസനത്തിലും പുരോഗതിയിലും ഇടതുപക്ഷ ഇടപെടലുകള്‍ സൃഷ്ടിച്ച സാധ്യതകളെയും നേട്ടങ്ങളെയും ഇല്ലാതാക്കിക്കൊണ്ടാണ് യുഡിഎഫ് സര്‍ക്കാര്‍ സംസ്ഥാനം ഭരിക്കുന്നത്. എമര്‍ജിങ് കേരളയും വിഷന്‍ 2030 ഉം ആഗോള ഫൈനാന്‍സ് മൂലധനത്തിന്റെ വാണിജ്യ താല്‍പ്പര്യങ്ങള്‍ക്കും റിയല്‍ എസ്റ്റേറ്റ് വികസനത്തിനും കേരളത്തെ എറിഞ്ഞുകൊടുക്കുകയാണ്. പ്രകൃതി വിഭവങ്ങളും സമ്പത്തുല്‍പാദനമേഖലകളും ഊഹക്കച്ചവട മൂലധനശക്തികള്‍ക്ക് തീറെഴുതി കേരളം ആര്‍ജിച്ച എല്ലാ നേട്ടങ്ങളെയും ഇല്ലാതാക്കുകയാണ് ഭരണാധികാരികള്‍. സോളാറും നെല്ലിയാമ്പതിയും ആറന്മുള വിമാനത്താവള വികസനവുമെല്ലാം യുപിഎ സര്‍ക്കാറിനെപ്പോലെ യുഡിഎഫ് സര്‍ക്കാറും നടപ്പാക്കിക്കൊണ്ടിരിക്കുന്ന അഴിമതിയും വന്‍ പണത്തട്ടിപ്പുമാണ് പുറത്തുകൊണ്ടുവന്നിരിക്കുന്നത്. ആഗോളവത്കരണത്തിന്റെയും മതഭീകരവാദത്തിന്റെയും വിധ്വംസകമായ കടന്നുകയറ്റങ്ങളില്‍ തകര്‍ന്നുപോകുന്ന രാജ്യത്തിന്റെ സമ്പദ്ഘടനയുടെയും മതേതരമായ രാഷ്ട്രീയ ഘടനയെയും സംരക്ഷിക്കാനുള്ള ജാഗ്രതയും ഇക്കാലത്ത് ഏറ്റെടുക്കേണ്ട സമരപോരാട്ടങ്ങളുടേതായ കടമകളെയും ബഹുജനങ്ങള്‍ക്ക് മുമ്പില്‍ വിശദീകരിച്ചുകൊണ്ടാണ് കേരള രക്ഷാ മാര്‍ച്ച് പര്യടനം തുടരുന്നത്.

കോണ്‍ഗ്രസ്സും ബിജെപിയും പ്രതിനിധീകരിക്കുന്ന സാമ്രാജ്യത്വ രാഷ്ട്രീയവും സാമ്പത്തികനയങ്ങളും നമ്മുടെ രാജ്യത്തെ പാപ്പരീകരിച്ചിരിക്കുകയാണ്. സാമ്രാജ്യത്വ ആഗോളവത്കരണനയങ്ങള്‍ സാമ്പത്തിക തകര്‍ച്ചയുടെയും രാഷ്ട്രീയ അസ്ഥിരീകരണത്തിന്റെയും ജീര്‍ണശക്തികളെ ലോകമെമ്പാടും വളര്‍ത്തിയിരിക്കുകയാണ്. ഉദാരവല്‍ക്കരണ നയങ്ങള്‍ ലോകമെമ്പാടുമുള്ള തൊഴിലാളികളെ തൊഴിലിടങ്ങളില്‍നിന്നും തെരുവുകളിലേക്ക് വലിച്ചെറിഞ്ഞിരിക്കുകയാണ്. ഗതകാല പോരാട്ടങ്ങളിലൂടെ നേടിയെടുത്ത അവകാശങ്ങളും സാമ്പത്തികനേട്ടങ്ങളും നവ ലിബറല്‍ നയങ്ങള്‍ കവര്‍ന്നെടുക്കുന്നു. തൊഴിലില്ലായ്മ അഭൂതപൂര്‍വമായ തോതില്‍ കൂടിവരികയാണ്. യഥേഷ്ടം തൊഴിലാളികളെ സ്വീകരിക്കുകയോ പുറന്തള്ളുകയോ ചെയ്യുന്ന ഹയര്‍ ആന്‍ഡ് ഫയര്‍ വ്യവസ്ഥയും കോണ്‍ട്രാക്ട് സമ്പ്രദായവുമെല്ലാം സമകാലീന ലോകത്തില്‍ കൂലിയടിമത്തത്തെ നിഷ്ഠുരമായ മാനങ്ങളിലെത്തിച്ചിരിക്കുകയാണ്. സാമ്പത്തിക പ്രതിസന്ധിയും വിലക്കയറ്റവും ലോകമെമ്പാടുമെന്നപോലെ ഇന്ത്യയിലെ ജനങ്ങളെ വേട്ടയാടുകയാണ്. എല്ലാവിധ ഹീനമാര്‍ഗങ്ങളും ഉപയോഗിച്ചുകൊണ്ട് ചൂഷണവും സ്വാര്‍ഥതയുമെല്ലാം ബീഭത്സമായ വിതാനങ്ങളിലേക്ക് സാമ്രാജ്യത്വത്തിന്റെ കമ്പോളവ്യവസ്ഥ എത്തിച്ചിരിക്കുന്നു.

വലതുപക്ഷ സേവകരായ പുതിയ നൈതിക രാഷ്ട്രീയ വാദികള്‍ പലപ്പോഴും അവഗണിച്ചുകളയുന്നത് അഴിമതിയും മനുഷ്യത്വരഹിതമായ ചൂഷണവുമെല്ലാം മുതലാളിത്തവ്യവസ്ഥയുടെ നൈസര്‍ഗിക സ്വഭാവവിശേഷണമാണെന്ന യാഥാര്‍ഥ്യത്തെയാണ്. നവമുതലാളിത്തത്തിന്റെ ചലനനിയമങ്ങളെ മനസ്സിലാക്കാന്‍ വിസമ്മതിക്കുന്ന കാല്‍പ്പനിക ചിന്തകളാണല്ലോ ഇടതുപക്ഷ തീവ്രവാചകമടിക്കാരായ ഈ നവ നൈതികതാവാദികളെ നയിക്കുന്നത്. വ്യവസ്ഥയുടെ അക്രമോത്സുകതയും ഭരണവര്‍ഗരാഷ്ട്രീയത്തിന്റെ ജീര്‍ണതയെയും മറച്ചുപിടിക്കാനാണ് ഇക്കൂട്ടര്‍ വന്‍കിട മാധ്യമ സഹായത്തോടെ അക്രമരാഷ്ട്രീയത്തിനും കൊലപാതകരാഷ്ട്രീയത്തിനും എതിരെ വാചകമടിക്കുന്നത്. ഇന്‍ഫോര്‍മാറ്റിക്സിന്റെയും ടെലിമാറ്റിക്സിന്റെയും ഏറ്റവും ആധുനികമായ സാങ്കേതികതയെ വരെ ഉപയോഗപ്പെടുത്തിക്കൊണ്ടുള്ള പാതകപൂര്‍ണവും തൊഴിലാളിവര്‍ഗവിരുദ്ധവുമായ ഒരു രാഷ്ട്രീയസംസ്കാരം വളര്‍ത്തുകയാണ് നവമുതലാളിത്തം. സാമ്രാജ്യത്വത്തെയും പുനരുത്ഥാനത്തെയും ഫലപ്രദമായി പ്രതിരോധിക്കാന്‍ പ്രാപ്തമായ സമഗ്രമായൊരു വീക്ഷണവും ഇച്ഛാശക്തിയുമുള്ള ഇടതുപക്ഷ രാഷ്ട്രീയത്തെയും മതേതരശക്തികളെയും തകര്‍ക്കുകവഴി ആഗോള മൂലധനവ്യവസ്ഥക്ക് അതിന്റെ അധിനിവേശം സുഗമമാക്കാമെന്നാണ് പ്രതിവിപ്ലവശക്തികള്‍ കണക്കുകൂട്ടുന്നത്. സാമ്രാജ്യത്വ അധിനിവേശ താല്പര്യങ്ങള്‍ക്കായുള്ള ആഗോളപദ്ധതികളുടെ ഭാഗമാണ് കേരളത്തിലിപ്പോള്‍ ഇടതുപക്ഷ പ്രസ്ഥാനങ്ങള്‍ക്കും വിശിഷ്യ സിപിഐ എമ്മിനുമെതിരെ നടക്കുന്ന ഹീനമായ വലതുപക്ഷ കടന്നാക്രമണങ്ങള്‍. തീര്‍ച്ചയായും ഇതൊരു പുതിയ കാര്യമല്ലെങ്കിലും വര്‍ത്തമാനലോകത്തിലെ ജനസമൂഹങ്ങളുടെ പ്രതിരോധത്തിന്റെയും അതിജീവനത്തിന്റെയും സാമൂഹ്യാവലംബങ്ങളായ പ്രസ്ഥാനങ്ങളെയും രാഷ്ട്രഘടനകളെയുംവരെ ഉന്മൂലനം ചെയ്യുക എന്ന സിഐഎ തന്ത്രത്തിന്റെ പശ്ചാത്തലത്തില്‍ വിപ്ലവശക്തികള്‍ എന്തുവിലകൊടുത്തും ചെറുത്തുതോല്‍പ്പിക്കേണ്ട പ്രതിലോമകരമായൊരു പ്രവണതയാണ് ഇത്.

സാമ്രാജ്യത്വവും അതിന്റെ ദല്ലാളന്മാരായ ബൂര്‍ഷ്വാ രാഷ്ട്രീയ നേതാക്കളും അതിന്റെ നാനാതരത്തിലുള്ള ചോറ്റുപട്ടികളും സിപി ഐ എമ്മിനെതിരെ നടത്തിക്കൊണ്ടിരിക്കുന്ന ഹീനമായ കടന്നാക്രമണങ്ങളെ പ്രതിരോധിക്കുവാന്‍ ഞങ്ങള്‍ ഒറ്റക്കെട്ടാണെന്ന പ്രതിജ്ഞയും പ്രഖ്യാപനവുമായിട്ടുകൂടിയാണ് കേരള രക്ഷാ മാര്‍ച്ചിലെ വന്‍ ജനസാന്നിധ്യമിപ്പോള്‍ സ്വയം വിളംബരം ചെയ്യുന്നത്. അത് എല്ലാ തരത്തിലുമുള്ള പിന്തിരിപ്പന്മാരെയും വിളറിപിടിപ്പിക്കുന്നുണ്ട്. അപവാദപ്രചാരണങ്ങളും നുണക്കഥകളുംകൊണ്ട് തകര്‍ത്തുകളയാവുന്ന, സിബിഐയുടെ ഉണ്ടയില്ലാ വെടിപോലത്തെ ഗൂഢാലോചനക്കഥകള്‍കൊണ്ട് കഥകഴിച്ചുകളയാവുന്ന കാറ്റത്തെ കിളിക്കൂടല്ല കമ്യൂണിസ്റ്റ് പാര്‍ടികളെന്ന് ഒരിക്കല്‍ക്കൂടി കുത്തക മാധ്യമങ്ങളിലെ മക്കാര്‍ത്തിയന്‍ മനഃസ്ഥിതിക്കാരായ പത്രാധിപന്മാരെയും ചാനല്‍ മുതലാളിമാരെയും ഇടതുപക്ഷ കേരളം ഓര്‍മിപ്പിക്കുകയാണ്. വലതുപക്ഷ രാഷ്ട്രീയത്തിനും അവരുടെ കൈയില്‍ കളിക്കുന്ന ഇടതുപക്ഷ വാചകമടിക്കാര്‍ക്കും സ്വീകരണകേന്ദ്രങ്ങളിലെത്തുന്ന ജനസഹസ്രങ്ങള്‍ നിങ്ങളുടെ നുണക്കഥകള്‍ക്ക് അത്രയെളുപ്പം കമ്യൂണിസ്റ്റ് പ്രസ്ഥാനത്തെ തകര്‍ത്തുകളയാന്‍ കഴിയില്ലെന്ന മുന്നറിയിപ്പ് നല്‍കുകയാണ്. ചരിത്രത്തില്‍ എല്ലാകാലത്തും കമ്യൂണിസ്റ്റുകാരുടെ രക്തത്തിനുവേണ്ടി ദാഹിച്ചുനടന്ന ഭരണവ്യവസ്ഥയുടെ നിഷ്ഠുരതകളോട് ഏറ്റുമുട്ടിക്കൊണ്ടാണ് തൊഴിലാളിവര്‍ഗവും മര്‍ദിത ജനവിഭാഗങ്ങളും മുന്നേറിയിട്ടുള്ളത്.

ഓരോ സ്വീകരണകേന്ദ്രത്തിലും ഒഴുകിയെത്തുന്ന ജനസഹസ്രങ്ങള്‍ കണ്ഠമിടറി വിളിച്ചുപറയുന്നത് ചോരച്ചാലുകള്‍ നീന്തിക്കടന്ന ജനകോടികളുടെ പ്രസ്ഥാനത്തെ തകര്‍ത്തുകളയാമെന്ന് ആരും വ്യാമോഹിക്കേണ്ടതില്ലെന്നാണ്. സ്വീകരണകേന്ദ്രങ്ങളെ മഹാസാഗരമാക്കി മാറ്റുന്ന ജനസഹസ്രങ്ങള്‍ പ്രകടിപ്പിക്കുന്ന കമ്യൂണിസ്റ്റ് സൗഭ്രാത്രവും പാര്‍ടിക്കൂറും തീര്‍ച്ചയായും വര്‍ഗശത്രുക്കള്‍ക്കും വര്‍ഗവഞ്ചകര്‍ക്കുമുള്ള താക്കീതും ഏത് പ്രതികൂലാവസ്ഥയെയും അതിജീവിച്ച് മുന്നോട്ടുപോകാനുള്ള ആഹ്വാനവുമായി മാറുകയാണ്. ഇടതുപക്ഷ അണികള്‍ക്കിടയില്‍ സന്ദിഗ്ധതയും ആശയക്കുഴപ്പവും സൃഷ്ടിച്ച് ജീര്‍ണോന്മുഖവും മൃതപ്രായവുമായിരിക്കുന്ന ഭരണവര്‍ഗ രാഷ്ട്രീയത്തെ രക്ഷിച്ചെടുക്കാമെന്ന് ഒരു വലതുപക്ഷ രാഷ്ട്രീയക്കാരനും പ്രതീക്ഷ വച്ചുപുലര്‍ത്തേണ്ടതില്ലെന്ന അസന്ദിഗ്ധമായ മുന്നറിയിപ്പാണ് പാര്‍ടി പ്രവര്‍ത്തകര്‍ ഒറ്റക്കെട്ടായി പ്രഖ്യാപിക്കുന്നത്. നാടും നഗരവുമുണര്‍ത്തി സ്വീകരണകേന്ദ്രങ്ങളിലേക്കെത്തുന്ന സ്ത്രീപുരുഷന്മാര്‍ ഒരു ശരീരവും മനസ്സുമെന്നപോലെ വിളിച്ചുപറയുന്നത് ആധുനിക കേരള നിര്‍മിതിയുടെ ചരിത്രത്തിലുടനീളം പുരോഗതിയുടെ ചാലകശക്തിയായി വര്‍ത്തിച്ച തൊഴിലാളി കര്‍ഷക വര്‍ഗങ്ങളുടെ മുന്‍നിര പോരാളിയായ പാര്‍ടിയെ തകര്‍ക്കാന്‍ അനുവദിക്കില്ലെന്ന് തന്നെയാണ്. രക്തസാക്ഷിത്വങ്ങളുടെയും രണോത്സുകമായ സമരപോരാട്ടങ്ങളുടെയും ചരിത്രസ്മരണകളെ തൊട്ടുണര്‍ത്തിക്കൊണ്ട് ആപത്തിന്റെ സന്ദര്‍ഭങ്ങളെ ഞങ്ങള്‍ ഒരുമിച്ചുതന്നെ നേരിടുമെന്ന പ്രഖ്യാപനമാണ് അവരുടെ കണ്ഠങ്ങളില്‍നിന്നുയരുന്നത്. ജന്മി നാടുവാഴിത്തത്തിന്റെയും ജാതിവ്യവസ്ഥയുടെയും അന്ധകാരപൂര്‍ണമായ ജീവിതാവസ്ഥയില്‍നിന്നും ഒരു ജനതയെ പുരോഗതിയിലേക്കും പ്രകാശത്തിലേക്കും നയിച്ച പ്രസ്ഥാനത്തെ നെഞ്ചിലേറ്റിയവരുടെ ചരിത്രബോധവും പാര്‍ടിക്കൂറുമാണിവിടെ പ്രതിഫലിക്കുന്നത്.

പോയകാല പോരാട്ടങ്ങളിലൂടെ കേരളമുണ്ടാക്കിയ നേട്ടങ്ങളെ നഷ്ടപ്പെടുത്തിക്കളയുന്ന ആഗോളവല്‍ക്കരണ നയങ്ങളെ ചെറുക്കാന്‍ പാര്‍ടിയെ കണ്ണിലെ കൃഷ്ണമണിപോലെ കാത്തുസൂക്ഷിക്കുമെന്ന നിശ്ചയ ദാര്‍ഢ്യമാണ് ജനസഹസ്രങ്ങള്‍ പ്രകടിപ്പിക്കുന്നത്. ജാഥാസ്വീകരണകേന്ദ്രങ്ങളില്‍ നേതാക്കള്‍ നടത്തുന്ന പ്രസംഗങ്ങളില്‍ നവലിബറല്‍ നയങ്ങളില്‍നിന്ന് കേരളീയസമൂഹം നേടിയ നേട്ടങ്ങളെ എങ്ങനെ സംരക്ഷിക്കാമെന്നും ജനങ്ങളുടെ ജീവിതം എങ്ങനെ മെച്ചപ്പെടുത്താമെന്നുമുള്ള പ്രശ്നങ്ങളെ സംബന്ധിച്ച് ആശയവ്യക്തത നല്‍കുന്നതാണ്. ആഗോളവല്‍ക്കരണനയങ്ങളുടേതായ കേന്ദ്രഘടനക്കകത്തുനിന്നുകൊണ്ട് (അതിന്റെ പരിമിതികള്‍ക്കകത്തുനിന്നുകൊണ്ടുതന്നെ) എങ്ങനെ കേരളത്തിലെ ഉല്‍പ്പാദന ശക്തികളെ വികസിപ്പിക്കാം, തൊഴില്‍ അവസരങ്ങള്‍ സൃഷ്ടിക്കാം, ഭക്ഷ്യസുരക്ഷ കൈവരിക്കാം, കേരളത്തിന്റെ സവിശേഷമായ വളര്‍ച്ചയുടെ ഘടനാപരമായ ദോഷങ്ങളെ മറികടക്കാന്‍ കഴിയാവുന്ന തരത്തില്‍ ഉല്‍പ്പാദനവര്‍ധനവ് കൈവരിക്കാം, അതിനാവശ്യമായ നിക്ഷേപസൗകര്യവും അന്തര്‍ഘടനാ സൗകര്യവും സൃഷ്ടിക്കാം എന്നെല്ലാമുള്ള കേരളവികസനത്തെ സംബന്ധിച്ച മൗലിക പ്രധാനമായ വിഷയങ്ങള്‍ ലളിതമായിത്തന്നെ വിശദമാക്കുന്നുണ്ട്. പതിനാറാം ലോക്സഭാ തെരഞ്ഞെടുപ്പിന്റെ പശ്ചാത്തലത്തില്‍ ദേശീയ രാഷ്ട്രീയവും വിലക്കയറ്റവും യുഡിഎഫ് സര്‍ക്കാരിന്റെ ജനദ്രോഹനയങ്ങളും വിശദീകരിക്കുന്ന മൂന്ന് ലഘുലേഖകള്‍ ജാഥാകേന്ദ്രങ്ങളില്‍ വിതരണം ചെയ്യുന്നുണ്ട്. കോര്‍പറേറ്റ് മാധ്യമങ്ങളുടെയും നുണക്കഥകളിലൂടെയും കമ്യൂണിസ്റ്റ് പ്രസ്ഥാനത്തെ തകര്‍ത്തുകളയാന്‍ അച്ചാരം വാങ്ങിയ കപട വിപ്ലവകാരികളുടെയും "നവസാമൂഹ്യപ്രസ്ഥാന"ങ്ങളുടെയും വായാടികളായ ബുദ്ധിജീവികള്‍ വികസനത്തെയും നവലിബറല്‍ നയങ്ങള്‍ക്കെതിരായ സമരങ്ങളെയും സംബന്ധിച്ച് ആശയക്കുഴപ്പങ്ങള്‍ സൃഷ്ടിക്കുന്ന കേരളീയ സാഹചര്യത്തില്‍ കേരളരക്ഷാ മാര്‍ച്ച് മുന്നോട്ടുവയ്ക്കുന്ന വികസനത്തെയും സാമൂഹ്യ വിപ്ലവത്തെയുംകുറിച്ചുള്ള നിലപാടുകള്‍ മാര്‍ക്സിസ്റ്റ് സാമൂഹ്യപ്രയോഗങ്ങളെ സംബന്ധിച്ച വ്യക്തവും മൂര്‍ത്തവുമായ സൈദ്ധാന്തിക ധാരണകളുടെ അടിസ്ഥാനത്തിലുള്ളതാണ്. കോണ്‍ഗ്രസിനും ബിജെപിക്കുമെതിരായ ഒരു ജനകീയ ബദലിന്റെ സാധ്യതകളെയാണ് വര്‍ത്തമാന രാഷ്ട്രീയസാഹചര്യങ്ങളെ വിശകലനം ചെയ്തുകൊണ്ട് മാര്‍ച്ച് മുന്നോട്ടുവയ്ക്കുന്നത്. ഫൈനാന്‍സ് മൂലധന വികാസത്തെയും അധിനിവേശത്തെയും സംബന്ധിച്ച് അതിവൈകാരികവും ആത്മനിഷ്ഠവുമായ ധാരണകളാണ് ചരിത്രത്തിലെപ്പോഴും പരിഷ്കരണവാദികളെയും അതിവിപ്ലവകാരികളെയും ഒരുപോലെ സ്വാധീനിച്ചിട്ടുള്ളത്. രണ്ടറ്റങ്ങളില്‍നിന്ന് തിരുത്തല്‍വാദികളും തീവ്രവാദികളും ഒരുപോലെ ഫലപ്രദവും പ്രയോഗക്ഷമവുമായ മൂലധനാധികാരത്തിനെതിരായ സമരങ്ങളെ വഴിതെറ്റിക്കുകയാണ് ചെയ്തിട്ടുള്ളത്. ഭൂപ്രശ്നം മുതല്‍ വ്യവസായവല്‍ക്കരണം വരെയുള്ള കേരള വികസനത്തെ സംബന്ധിച്ച തെറ്റായ ധാരണകള്‍ ബൂര്‍ഷ്വാമൂലധന താല്‍പ്പര്യങ്ങളെത്തന്നെ സഹായിക്കുന്ന രാഷ്ട്രീയ വിവാദങ്ങളായി കലാശിക്കുന്ന സമകാലീന സാഹചര്യത്തില്‍ തൊഴിലാളിവര്‍ഗത്തിന്റെ വികസനവും വിപ്ലവവുമായി ബന്ധപ്പെട്ട വീക്ഷണങ്ങള്‍ക്ക് വ്യക്തത നല്‍കാനും അത് ബഹുജനങ്ങള്‍ക്കിടയില്‍ എത്തിക്കാനും കമ്യൂണിസ്റ്റുകാര്‍ അടിയന്തര പ്രാധാന്യം നല്‍കേണ്ടതുണ്ട്. അത്തരമൊരു തിരിച്ചറിവും പരിശ്രമവുമാണ് സിപിഐ എമ്മിന്റെ രാഷ്ട്രീയ പ്രത്യയശാസ്ത്രനിലപാടുകളെ പ്രസക്തമാക്കുന്നത്.

ജീര്‍ണ മുതലാളിത്തത്തിന്റെ രാഷ്ട്രീയ പ്രതിനിധികളായ കോണ്‍ഗ്രസ്സും ബിജെപിയും എന്തു വൃത്തികേടുകളും തങ്ങളുടെ അതിജീവനത്തിനായി ചെയ്യും. കമ്യൂണിസ്റ്റ് വിരുദ്ധതയുടേതായ അത്തരം മക്കാര്‍ത്തിയന്‍ മുറകളെയെല്ലാം അതിജീവിക്കാന്‍ ഇടതുപക്ഷ കമ്യൂണിസ്റ്റ് പ്രസ്ഥാനത്തിന് ശേഷിയുണ്ടെന്ന് കേരളരക്ഷാ മാര്‍ച്ച് കടന്നുപോകുന്ന വഴികളും സ്വീകരണകേന്ദ്രങ്ങളും വിളിച്ചറിയിക്കുകയാണ്. സാമ്രാജ്യത്വമൂലധന വ്യവസ്ഥ എന്തുമാത്രം ക്രൂരവും ക്രിമിനലുമായിത്തീരുമെന്നും അതെന്തുമാത്രം കമ്യൂണിസ്റ്റ് വിരുദ്ധമായി മാറുമെന്നുമാണ് ഫാസിസ്റ്റ്നാസി ചരിത്രംതന്നെ രേഖപ്പെടുത്തിയിട്ടുള്ളത്.

ഫൈനാന്‍സ് മൂലധനത്തിന്റെ സ്വേച്ഛാധിപത്യവാഴ്ചയായിരുന്നല്ലോ ഹിറ്റ്ലറിസം. തൊഴിലാളിവര്‍ഗപ്രസ്ഥാനങ്ങളെയും വിപ്ലവങ്ങളെയും മറികടക്കുന്നതിന് പല മുതലാളിത്ത ഭരണകൂടങ്ങളും രൂപപ്പെടുത്തിയ കമ്യൂണിസ്റ്റ് വിരുദ്ധ പദ്ധതികളാണ് ഫാസിസമായി വളര്‍ന്ന് എല്ലാവിഭാഗം ജനങ്ങളെയും വേട്ടയാടിയത്. ഹിറ്റ്ലര്‍ ഒരിക്കല്‍ പറഞ്ഞത് "നാസി പാര്‍ടി പരാജയപ്പെട്ടാല്‍ ജര്‍മനിയിലുണ്ടാകുക പത്ത് ലക്ഷം കമ്യൂണിസ്റ്റുകളായിരിക്കു"മെന്നാണ്. ആഗോള ഫൈനാന്‍സ് മൂലധന ശക്തികളോട് ഹിറ്റ്ലര്‍ സോവിയറ്റ് യൂണിയനെയും കമ്യൂണിസ്റ്റുകാരെയും ഉന്മൂലനം ചെയ്യാന്‍ നാസി പാര്‍ടിയോടൊപ്പം നില്‍ക്കണമെന്നാണ് ആവശ്യപ്പെട്ടത്. ചരിത്രത്തിന്റെ ഈ വിലപ്പെട്ട പാഠങ്ങളെയെല്ലാം വിസ്മരിച്ച് സിപിഐ എമ്മിനും കമ്യൂണിസ്റ്റുകാര്‍ക്കുമെതിരായ അപവാദ കഥകളില്‍ രസിച്ചിരിക്കുന്നവര്‍ ഫൈനാന്‍സ് മൂലധനത്തിന്റെ ഹിംസാത്മക ആധിപത്യം സൃഷ്ടിക്കാന്‍ പോകുന്ന ഭയങ്കരമായ വാര്‍ത്തകള്‍ കേള്‍ക്കാനിരിക്കുന്നതേയുള്ളൂ.

റിലയന്‍സ് ഉള്‍പ്പെടെയുള്ള ഇന്ത്യക്കകത്തും പുറത്തുമുള്ള ഫൈനാന്‍സ് മൂലധനശക്തികള്‍ ഭയപ്പെടുന്നത് കമ്യൂണിസ്റ്റുകാരെയാണ്. ആസന്നമായ പതിനാറാം ലോക്സഭാ തെരഞ്ഞെടുപ്പില്‍ സിപിഐ എം നേതൃത്വം നല്‍കുന്ന ഇടതുപക്ഷത്തിന്റെ പ്രാതിനിധ്യവും സാന്നിധ്യവും പാര്‍ലമെന്റില്‍ കുറച്ചെടുക്കാനുള്ള ആസൂത്രിതമായ നീക്കങ്ങളാണ് മൂലധനശക്തികള്‍ നടത്തുന്നത്. ഇന്ത്യയുടെ പരമാധികാരത്തെയും സ്വാതന്ത്ര്യത്തെയും തകര്‍ത്ത് ആധിപത്യം നേടാന്‍ വ്യഗ്രതപ്പെടുന്ന മൂലധനശക്തികളാണ് സിപിഐ എം വിരുദ്ധപ്രചാരവേലയുടെ ആസൂത്രകരും ഏകോപകരും. അവര്‍ക്കെതിരായ അപ്രതിരോധ്യമായ ജനമുന്നേറ്റത്തിന്റെ ഇച്ഛാശക്തിയും പ്രത്യയശാസ്ത്രവും ജനങ്ങളിലേക്ക് സന്ദേശിച്ചുകൊണ്ടാണ് കേരള രക്ഷാമാര്‍ച്ച് ചരിത്രത്തോടും സമൂഹത്തോടുമൊപ്പം പ്രയാണം തുടരുന്നത്.